‘Nimemaliza Vizuri Sana’

MWALIMU mmoja wa shule ya sekondari huko Hispania aliandika hivi: “Kwa zaidi ya miaka mia moja, Mashahidi wa Yehova wamekuwa na umoja wa kweli, unyoofu usioweza kutiliwa shaka, na zaidi ya yote, imani thabiti.” Kwa nini mwalimu huyo asiyeamini kwamba kuna Mungu alisema hivyo?

Kisa chenyewe kilianza wakati Noemí, mwanafunzi wa shule ya sekondari ambaye ni Shahidi wa Yehova, alipoambiwa aandike ripoti fulani katika mtihani wa mwisho. Aliamua kuandika juu ya kichwa hiki, “Pembe-Tatu za Zambarau Wakati wa Utawala wa Nazi.”

Kwa nini alichagua kichwa hicho? Noemí anaeleza hivi: “Kwa sababu mwalimu angesahihisha ripoti hiyo, niliona inafaa nitumie nafasi hiyo kumhubiria. Nilikuwa nimevutiwa na jinsi ambavyo Mashahidi wa Yehova walivyosimama imara wakati wa utawala wa Nazi huko Ujerumani. Nilisadiki kwamba wengine wangevutiwa pia.”

Ripoti ya Noemí iliwavutia watu wengi kuliko alivyotarajia. Mnamo Oktoba 5, 2002, alipata zawadi katika mashindano ya kitaifa ya utafiti kuhusu sayansi na elimu ya jamii. Zawadi za mashindano hayo hutolewa na waamuzi 20 kutoka vyuo vikuu mashuhuri vya Hispania.

Noemí alipokea zawadi yake kutoka kwa waziri wa elimu wa Hispania, Pilar del Castillo. Noemí alitumia nafasi hiyo kumpa waziri huyo kaseti ya video yenye kichwa Jehovah’s Witnesses Stand Firm Against Nazi Assault. Waziri aliipokea vizuri.

Katika mji wa Manresa ambako Noemí anaishi, gazeti moja lilizungumzia mafanikio yake katika masomo na kutaja mambo aliyokuwa ameandika. Pia, mwalimu mkuu wa shule ya Noemí alimwomba nakala ya ripoti hiyo ili itumiwe wakati wa sherehe ya kukumbuka mwaka wa 75 wa shule hiyo.

Noemí anasema hivi: “Nimemaliza masomo ya sekondari vizuri sana. Nilifurahi sana niliposoma jinsi mwalimu wangu, Bwana Jorge Tomás Calot, alivyoandika katika utangulizi wake kuhusu ripoti yangu:

“‘Siamini kuna Mungu, lakini ningependa kusadikishwa kabisa kuhusu kuwapo kwa Mtu huyo Mkuu Kuliko Wote, ambaye huwachochea waabudu wake wawe na “upendo wa kweli kwa jirani.”’”