“Kuanzia Leo, Naamini Kuna Mungu”

ALEXANDRA ni mwanamke kutoka Ukrainia ambaye anaishi Prague, katika Jamhuri ya Cheki. Siku moja alikuwa akirudi nyumbani kutoka kazini. Kwenye kituo cha basi, aliona kisanduku chini kilichokuwa kikikanyagwa na wapita-njia. Alipookota kisanduku hicho na kuangalia ndani, alishangaa sana. Alipata bunda la noti za koruna 5,000! Hakuona mtu yeyote akitafuta kisanduku hicho. Kwa kuwa alikuwa mgeni huko Jamhuri ya Cheki, ilikuwa vigumu kwa Alexandra kujipatia riziki. Angefanya nini?

Baada ya kurudi nyumbani, Alexandra alimwonyesha binti yake, Victoria, kisanduku hicho. Walikikagua ili waone jina na anwani ya mtu aliyekipoteza, lakini hawakupata chochote. Hata hivyo, ndani ya kisanduku hicho mlikuwemo kipande cha karatasi kilichoandikwa namba fulani juu yake. Upande mmoja wa karatasi hiyo ulikuwa na akaunti ya benki, na upande ule mwingine ulikuwa na namba kadhaa. Pia, ndani ya kisanduku hicho mlikuwemo habari za kumwelekeza mtu kwenye benki moja ya eneo hilo na karatasi yenye maandishi yaliyosema “koruny 330,000” (yapata dola 10,000 za Marekani). Hizo ndizo pesa zilizokuwa ndani ya kisanduku hicho.

Alexandra alijitahidi kuwasiliana na benki kwa simu kwa kutumia namba fulani iliyoonekana kuwa namba ya simu, lakini hakufaulu. Hivyo, yeye na binti yake wakaenda kwenye benki hiyo na kuwaeleza yale yaliyotukia. Wafanyakazi wa benki waliomba namba ya akaunti ambayo Alexandra na Victoria walipata ndani ya kisanduku hicho. Hata hivyo, benki haikuwa na habari zozote kuhusu akaunti hiyo. Siku iliyofuata, Alexandra alirudi tena kwenye benki hiyo akiwa na namba nyingine iliyokuwa ndani ya kisanduku hicho. Naam, benki hiyo ilikuwa na mteja fulani mwanamke mwenye namba hiyo ya akaunti. Alexandra na Victoria walimpigia simu mwanamke huyo, naye akathibitisha kwamba alipoteza pesa. Mwishowe walipokutana, mwanamke huyo aliwashukuru sana na kuuliza, “Niwalipe nini kwa kurudisha pesa hizi?”

Victoria akajibu: “Usitulipe chochote. Kama tungetaka pesa hizo, hatungekurudishia.” Akizungumza Kicheki kidogo alichojua, Victoria alimweleza hivi: “Tunakurudishia pesa hizi kwa sababu sisi ni Mashahidi wa Yehova. Dhamiri yetu iliyozoezwa na Biblia haituruhusu kuchukua kitu ambacho si chetu.” (Waebrania 13:18) Akiwa na furaha nyingi, mwanamke huyo alisema hivi: “Kuanzia leo, naamini kuna Mungu.”