“Wale Wanaoshuka Baharini kwa Meli”

KUNA sanamu ya shaba inayokabiliana na bandari ya Gloucester, huko Massachusetts, Marekani. Sanamu hiyo inaonyesha nahodha akijikakamua kuelekeza meli yake kupitia dhoruba. Sanamu hiyo inakumbusha watu kuhusu maelfu ya wavuvi wa huko Gloucester ambao walikufa baharini. Chini ya sanamu hiyo na kwenye bamba lililo karibu nayo kuna maneno haya ya Zaburi 107:23, 24: “Wale wanaoshuka baharini kwa meli, wanaofanya biashara katika maji mengi, hao ndio ambao wameziona kazi za Yehova na kazi zake za ajabu vilindini.”

Kuvua chini ya bahari ya Atlantiki katika vilindi vyenye samaki wengi ni hatari. Watu wapatao 5,368 huko Gloucester, ambalo sasa ni eneo lenye wakaaji 30,000 hivi, wamekufa baharini wakivua samaki. Bamba hilo la ukumbusho linasema hivi: “Wengine walisukumwa na pepo zenye nguvu na mawimbi makubwa yaliyosababishwa na dhoruba iliyotoka kaskazini-mashariki. Wengine walikufa wakiwa peke yao ndani ya mtumbwi mdogo uliopeperushwa mbali kutoka kwenye mashua kubwa iliyokuwa imewapeleka kwenye maeneo ya kuvua. Meli nyingine ziligongana kwa sababu ya dhoruba na kuzama. Nyingine ziligongwa na meli za mvuke kwenye vijia vinavyotumiwa na meli.”

Bamba hilo la ukumbusho linatoa ushahidi wenye kusikitisha wa kazi ngumu na yenye hatari ambayo wavuvi wamekabili kwa muda wa karne nyingi. Fikiria kilio cha huzuni kwa sababu ya kuwapoteza waume, baba, ndugu, na wana. Hata hivyo, Yehova Mungu hawasahau wajane, mayatima, au wale waliokufa baharini. Mtume Yohana alizungumzia tukio hilo la wakati ujao aliposema hivi: “Bahari ikawatoa wale wafu waliokuwa ndani yake, na kifo na Kaburi vikawatoa wale wafu waliokuwa ndani yake.” (Ufunuo 20:13) Kwa kweli, wakati wa ufufuo wao, wale ‘walioshuka baharini kwa meli’ wataona ‘kazi za ajabu za Yehova.’