Faidika na Elimu Bora Zaidi!

BIBLIA inasema kwamba Yehova Mungu ndiye Muumba wa vitu vyote, kutia ndani wanadamu. (Mwanzo 1:27; Ufunuo 4:11) Akiwa Mfundishaji Mkuu, aliwaelimisha wenzi wa kwanza wa ndoa, Adamu na Hawa, na kuwatayarisha ili waishi katika bustani maridadi ya Edeni. Kusudi lake lilikuwa kuendelea kuwaelimisha na kuwatunza milele. (Mwanzo 1:28, 29; 2:15-17; Isaya 30:20, 21) Hebu wazia tumaini hilo!

Hata hivyo, inasikitisha kwamba Adamu na Hawa walipoteza tumaini hilo. Kwa sababu ya kutotii kwao, jamii ya kibinadamu ikaanza kudhoofika kiadili na kimwili. (Mwanzo 3:17-19; Waroma 5:12) Ikirejelea wale walioishi vizazi vichache tu baada ya wanadamu kuumbwa, Biblia inasema: “Yehova akaona kuwa ubaya wa mwanadamu ulikuwa mwingi duniani na kila mwelekeo wa fikira za moyo wake ulikuwa mbaya tu wakati wote.”—Mwanzo 6:5.

Miaka 4,500 hivi imepita tangu Yehova aseme kwamba mwelekeo wa mwanadamu ni mbaya sikuzote, na hali ya wanadamu ni mbaya hata zaidi sasa. Wengi hudanganya bila aibu, huiba, au kuwashambulia wengine. Matatizo yanaongezeka kila siku, huku wanadamu wakiacha kuhangaikiana zaidi na zaidi. Bila shaka, mahusiano ya kibinafsi, kutia ndani ya wale walio katika familia, yako hatarini. Hata hivyo, Mungu hawezi kulaumiwa kwa sababu ya hali zilizopo, wala hajaacha kuhangaikia matatizo yanayowapata wanadamu leo. Sikuzote Yehova amependezwa na hali ya wanadamu, naye anataka kuwaelimisha wale wanaotafuta uongozi wake ili wapate furaha maishani. Miaka 2,000 hivi iliyopita, alimtuma Mwana wake, Yesu Kristo, duniani na akaonyesha kusudi Lake la kuwaelimisha watu wanaotaka kufanikiwa maishani. Yesu aliacha kielelezo cha elimu kamilifu kwa sababu alikuwa ameelimishwa na Mfundishaji Mkuu kwa miaka mingi sana.

Ukristo wa Kweli Ni Elimu

Yesu Kristo alianzisha Ukristo wa kweli, ambao ni njia ya maisha inayotegemea upendo. Katika Ukristo wa kweli, mawazo na matendo yote yanapatana na mapenzi ya Mungu, ili kuleta heshima na utukufu kwa jina lake. (Mathayo 22:37-39; Waebrania 10:7) Yesu aliongozwa na Baba yake, Yehova, katika mambo aliyofundisha kuhusu njia hiyo ya maisha. Tunasoma hivi kwenye Yohana 8:29 kuhusu msaada ambao Yesu alipata kutoka kwa Mungu: “Yule aliyenituma yuko pamoja nami; yeye hakuniacha peke yangu, kwa sababu sikuzote mimi hufanya mambo yanayompendeza.” Naam, Yesu alisaidiwa na kuongozwa na Baba yake katika huduma yake yote. Wanafunzi wa Yesu wa mapema hawakuhitaji kukabiliana na matatizo ya maisha bila mwongozo. Yehova alimtumia Mwana wake kuwaelimisha. Kufuata mafundisho na mfano wa Yesu kuliwafanya wawe watu bora. Ndivyo ilivyo na wanafunzi wake leo.—Ona sanduku “Uvutano wa Yesu na Mafundisho Yake,” kwenye ukurasa wa 6.

Sehemu moja muhimu ya Ukristo wa kweli ni kwamba unahusisha elimu inayochochea akili na moyo ili kubadilisha utu wa  watu. (Waefeso 4:23, 24) Kwa mfano, fikiria yale ambayo Yesu alifundisha kuhusu kuwa mwaminifu kwa mwenzi wa ndoa: “Mlisikia kwamba ilisemwa, ‘Usifanye uzinzi.’ Lakini mimi ninawaambia ninyi kwamba kila mtu ambaye anaendelea kumtazama mwanamke na kumtamani tayari amefanya uzinzi pamoja naye moyoni mwake.” (Mathayo 5:27, 28) Kwa maneno hayo, Yesu aliwafundisha wanafunzi wake kwamba moyo unapaswa kudumishwa ukiwa safi na kwamba mawazo na tamaa zisizofaa zinaweza kuwa na matokeo mabaya sana hata ingawa matendo mabaya hayajafanywa. Je, si kweli kwamba mawazo mabaya yanaweza kumfanya mtu atende kwa njia itakayomkasirisha Mungu na kuwaumiza wengine?

Hivyo, Biblia inatoa shauri hili: “Acheni kufanyizwa kulingana na mfumo huu wa mambo, bali mgeuzwe kwa kufanya upya akili yenu, ili mjihakikishie wenyewe mapenzi ya Mungu yaliyo mema na yenye kukubalika na makamilifu.” (Waroma 12:2) Huenda ukauliza, ‘Je, kweli inawezekana kufanya upya akili kupitia elimu?’ Kufanya upya akili kunatia ndani kuichochea kwa njia tofauti kwa kuijaza kanuni na maagizo ya Neno la Mungu. Inawezekana kufanya hivyo kwa kukubali elimu ambayo Mungu anaandaa kupitia Neno lake.

Wachochewa Kufanya Mabadiliko

“Neno la Mungu liko hai nalo lina nguvu.” (Waebrania 4:12) Bado lina uvutano wenye nguvu kwa watu, na hivyo ni wazi kwamba halipitwi na wakati. Linaweza kumchochea mtu abadili njia yake ya maisha, aukubali Ukristo wa kweli, na kuwa mtu bora. Mifano ifuatayo inaonyesha thamani ya elimu ya Biblia.

Emilia, aliyetajwa katika makala iliyotangulia anasema: “Nilipofanya jitihada peke yangu sikufaulu kuboresha hali za nyumbani. Nilipoanza kujifunza Biblia na Mashahidi wa Yehova, nilitambua kwamba kuna tumaini, nami nikaanza kubadili mtazamo wangu. Nilijifunza kuwa na subira na kujiepusha na milipuko ya hasira. Baada ya muda, mume wangu akaanza kujifunza pia. Haikuwa rahisi kwake kuacha ulevi, lakini alifaulu. Hiyo ilitupatia nafasi ya kuanza upya maisha ya ndoa. Sasa sisi ni Wakristo wenye furaha na tunakazia kanuni za Biblia kwa watoto wetu.”—Kumbukumbu la Torati 6:7.

Elimu ambayo Ukristo wa kweli unaandaa inaweza kumweka mtu huru kutokana na mwenendo mbaya na ukosefu wa adili. Ilikuwa hivyo kwa Manuel. * Akiwa na umri wa miaka 13 alitoroka nyumbani na kuanza kuvuta bangi. Baadaye, alianza kuvuta heroini. Alifanya ngono na wanaume na wanawake ili kupata makao na pesa. Wakati mwingine, Manuel alipata riziki kwa kuwanyang’anya  watu mali zao kwa nguvu. Alikuwa mlevi karibu nyakati zote kwa sababu ya dawa za kulevya. Kwa sababu alihusika katika jeuri, alifungwa gerezani mara nyingi. Wakati fulani alifungwa gerezani miaka minne, na akiwa huko akajihusisha na biashara ya silaha. Baada ya kuoa, Manuel aliendelea kupata matatizo kwa sababu ya mwenendo wake. Anasema: “Tuliishi katika nyumba ya kuku. Bado ninakumbuka mke wangu akipika juu ya matofali. Hali yetu ilikuwa mbaya sana hivi kwamba watu wangu wa ukoo walimhimiza mke wangu aniache.”

Ni nini kilichobadili maisha yake? Manuel anajibu: “Mtu fulani niliyemjua alikuja nyumbani kwetu kuzungumza kuhusu Biblia. Nilikubali atutembelee ili tu kumwonyesha kwamba hakuna Mungu anayewajali watu. Nilidhani kwamba ninaweza kuthibitisha hilo kupitia mambo ambayo nimekabili maishani. Nilishangaa kwamba Shahidi huyo alikuwa mwenye subira na mpole, hivyo nikakubali kuhudhuria mikutano katika Jumba la Ufalme. Ingawa baadhi ya wale waliohudhuria walijua hali yangu, walinisalimia kwa shauku. Walifanya nijihisi kama mmoja wao. Nilifarijika sana. Nilichochewa sana hivi kwamba nikaamua kutafuta kazi nzuri na kuacha kutumia dawa za kulevya. Miezi minne baada ya kuanza kujifunza Biblia, nilistahili kuanza kazi ya kuhubiri, na miezi minne baadaye, nikabatizwa na kuwa Shahidi wa Yehova.”

Ukristo wa kweli umemsaidiaje Manuel na familia yake? Manuel anasema hivi: “Bila elimu ya Biblia kwa hakika ningekufa zamani. Mafundisho ya Yesu yalisaidia familia yangu kuungana. Watoto wangu wawili hawahitaji kupitia mambo niliyokabili nikiwa kijana. Ninafurahi na kumshukuru Yehova sana kwa sababu ya uhusiano mzuri nilio nao sasa pamoja na mke wangu. Baadhi ya wale waliokuwa rafiki zangu wamenipongeza na kusema kwamba ninafuatia njia ya maisha iliyo bora zaidi.”

 Mbali na kuwa safi kiadili, Mkristo anapaswa pia kuwa safi kimwili. John anayeishi katika eneo ambalo limekumbwa na umaskini huko Afrika Kusini, alielewa jambo hilo. Anaeleza: “Wakati mwingine, binti yetu angekaa juma zima bila kuoga na hatukujali.” Mke wake anakubali kwamba makao yao yalikuwa machafu sana. Lakini mambo yalibadilika baada ya kupata elimu ya Kikristo. John aliacha kushirikiana na genge la wezi wa magari, naye akaanza kushughulikia familia yake zaidi. “Tulijifunza kwamba tukiwa Wakristo, tunapaswa kuoga na kufua mavazi yetu. Ninapenda andiko la 1 Petro 1:16, linalotuhimiza tuwe watakatifu kwa sababu Yehova Mungu ni mtakatifu. Sasa, sisi pia tunajitahidi kudumisha usafi nyumbani kwetu.”

Unaweza Kupata Elimu Bora Zaidi

Kuna mifano mingi zaidi ya ile iliyotajwa hapo juu. Kwa sababu ya kupata elimu inayotegemea Biblia, maelfu ya watu wameboresha maisha yao. Kwa kuwa wao ni wanyoofu na wenye bidii, wanathaminiwa na waajiri wao. Wamekuwa majirani na marafiki wazuri wanaowajali wanadamu wenzao. Kwa kuwa wameazimia kuepuka mwenendo mbaya na mielekeo ya kimwili, wao hutunza afya yao ya kimwili, kiakili, na kihisia. Badala ya kutumia vibaya mali zao, wao huzitumia kwa faida yao na ya familia zao. (1 Wakorintho 6:9-11; Wakolosai 3:18-23) Bila shaka, matokeo ya kutumia yale ambayo Yehova anasema katika Biblia huonyesha kwamba kuishi kulingana na Ukristo wa kweli ndiyo njia bora zaidi ya maisha, inayotoa elimu bora zaidi. Kuhusu mtu anayeishi kulingana na sheria za Mungu, Biblia inasema: “Kila jambo analofanya litafanikiwa.”—Zaburi 1:3.

Inatia moyo kujua kwamba Yehova, Mungu Mweza-Yote anataka kutufundisha. Anasema hivi kujihusu: “Mimi, Yehova, ni Mungu wako, Yeye anayekufundisha ili ujifaidi mwenyewe, Yeye anayekufanya uende katika njia unayopaswa kutembea ndani yake.” (Isaya 48:17) Naam, Yehova ametuonyesha njia hiyo kupitia mfano na mafundisho ya Mwana wake, Yesu Kristo. Mafundisho yake yaliboresha maisha ya watu wengi waliomjua alipokuwa duniani, na yanaboresha maisha ya watu wengi leo. Kwa nini usitenge wakati ili ujifunze mengi kuhusu mafundisho hayo? Mashahidi wa Yehova katika eneo lenu watafurahi kukusaidia kupata elimu hiyo muhimu.

[Maelezo ya Chini]

[Sanduku/Picha katika ukurasa wa 6]

Uvutano wa Yesu na Mafundisho Yake

Zakayo alitumia cheo chake akiwa mkuu wa wakusanya-kodi kujitajirisha kwa kuwanyang’anya pesa na kuwaibia watu wa kawaida. Lakini alifuata mafundisho ya Yesu na kubadili maisha yake.—Luka 19:1-10.

Sauli wa Tarso aliacha kuwatesa Wakristo, naye akawa Mkristo na kuwa mtume Paulo.—Matendo 22:6-21; Wafilipi 3:4-9.

Baadhi ya Wakristo huko Korintho walikuwa ‘waasherati, waabudu-sanamu, wazinzi, wanaume wanaolala na wanaume, wezi, watu wenye pupa, walevi, watukanaji, na wanyang’anyi.’ Lakini baada ya kuwa Wakristo wa kweli, ‘wakaoshwa na kuwa safi, wakatakaswa, na kutangazwa kuwa waadilifu katika jina la Bwana wetu Yesu Kristo.’—1 Wakorintho 6:9-11.

[Picha katika ukurasa wa 7]

Biblia inaweza kukuonyesha jinsi ya kufanikiwa