Msaada wa Kushughulikia Hisia Zetu

JE, NYAKATI nyingine wewe hulemewa na hisia zisizofaa? Je, wewe hukasirika au kukata tamaa haraka? Je, mahangaiko ya maisha hukulemea? Ni nini kitakachokusaidia?

Mwanadamu hukabili hisia mbalimbali maishani mwake. Hisia zinapodhibitiwa ifaavyo, zinafanya maisha yawe yenye kupendeza zaidi. Hata hivyo, Biblia inatambua kwamba “uonevu mtupu unaweza kumfanya mtu mwenye hekima atende kiwazimu.” (Mhubiri 7:7) Katika ulimwengu ambamo jeuri na misiba ni mambo ya kawaida, sote tunaathiriwa kihisia na yale yanayotukia. Hata hivyo, Maandiko pia yanasema: ‘Hakuna jambo bora kuliko mwanadamu kufurahia kazi zake.’ (Mhubiri 3:22) Hivyo, ili kufanya maisha yawe yenye kufurahisha zaidi, tunahitaji kujifunza kusitawisha hisia zinazofaa. Tunawezaje kusitawisha hisia zinazofaa na kudhibiti zile zenye kudhuru?

Mara nyingi kuchukua hatua muhimu hupunguza uzito wa hisia zetu zisizofaa. Kwa mfano, tunapohisi wasiwasi kwa sababu ya mambo ambayo hatuwezi kubadili, ni vizuri kubadili shughuli zetu za kawaida au mazingira yetu badala ya kuhangaika sana. Kufanya matembezi ya starehe, kusikiliza muziki wenye kutuliza, kufanya mazoezi mazito ya mwili, au kumtendea kwa fadhili mtu aliye katika uhitaji kunaweza kuleta kitulizo na kiasi fulani cha furaha.—Matendo 20:35.

Hata hivyo, njia bora ya kuondolea mbali mawazo yasiyofaa, ni kumtumaini Muumba wetu. Mawazo yasiyofaa yakiendelea, tunahitaji ‘kutupa mahangaiko yetu yote juu ya Mungu’ kupitia sala. (1 Petro 5:6, 7) Biblia inatuhakikishia hivi: “Yehova yuko karibu na wale waliovunjika moyo . . . Mwadilifu ana misiba mingi, lakini Yehova humkomboa kutoka katika yote hiyo.” (Zaburi 34:18, 19) Tunawezaje kuwa na hakika kwamba Mungu anaweza kuwa ‘msaidizi na Mwokoaji wetu’? (Zaburi 40:17) Tunaweza kufanya hivyo kwa kujifunza Biblia na kutafakari mifano yake halisi ya jinsi Mungu anavyojali hali njema ya watumishi wake.