Kutafuta Hazina za Kiroho Nchini Guinea

KWA karne nyingi, wavumbuzi walihatarisha uhai wao wakitafuta hazina na utajiri. Watu jasiri waliofika nchini Guinea, Afrika Magharibi, walipata utajiri wa aina mbili, yaani, utajiri wa kimwili na wa kiroho. Nchi hiyo iliyo na hazina kubwa ya almasi, dhahabu, chuma, na madini ya boksiti (yanayotokeza aluminiamu), ina watu zaidi ya milioni tisa.

Ingawa dini zinazodai kuwa za Kikristo si nyingi nchini humo, ibada ni muhimu na watu wengi wanathamini sana hazina za kiroho. Ni hazina gani hizo? Ni watumishi waaminifu wa Yehova wanaotajwa katika Hagai 2:7 kuwa “vitu vyenye kutamanika vya mataifa yote.”

Hazina za Kiroho

Jitihada nyingi zinahitajiwa ili kuchimba ardhini na kutafuta hazina zilizofichika. Ndivyo ilivyo na huduma ya Kikristo, jitihada nyingi zinahitajiwa ili kutafuta hazina za kiroho. Nchini Guinea, kazi ya kuhubiri Ufalme ilianza katikati mwa nchi mapema miaka ya 1950 na ilifika katika jiji kuu, Conakry, mapema miaka ya 1960. Leo, kuna Mashahidi wa Yehova wapatao 900 katika makutaniko na vikundi 21 nchini kote.

Wamishonari walifika mwaka wa 1987 na kufanya kazi pamoja na kutaniko moja tu lililokuwa Conakry. Leo kuna wamishonari zaidi ya 20 katika jiji kuu na miji mingine. Kwa bidii, wanayaimarisha makutaniko na kuhubiri pamoja na akina ndugu.

Luc, ambaye anaishi Conakry, alifurahia sana kujifunza Biblia pamoja na Albert, kijana  ambaye ni daktari. Albert alikuwa ametafuta kweli katika makanisa mbalimbali, naye aliwasiliana na pepo. Alivaa pete aliyopewa na mtu mwenye kuwasiliana na pepo ambaye alimhakikishia kwamba ingemletea bahati nzuri. Akiwa amevunjika moyo sana kwa sababu ya kushindwa kupata dini ya kweli, Albert aliitupa pete hiyo na kusali hivi: “Mungu, ikiwa upo, nisaidie kukujua na kukutumikia. Kama sivyo, nitafuata tu tamaa zangu maishani.” Muda mfupi baadaye, Albert alipomtembelea dada yake, alimsikia Shahidi wa Yehova akijifunza Biblia pamoja na mpwa wake. Punde si punde, mipango ilifanywa ili Luc amfundishe Biblia Albert.

Kila juma, Luc alifurahia kutembea zaidi ya kilometa 10 kwenda na kurudi ili kuongoza funzo hilo. Ingawa Luc hakuwa na elimu nyingi ya kilimwengu, Albert, ambaye ana elimu ya chuo kikuu, alivutiwa sana na imani ya Luc yenye nguvu katika Maandiko na jinsi alivyotumia ujuzi wa Biblia. Albert alifurahia kama nini kujifunza kwamba si Mungu anayewatesa wanadamu, badala yake, Yehova anakusudia kukomesha mateso yote na kuifanya dunia hii kuwa paradiso. (Zaburi 37:9-11) Kweli za Biblia pamoja na mwenendo mzuri wa washiriki wa kutaniko uligusa moyo wa Albert.

Hata hivyo, kama vile almasi inavyohitaji kuchongwa kwa makini sana na fundi stadi ili imetemete, ndivyo Albert alivyohitaji kuacha mazoea mabaya ya ulimwengu ili apatanishe maisha yake na viwango vya Mungu vya uadilifu. Aliacha kushirikiana na watu wanaowasiliana na pepo, akaacha ulevi, na kucheza kamari. Ilikuwa vigumu zaidi kwa Albert kuacha kuvuta sigara. Lakini, hatimaye alifaulu alipomwomba Yehova kwa bidii amsaidie. Miezi sita baadaye, alihalalisha ndoa yake. Mke wake alianza kujifunza Biblia. Hivi sasa wote wawili ni watumishi wa Yehova waliobatizwa.

Martin ni almasi nyingine ya kiroho. Alianza kujifunza Biblia huko Guéckédou alipokuwa na umri wa miaka 15. Wazazi wake Wakatoliki walipinga asihudhurie mikutano ya Mashahidi wa Yehova. Waliharibu vitabu vyake vya kujifunzia Biblia, wakampiga  na kumfukuza nyumbani. Kama vile almasi inavyotokezwa wakati kaboni inaposhinikizwa sana, ndivyo upinzani ulivyomfanya Martin azidi kuipenda kweli ya Biblia. Baada ya muda, mtazamo wa wazazi wake ulibadilika, naye akarudi nyumbani. Kwa nini wazazi wake walibadili mtazamo wao? Waliona tofauti kubwa kati ya mwenendo wa Martin na wa wadogo zake, ambao walikuwa waasi na walijihushisha na uasherati. Akiwa amesadiki kwamba imani mpya ya Martin ilimfaidi, baba yake aliwakaribisha washiriki wa kutaniko nyumbani kwake. Mama ya Martin amewashukuru mara nyingi akina ndugu kwa sababu ya kumsaidia mwana wake. Martin alibatizwa akiwa na umri wa miaka 18. Baadaye, alihudhuria Shule ya Mazoezi ya Kihuduma na sasa anatumika akiwa painia wa pekee.

Hazina za Kiroho Kutoka Nchi Nyingine

Nchi ya Guinea huuza mali za asili katika nchi nyingine, lakini baadhi ya mali zake za kiroho zimetoka nchi nyingine. Watu wengi kutoka nchi za Afrika wamehamia nchini humo, hasa kwa sababu za kiuchumi. Wengine wamekimbilia nchi hiyo kwa sababu ya vita vya kikatili na vya muda mrefu.

Ernestine, kutoka Kamerun, alihamia Guinea miaka 12 iliyopita. Kwa miaka mingi alijifunza na Mashahidi wa Yehova na kuhudhuria mikutano lakini hakubatizwa. Macho yake yalilengwa-lengwa na machozi alipoona watu wakibatizwa kwenye kusanyiko la mzunguko la Mashahidi wa Yehova mwaka wa 2003. Akijihisi kuwa mwenye hatia sana, alisali hivi kwa Yehova: “Sasa nina umri wa miaka 51, nami sijakufanyia jambo lolote jema. Nataka kukutumikia.” Baadaye, Ernestine alitenda kupatana na sala yake ya unyenyekevu. Alimwambia mwanamume aliyeishi naye kwamba hawangeendelea kuishi pamoja bila kuhalalisha ndoa. Mwanamume huyo  alikubali, na baadaye Ernestine alibubujikwa na machozi ya shangwe alipobatizwa mnamo Novemba 2004.

Tangu mapema miaka ya 1990, maelfu ya wakimbizi kutoka Liberia na Sierra Leone, kutia ndani mamia ya watumishi wa Yehova, wamehamia Guinea. Mara tu wanapofika katika kambi ya wakimbizi, akina ndugu hupanga mikutano ya kawaida, kazi ya kuhubiri, na ujenzi wa Jumba la Ufalme. Watu fulani wamekuwa watumishi wa Yehova katika kambini za wakimbizi. Isaac ni mmoja wao. Baada ya kubatizwa, Isaac alipata nafasi ya kuajiriwa tena kazi katika kampuni fulani kubwa nchini Liberia. Badala ya kukubali kazi hiyo, aliamua kubaki katika kambi ya wakimbizi ya Lainé akiwa painia wa kawaida. Anasema hivi: “Sasa sihitaji kumwomba msimamizi fulani ruhusa ya kuhudhuria mikutano au kusanyiko. Niko huru kumtumikia Yehova.” Mnamo Desemba 2003, kusanyiko la wilaya lilifanywa kwa ajili ya Mashahidi 150 wanaoishi katika kambi hiyo iliyo mbali yenye wakimbizi 30,000. Inafurahisha kwamba watu 591 walihudhuria, kutia ndani viziwi 9 ambao walifuata programu katika lugha ya ishara. Watu kumi na wawili walibatizwa. Ndugu walithamini sana jitihada zilizofanywa ili kuwaandalia karamu ya kiroho.

“Vitu Vyenye Kutamanika” Vyafanya Mabadiliko

Wale wanaotafuta dhahabu na almasi hawawezi kuzuiliwa na kitu chochote. Inachangamsha moyo kuona wapya wakijitahidi kushinda vizuizi vyote ili wamtumikie Yehova. Kwa mfano, fikiria kisa cha Zainab.

Akiwa na umri wa miaka wa 13, Zainab alilazimishwa kuwa mtumwa angali mtoto. Alipelekwa Guinea kutoka nchi yao ambayo pia iko Afrika Magharibi. Akiwa na umri wa miaka 20, alisikia ujumbe wa Biblia. Alikuwa na hamu sana ya kufuata mambo aliyojifunza.

Ilikuwa vigumu sana kwa Zainab kuhudhuria mikutano ya Kikristo ili kuabudu. Lakini, Zainab alithamini sana mikutano naye aliazimia kutoikosa. (Waebrania 10:24, 25) Alikuwa akificha vitabu vyake nje ili avichukue akienda mikutanoni. Kwa sababu ya kuhudhuria mikutano hiyo ya kiroho, alipigwa vibaya sana mara kadhaa na wale “waliommiliki.”

Baadaye, hali zilibadilika, naye Zainab akaachiliwa huru. Mara moja alianza kuhudhuria mikutano yote, na hilo lilimsaidia kufanya maendeleo ya kiroho haraka. Alikataa kazi ya mshahara mnono ambayo ingemzuia kuhudhuria mikutano na kupokea mafundisho ya Kikristo. Alijiandikisha katika Shule ya Huduma ya Kitheokrasi, akawa mhubiri wa Ufalme ambaye hajabatizwa, na baadaye akaonyesha kwamba amejiweka wakfu kwa Yehova kwa kubatizwa katika maji. Bila kukawia, alianza utumishi wa upainia msaidizi. Miezi sita baadaye, aliomba kuwa painia wa kawaida.

Baada ya kuhudhuria mikutano michache, mtu fulani aliyependezwa alisema hivi: “Ninapokuwa hapa sijihisi kuwa maskini.” Ingawa watu wengi huvutiwa na mali za kimwili za Guinea, wale wanaompenda Yehova wanatafuta kwa bidii hazina za kiroho. Naam, “vitu vyenye kutamanika vya mataifa yote” vinakuja kwenye ibada safi ya Yehova leo!

[Sanduku katika ukurasa wa 8]

GUINEA-2005

Kilele cha Mashahidi: 883

Mafunzo ya Biblia: 1,710

Hudhurio la Ukumbusho: 3,255

[Ramani katika ukurasa wa 8]

(Ona mpangilio kamili katika nakala iliyochapishwa)

GUINEA

Conakry

SIERRA LEONE

LIBERIA

[Picha katika ukurasa wa 9]

Albert na Luc

[Picha katika ukurasa wa 9]

Jumba la Ufalme huko Conakry

[Picha katika ukurasa wa 10]

Ernestine

[Picha katika ukurasa wa 10]

Martin

[Picha katika ukurasa wa 10]

Zainab

[Hisani ya Picha katika ukurasa wa 8]

USAID