Fanya Kutafakari Kuwe Jambo la Kupendeza

HUENDA wazo la kutafakari likawaogopesha wengine. Wanaweza kuona kutafakari kuwa kazi ngumu inayohitaji kukaza fikira sana. Watu hao wanaweza pia kujihisi kuwa wenye hatia kwa kupuuza kutafakari, hasa wanaposoma kuhusu umuhimu wa kutafakari. (Wafilipi 4:8) Hata hivyo, kufikiria kimyakimya kweli ambazo tumejifunza kumhusu Yehova, sifa zake zenye kupendeza, mambo makuu ambayo ametimiza, matakwa yake, na kusudi lake tukufu, kunaweza na kunapaswa kuwa njia ya kupendeza ya kutumia wakati wetu. Kwa nini?

Yehova Mungu ndiye Mtawala Mwenye Enzi Kuu ya ulimwengu na anafanya kazi kwa bidii ili kutimiza kusudi lake kuu. (Yohana 5:17) Hata hivyo, yeye hujishughulisha na fikira za kimyakimya za kila mmoja wa waabudu wake. Mtunga-zaburi Daudi alijua hivyo na aliongozwa kwa roho ya Mungu kuandika hivi: “Ee Yehova, umenichunguza kabisa, nawe unanijua. Wewe mwenyewe umepata kujua kuketi kwangu na kusimama kwangu. Umeichunguza fikira yangu tokea mbali.”—Zaburi 139:1, 2.

Mwanzoni, huenda mtu akayaona maneno hayo ya mtunga-zaburi kuwa yenye kuvunja moyo. Huenda akafikiri, ‘Ingawa Mungu yuko “mbali,” anaona kila fikira mbaya inayoingia akilini mwangu.’ Bila shaka, ni muhimu kutambua jambo hilo. Hilo linaweza kutusaidia kuepuka fikira mbaya na, tukiwa nazo, tutaungama kwa Mungu tukiwa na uhakika kwamba atatusamehe kwa msingi wa imani yetu katika dhabihu ya fidia ya Yesu. (1 Yohana 1:8, 9; 2:1, 2) Pia, tunapaswa kukumbuka kwamba Yehova huwachunguza waabudu wake kwa njia inayofaa. Yeye hutusikiliza tunapofikiria kumhusu kwa njia inayofaa.

Huenda ukauliza hivi: “Je, kweli Yehova hutambua fikira zote nzuri za mamilioni ya waabudu wake?” Bila shaka. Yesu alikazia kwamba Yehova anapendezwa nasi aliposema kwamba Yehova huwaona hata shore wadogo, kisha akaongeza hivi: “Ninyi ni wenye thamani kuliko shore wengi.” (Luka 12:6, 7) Shore hawawezi kumfikiria Yehova. Basi ikiwa anawajali shore, ni lazima awe anatujali hata zaidi na kufurahia wakati kila mmoja wetu anapotafakari kumhusu! Naam, kama Daudi, tunaweza kusali hivi kwa uhakika: “Maneno ya . . . kutafakari kwa moyo wangu na yawe yenye kupendeza mbele zako, Ee Yehova Mwamba wangu na Mkombozi wangu.”—Zaburi 19:14.

Uthibitisho mwingine unaoonyesha kwamba kwa kweli Yehova hujishughulisha na kutafakari kwa waabudu wake washikamanifu unapatikana katika maneno ya nabii Malaki yaliyoongozwa kwa roho ya Mungu. Akizungumza kuhusu siku zetu, alitabiri hivi: “Wakati huo wale wenye kumwogopa Yehova wakasemezana, kila mmoja na mwenzake, na Yehova akaendelea kutoa uangalifu na kusikiliza. Na kitabu cha kumbukumbu kikaanza kuandikwa mbele zake kwa ajili ya wale wenye kumwogopa Yehova na kwa ajili ya wale wanaolifikiria jina lake.” (Malaki 3:16) Tukijikumbusha kwamba Yehova huendelea “kutoa uangalifu” tunapofikiri kumhusu, kutafakari kwetu kumhusu kutapendeza. Hivyo, tunaweza kukubaliana na maneno haya ya mtunga-zaburi: “Nami hakika nitautafakari utendaji wako wote, nami nitajishughulisha mwenyewe na matendo yako.”—Zaburi 77:12.