Krismasi Inaelekea Wapi?

MIAKA kumi iliyopita mwezi huuhuu, gazeti moja (U.S.News & World Report) lilikuwa na habari yenye kichwa “Kuitafuta Krismasi.” Makala hiyo ilichanganua ikiwa Krismasi inazidi kuwa sherehe “safi na isiyo ya kibiashara.” Je, hivyo ndivyo ilivyo?

Makala hiyo ilitoa sababu ambazo zinapasa kutuzuia tusikate kauli hiyo. Ilisema: “Hakuna rekodi rasmi ya maadhimisho ya kuzaliwa kwa Kristo kabla ya karne ya nne, wakati Konstantino . . . alipokuwa mtawala wa Roma.” Hilo linaonyesha “kwa kadiri fulani kwamba kwa kweli hakuna aliyejua wakati ambao Yesu alizaliwa.” Makala hiyo ilikubali kwamba vitabu vya “injili havitaji mwaka, mwezi, wala siku hususa.” Kulingana na mwanahistoria mmoja wa Chuo Kikuu cha Texas, “Wakristo wa mapema zaidi hawakuhangaikia kamwe maadhimisho ya Kuzaliwa kwa Kristo.”

Chini ya kichwa kidogo “Jambo la Kukisiwa,” makala hiyo ilizungumzia “jinsi kanisa lilivyochagua Desemba (Mwezi wa 12) 25.” Ilikubali hivi: “Watu wengi wanasadiki kwamba sikukuu hiyo ilianzishwa kimakusudi ili kufanya siku ya Satanalia na sikukuu nyingine za kipagani ‘ziwe za Kikristo.’” “Kwa kuchagua mwishoni mwa Desemba, wakati ambao watu wamezoea kufanya sherehe, kuwa wakati wa kuadhimisha Krismasi, viongozi wa kanisa walifaulu kuwafanya watu wengi sana waadhimishe kuzaliwa kwa Mwokozi.” Katikati ya karne ya 19, kununua na kutoa zawadi kulianza kutiliwa mkazo. “Desturi ya Krismasi ya kutoa zawadi ikatokeza chanzo kikubwa sana cha utajiri, nao wafanyabiashara na watangazaji wa biashara wakaanza kutangaza majira hayo.”

Hivyo, hatuna sababu yoyote ya kutarajia kwamba Krismasi itabadilika na kuelekea kwenye Ukristo wa kweli. Ingawa leo sherehe ya Krismasi inahusisha sana mazoea ya “biashara yenye kupita kiasi,” ukweli ni kwamba Wakristo wa kweli hawajawahi kutarajia kusherehekea kuzaliwa kwa Yesu. Badala yake, Biblia inakazia fidia ambayo Kristo alitoa alipokufa, akafufuliwa, na kwenda mbinguni. (Mathayo 20:28) Hilo ni jambo litakaloendelea kuwa muhimu nyakati zote.