“Msaada Wangu Unatoka Kwa Yehova”

Kujidhabihu Huleta Baraka za Yehova

MWANAMUME fulani anasafiri kwa baiskeli katika msitu mkubwa wa Kamerun. Anatumia saa nyingi, kuendesha baiskeli kwenye matope na kwenye barabara zenye kufurika maji, akihatarisha uhai wake ili kwenda kuwaimarisha wengine. Ndugu wengine huko Zimbabwe hutembea kilometa 15 wakivuka mito iliyofurika ili kwenda kufundisha kikundi kilicho mbali huku wakiwa wamebeba mavazi na viatu vyao kichwani ili visilowane. Kwingineko, mwanamke fulani anaamka saa kumi kamili asubuhi ili kumtembelea na kumfundisha mwuguzi wa kike ambaye anaweza kutenga saa moja tu mapema asubuhi.

Watu wanaofanya jitihada kama hizo wanafanana kwa njia gani? Wote ni Mashahidi wa Yehova na wahudumu wa wakati wote ambao hufanya kazi ya kufundisha kweli za Biblia. Wahudumu hao wa wakati wote wanatia ndani mapainia wa kawaida na wa pekee, wamishonari, waangalizi wanaosafiri, na maelfu ya wajitoleaji wanaotumikia katika Betheli mbalimbali ulimwenguni. Wahudumu hao hutambuliwa kwa sababu wana sifa ya kujidhabihu. *

Nia Inayofaa

Mashahidi wa Yehova wanatii himizo ambalo mtume Paulo alimpa Timotheo: “Fanya kabisa yote unayoweza ili ujitoe kwa Mungu ukiwa mtu aliyekubaliwa, mfanyakazi asiye na lolote la kuonea aibu, ukilitumia sawasawa neno la kweli.” (2 Timotheo 2:15) Hata hivyo, ni nini kinachowachochea mamia ya maelfu ya Mashahidi kuwa wahudumu wa wakati wote?

Wahudumu wa wakati wote wanapoulizwa kwa nini wanajitahidi sana katika utumishi wa Yehova, kwa kawaida wao hujibu kwamba upendo kwa Mungu na kwa wanadamu wenzao ndio huwachochea. (Mathayo 22:37-39) Jambo hilo linafaa sana kwa sababu ikiwa hawachochewi na upendo, jitihada yoyote wanayofanya ni bure.—1 Wakorintho 13:1-3.

Utumishi wa Kujidhabihu

Wakristo wote waliojiweka wakfu wamekubali mwaliko huu wa Yesu: “Mtu yeyote akitaka kunifuata, na ajikane mwenyewe na kuuchukua mti wake wa mateso na kunifuata sikuzote.” (Mathayo 16:24) Kujikana wenyewe kunamaanisha kukubali kwa hiari kuwa mali ya Yehova Mungu na Yesu Kristo na kuongozwa nao. Kwa walio wengi, jambo hilo limewachochea kufanya utumishi wa kujidhabihu wakiwa wahudumu wa wakati wote.

Mashahidi wengi wanajitahidi sana kupanua utumishi wao kwa Yehova. Fikiria Júlia mwenye umri wa miaka 56 ambaye ni painia wa kawaida huko São Paulo, Brazili. Anasema hivi: “Ndugu mmoja Mchina alinipigia simu ili kuniuliza ikiwa ningependa kujifunza Kichina. Kwa sababu ya umri wangu, sikufikiria kujifunza lugha mpya. Hata hivyo, baada ya siku kadhaa, nilikubali daraka hilo gumu. Leo, ninaweza kuhubiri katika Kichina.”

 Ofisi ya tawi ya Mashahidi wa Yehova ya Peru inaripoti hivi: “Katika miaka ya hivi karibuni, mamia ya mapainia wa kawaida wamehamia katika maeneo ambayo hayajagawiwa yeyote. Kwa kufanya hivyo, wameonyesha roho ya ujasiri na ya kujidhabihu. Wanahamia miji ya mbali ambako hakuna huduma za msingi na ambako ni vigumu kupata kazi. Ndugu na dada hao wako tayari kufanya yote wawezayo ili kubaki katika migawo yao. Hata hivyo, jambo muhimu hata zaidi ni kwamba utendaji wao huleta matokeo mazuri katika maeneo mbalimbali. Waangalizi wanaosafiri wanaripoti kwamba vikundi vipya vimeanzishwa kwa msaada wa mapainia hao wa kawaida wenye kujidhabihu.”

Baadhi ya Wakristo wamehatarisha maisha yao ili kuwasaidia waamini wenzao. (Waroma 16:3, 4) Mwangalizi mmoja wa mzunguko katika eneo moja la Afrika ambalo limekumbwa na vita anaripoti hivi: “Kabla ya kufika kwenye kizuizi cha mwisho cha barabarani kati ya maeneo yanayokaliwa na waasi na yale yanayodhibitiwa na serikali, mimi na mke wangu tulizingirwa na makamanda wanne wa jeshi la waasi pamoja na walinzi wao ambao walitaka kujua sisi ni akina nani. Walipokuwa wakichunguza vitambulisho vyetu, walitambua kwamba tunatoka katika eneo linalodhibitiwa na serikali, na hilo likawafanya wawe na wasiwasi. Walisema kwamba mimi ni mpelelezi. Hivyo, wakaamua kunitupa ndani ya shimo. Niliwaeleza sisi ni nani, na mwishowe wakatuacha tuendelee na safari yetu.” Makutaniko yalithamini sana kwamba wenzi hao wa ndoa wenye kujidhabihu walifaulu kuwatembelea!

Licha ya matatizo wanayopata, idadi ya wahudumu kama hao wa wakati wote inazidi kuongezeka ulimwenguni pote. (Isaya 6:8) Wafanyakazi hao wenye bidii wanathamini sana pendeleo lao la kumtumikia Yehova. Wakiwa na roho hiyohiyo ya kujidhabihu, leo mamilioni ya watu wanamtukuza Yehova. Yehova pia huwabariki sana. (Methali 10:22) Wakiwa na uhakika kwamba Mungu ataendelea kuwabariki na kuwategemeza, wafanyakazi hao wenye bidii wanaiga mtazamo wa mtunga-zaburi ambaye aliimba hivi: “Msaada wangu unatoka kwa Yehova.”—Zaburi 121:2.

[Maelezo ya Chini]

[Blabu katika ukurasa wa 9]

“Watu wako watajitoa kwa hiari katika siku ya jeshi lako.”—ZABURI 110:3

[Sanduku katika ukurasa wa 8]

YEHOVA HUWATHAMINI WATUMISHI WAKE WALIOJITOLEA

“Iweni imara, thabiti, sikuzote mkiwa na mengi ya kufanya katika kazi ya Bwana, mkijua kwamba kazi yenu si ya bure kuhusiana na Bwana.” —1 Wakorintho 15:58.

“Mungu hakosi kuwa mwadilifu hivi kwamba asahau kazi yenu na upendo mlioonyesha kwa ajili ya jina lake.”—Waebrania 6:10.