Good News for People of All Nations

KIJITABU kilichoonyeshwa hapa juu kilitolewa katika Kusanyiko la Wilaya la Mashahidi wa Yehova lenye kichwa “Tembea Pamoja na Mungu” la mwaka wa 2004 na 2005. Chapa moja ya kijitabu hicho ina kurasa 96 na ina ujumbe mfupi katika lugha 92, zinazotia ndani Kikamba na Kikongo. Kijitabu hicho kimekusudiwa kusaidia kueneza habari njema ya Ufalme kwa watu wengi iwezekanavyo. (Mathayo 24:14) Mambo yafuatayo yanaonyesha matokeo ya kutumia kijitabu hicho.

• Baada ya kupokea kijitabu hicho kusanyikoni, familia moja ya Mashahidi ilitembelea mbuga tatu za wanyama za kitaifa. Walikutana na watu kutoka India, Pakistan, Ufilipino, na Uholanzi. Mume alisema hivi: “Ingawa watu hao wote walizungumza Kiingereza kidogo, walifurahi sana tulipowaonyesha ujumbe katika lugha zao wenyewe, kwa kuwa walikuwa mbali na nyumbani kwao. Walitambua tuna umoja na kwamba kazi yetu inafanywa ulimwenguni pote.”

• Shahidi mwingine alimwonyesha mfanyakazi mwenzake kutoka India kijitabu hicho. Alifurahi sana kuona lugha mbalimbali katika kijitabu hicho na akasoma ujumbe uliomo katika lugha yake mwenyewe. Kwa njia hiyo wakawa na mazungumzo zaidi ya Biblia. Mfanyakazi mwingine kutoka Ufilipino, alishangaa kuona lugha yake katika kijitabu hicho naye akataka kujifunza zaidi kuhusu Mashahidi wa Yehova.

• Huko Kanada, mwanamke mmoja kutoka Nepal alikubali kujifunza Biblia na Shahidi fulani kupitia simu lakini akasita kumkaribisha nyumbani kwake. Hata hivyo, wakati Shahidi huyo alipomwambia kuhusu kijitabu kilicho na ujumbe huo katika lugha ya Kinepali, alimkaribisha dada huyo kwa shauku. Alitaka kujionea mwenyewe ujumbe huo katika lugha yake! Tangu wakati huo, wamekuwa wakijifunza Biblia nyumbani kwa mwanamke huyo.