“Siku Kuu ya Yehova Iko Karibu”

“Ile siku kuu ya Yehova iko karibu. Iko karibu, nayo inaharakisha sana.”—SEFANIA 1:14.

1, 2. (a) Wakristo wanangojea siku gani ya pekee? (b) Tunapaswa kujiuliza maswali gani, na kwa nini?

MWANAMKE kijana mwenye furaha anangojea kwa hamu siku yake ya arusi. Mama mwenye mimba anatazamia kwa upendo kupata mtoto. Mfanyakazi ambaye amechoka anatamani sana siku za kupumzika ambazo amekuwa akingojea kwa muda mrefu. Watu hao wanalingana kwa njia gani? Wote wanangojea siku ya pekee, siku ambayo ni ya maana sana maishani mwao. Wote wana hisia za ndani lakini zinatofautiana kabisa. Mwishowe, siku ambayo wanangojea itafika, na itakapofika, wanatumaini kwamba watakuwa tayari kwa ajili ya siku hiyo.

² Vivyo hivyo, Wakristo wa kweli leo wanangojea kwa hamu kufika kwa siku fulani ya pekee. Ni “siku ya Yehova” iliyo kuu. (Isaya 13:9; Yoeli 2:1; 2 Petro 3:12) ‘Siku hiyo ya Yehova’ ambayo inakuja ni siku gani, nayo itakuwa na matokeo gani kwa wanadamu itakapofika? Zaidi ya hayo, tunaweza kufanya nini ili kuhakikisha kwamba tuko tayari siku hiyo inapofika? Ni lazima tutafute majibu ya maswali hayo sasa kwa sababu uthibitisho unaonyesha ukweli wa maneno haya ya Biblia: “Ile siku kuu ya Yehova iko karibu. Iko karibu, nayo inaharakisha sana.” —Sefania 1:14.

“Siku Kuu ya Yehova”

3. “Siku kuu ya Yehova” ni nini?

³ “Siku kuu ya Yehova” ni nini? Katika Maandiko maneno “siku ya Yehova” yanamaanisha nyakati za pekee ambazo Yehova alitekeleza hukumu juu ya maadui wake na kulitukuza jina lake kuu. Watu wasio waaminifu huko Yuda na Yerusalemu na pia wakaaji wenye uonevu wa Babiloni na Misri wote walikabili ‘siku za Yehova’ walipohukumiwa na Yehova. (Isaya 2:1, 10-12; 13:1-6; Yeremia 46:7-10) Hata hivyo, ‘siku kuu zaidi ya Yehova’ bado iko mbele. Ni “siku” ambayo Yehova atawahukumu wale ambao wamelichafua jina lake. Siku hiyo itaanza na uharibifu wa “Babiloni Mkubwa,” milki ya ulimwengu ya dini ya uwongo, na itafikia mwisho wake kwenye vita vya Har–Magedoni, wakati ambapo mfumo mbovu wa mambo unaobaki utakapoharibiwa.—Ufunuo 16:14, 16; 17:5, 15-17; 19:11-21.

4. Kwa nini wanadamu wengi wanapaswa kuiogopa siku ya Yehova inayokaribia haraka?

⁴ Iwe tunatambua au hatutambui, wanadamu wengi wanapaswa kuiogopa siku hiyo inayokaribia haraka. Kwa nini? Kupitia nabii Sefania, Yehova anajibu hivi: “Siku hiyo ni siku ya ghadhabu, siku ya taabu na ya maumivu makali, siku ya dhoruba na ya ukiwa, siku ya giza na ya weusi, siku ya mawingu na ya weusi mzito.” Hiyo ni siku yenye kuogopesha kwelikweli! Kwa kuongezea, nabii huyo anasema: “Nitawataabisha wanadamu . . . kwa sababu wamemtendea Yehova dhambi.”—Sefania 1:15, 17.

5. Mamilioni ya watu wana maoni gani mazuri kuhusu siku ya Yehova, na kwa nini?

⁵ Lakini, mamilioni ya wanadamu wengine wanangojea kwa hamu kuja kwa siku ya Yehova. Kwa nini? Wanajua kwamba itamaanisha wokovu na ukombozi kwa watu waadilifu. Ni siku ambayo Yehova mwenyewe atatukuzwa  na jina lake tukufu kutakaswa. (Yoeli 3:16, 17; Sefania 3:12-17) Kuiogopa au kuitazamia kwa hamu siku hiyo kunategemea sana jinsi watu wanavyoishi sasa. Una maoni gani kuhusu kukaribia kwa siku hiyo? Je, uko tayari kwa ajili ya siku hiyo? Je, unaonyesha katika maisha yako ya kila siku kwamba unaamini siku ya Yehova iko karibu?

“Watakuja Wadhihaki na Dhihaka Zao”

6. Watu wengi wana maoni gani kuhusu “siku ya Yehova,” na kwa nini Wakristo wa kweli hawashangazwi na jambo hilo?

⁶ Ingawa “siku ya Yehova” inakaribia haraka, wanadamu wengi duniani wanaipuuza siku hiyo. Wanawadhihaki na kuwadharau wale wanaowaonya kuhusu kukaribia kwa siku hiyo. Wakristo wa kweli hawashangazwi na jambo hilo. Wanakumbuka onyo hili ambalo liliandikwa na mtume Petro: “Mnajua hili kwanza, kwamba katika siku za mwisho watakuja wadhihaki na dhihaka zao, wakiendelea kulingana na tamaa zao wenyewe na kusema: ‘Huku kuwapo kwake kulikoahidiwa kuko wapi? Kwani, tangu siku mababu zetu walipolala katika kifo, mambo yote yanaendelea sawasawa kama tangu mwanzo wa uumbaji.’”—2 Petro 3:3, 4.

7. Ni nini kitakachotusaidia kudumisha mtazamo wa uharaka?

⁷ Ni nini kitakachotusaidia kukataa maoni hayo yasiyofaa na hivyo kudumisha mtazamo wa uharaka? Petro anatuambia hivi: “Ninaamsha uwezo wenu mzuri wa kufikiri kwa njia ya kikumbusho, ili mkumbuke maneno yaliyosemwa hapo zamani na manabii watakatifu na amri ya Bwana na Mwokozi kupitia mitume wenu.” (2 Petro 3:1, 2) Kutii maonyo ya kinabii kutatusaidia ‘kuamsha uwezo wetu mzuri wa kufikiri.’ Pengine tumesikia vikumbusho hivyo mara nyingi, lakini ni jambo la maana sana sasa kuliko wakati mwingine wowote tuendelee kutii maonyo hayo.—Isaya 34:1-4; Luka 21:34-36.

8. Kwa nini watu wengi wanapuuza vikumbusho vya Biblia?

⁸ Kwa nini watu fulani wanapuuza vikumbusho hivyo? Petro anaendelea kusema: “Kulingana na kupenda kwao, wao hawalioni jambo hili, kwamba mbingu zilikuwapo tangu zamani za kale na dunia ikisimama imara kutoka katika maji na katikati ya maji kwa neno la Mungu; na kwa njia hizo ulimwengu wa wakati huo uliangamia kwa gharika ya maji.” (2 Petro 3:5, 6) Ndiyo, kuna wale ambao hawapendi siku ya Yehova ifike. Hawataki maisha yao yavurugwe. Hawataki kutozwa hesabu na Yehova kwa sababu ya maisha yao ya uchoyo! Kama Petro anavyosema, wanaishi “kulingana na tamaa zao wenyewe.”

9. Watu wa siku za Noa na za Loti walikuwa na mtazamo gani?

⁹ Kwa sababu ya “kupenda kwao,” wadhihaki hao wameamua kupuuza kwamba wakati uliopita Yehova aliwahi kuingilia shughuli za wanadamu. Yesu Kristo na mtume Petro wanataja matukio mawili kati ya hayo, yaani, “siku za Noa” na “siku za Loti.” (Luka 17:26-30; 2 Petro 2:5-9) Kabla ya Gharika, watu walipuuza onyo ambalo Noa alitoa. Vivyo hivyo, kabla ya kuharibiwa kwa Sodoma na Gomora, machoni pa wana-wakwe zake, Loti  “alionekana kama mtu aliyekuwa anafanya mzaha.”—Mwanzo 19:14.

10. Yehova anasema nini kuhusu watu wasiojali?

¹⁰ Hali si tofauti leo. Hata hivyo, ona jinsi Yehova anavyosema kuhusu wale wasiojali: “Nitakaza fikira kwa watu wanaoganda juu ya machicha yao, wanaosema moyoni mwao, ‘Yehova hatatenda mema, wala hatatenda mabaya.’ Na mali yao itakuwa ya kunyakuliwa na nyumba zao zitakuwa mahame yenye ukiwa. Nao watajenga nyumba, lakini hawatakaa humo; nao watapanda mashamba ya mizabibu, lakini hawatakunywa divai yake.” (Sefania 1:12, 13) Watu wanaweza kuendelea tu na shughuli zao za “kawaida,” lakini kazi yao ngumu haitawaletea faida yoyote ya kudumu. Kwa nini? Kwa sababu siku ya Yehova itafika ghafula, na vitu vyovyote vya kimwili ambavyo huenda wamekusanya havitawaokoa.—Sefania 1:18.

‘Endelea Kuitarajia’

11. Tunapaswa kukumbuka himizo gani?

¹¹ Tofauti na ulimwengu mbovu tunamoishi, tunapaswa kukumbuka himizo hili lililoandikwa na nabii Habakuki: “Maono hayo bado ni ya wakati uliowekwa, nayo yanafanya haraka kuelekea mwisho, wala hayatasema uwongo. Hata yakikawia, endelea kuyatarajia; kwa maana bila shaka yatatimia. Hayatachelewa.” (Habakuki 2:3) Hata ikionekana kwamba siku hiyo inachelewa kulingana na maoni yetu yasiyo makamilifu, tunapaswa kukumbuka kwamba Yehova hakawii. Siku yake itakuja wakati kamili, saa ambayo wanadamu hawatazamii.—Marko 13:33; 2 Petro 3:9, 10.

12. Yesu alionya juu ya jambo gani, na hilo linatofautiana namna gani na matendo ya wafuasi waaminifu wa Yesu?

¹² Akikazia umuhimu wa kuendelea kuingojea siku ya Yehova, Yesu alionya kwamba hata wengine kati ya wafuasi wake wangepoteza mtazamo wao wa uharaka. Alitabiri hivi kuwahusu: “Mtumwa huyo mwovu akisema moyoni mwake, ‘Bwana wangu anakawia,’ naye aanze kuwapiga watumwa wenzake na kula na kunywa pamoja na walevi wa kupindukia, bwana wa mtumwa huyo atakuja katika siku ambayo hatazamii na katika saa ambayo hajui, naye atamwadhibu kwa ukali mkubwa zaidi.” (Mathayo 24:48-51) Tofauti na mtumwa huyo, jamii ya mtumwa mwaminifu na mwenye busara inaendelea kudumisha kwa ushikamanifu mtazamo wa uharaka. Jamii ya mtumwa imeendelea kukesha na kuwa tayari. Yesu ameweka rasmi jamii hiyo “juu ya mali zake zote” hapa duniani.—Mathayo 24:42-47.

Uhitaji wa Uharaka

13. Yesu alikazia namna gani uhitaji wa kuwa na mtazamo wa uharaka?

¹³ Ilikuwa lazima Wakristo wa karne ya kwanza wadumishe mtazamo wa uharaka. Walihitaji kuchukua mara moja hatua ya kukimbia kutoka Yerusalemu walipoona jiji hilo “limezingirwa na majeshi yaliyopiga kambi.” (Luka 21:20, 21) Hilo lilitukia mwaka wa 66 W.K. Ona jinsi Yesu alivyokazia uhitaji wa Wakristo kuchukua hatua ya haraka wakati huo: “Mtu aliye juu ya paa ya nyumba asishuke kuchukua mali kutoka katika nyumba yake; na mtu aliye  shambani asirudi nyumbani kuchukua vazi lake la nje.” (Mathayo 24:17, 18) Kwa kuwa historia inaonyesha kwamba jiji la Yerusalemu liliendelea kuwapo kwa miaka minne zaidi, kwa nini Wakristo walihitaji kutii haraka maneno ya Yesu katika mwaka wa 66 W.K.?

14, 15. Kwa nini ilikuwa lazima kwa Wakristo wa karne ya kwanza kuchukua hatua bila kukawia walipoona Yerusalemu limezingirwa na majeshi?

¹⁴ Jeshi la Roma halikuharibu Yerusalemu hadi mwaka wa 70 W.K. Hata hivyo, miaka minne iliyotangulia haikuwa na amani. Kulikuwa na mchafuko mwingi sana! Miaka hiyo ilikuwa yenye kujaa jeuri na umwagaji damu. Mwanahistoria mmoja anasema kwamba wakati huo jiji la Yerusalemu lilikuwa na “vita vya wenyewe kwa wenyewe vyenye umwagaji mkubwa wa damu. Vita hivyo vilihusisha matendo ya ukatili yenye kutisha.” Vijana waliandikishwa katika jeshi ili kuimarisha ngome, kubeba silaha, na kupigana. Walifanya mazoezi ya kijeshi kila siku. Wale ambao hawakuunga mkono hatua kali zilizochukuliwa, walionwa kuwa wasaliti. Kama Wakristo wangesitasita kuondoka jijini wangejikuta katika hali hatari sana.—Mathayo 26:52; Marko 12:17.

¹⁵ Tunapaswa kukumbuka kwamba Yesu alisema kuwa “wale walio katika Yudea,” si Yerusalemu tu, walipaswa kuanza kukimbia. Hilo lilikuwa muhimu kwa sababu miezi michache tu baada ya wao kuondoka Yerusalemu, majeshi ya Roma yalianza tena kujitayarisha kwa ajili ya vita. Kwanza, mji wa Galilaya ulishindwa mwaka wa 67 W.K., kisha mji wa Yudea ukashindwa hatua kwa hatua mwaka uliofuata. Hilo lilisababisha mateso makubwa katika maeneo yote ya mashambani. Pia, ilizidi kuwa vigumu kwa Myahudi yeyote kukimbia kutoka Yerusalemu. Malango ya jiji yalilindwa, na yeyote aliyejaribu kukimbia alionwa kuwa amewaacha Wayahudi na kujiunga na Waroma.

16. Wakristo wa karne ya kwanza walipaswa kuwa na mtazamo gani ili waokoke wakati huo wa taabu?

¹⁶ Tukifikiria mambo yote hayo, tunaweza kuelewa ni kwa nini Yesu alikazia uhitaji wa kuchukua hatua haraka. Wakristo walipaswa kuwa tayari kuacha kila kitu, bila kuruhusu vitu vya kimwili viwakengeushe. Ili watii onyo la Yesu, walipaswa kuwa tayari ‘kuaga mali zao zote.’ (Luka 14:33) Wale waliotii bila kukawia na kukimbilia upande wa pili wa Yordani waliokolewa.

Kudumisha Mtazamo Wetu wa Uharaka

17. Kwa nini tunapaswa kuimarisha mtazamo wetu wa uharaka?

¹⁷ Unabii mbalimbali wa Biblia unafunua waziwazi kwamba tunaishi mwishoni mwa  siku za mwisho. Kuliko wakati mwingine wowote, tunahitaji kuimarisha mtazamo wetu wa uharaka. Wakati wa amani, askari hana wasiwasi kuhusu hatari ya vita. Hata hivyo, asipokuwa na mtazamo wa uharaka na kukaa macho, inaelekea hatakuwa tayari na anaweza kupoteza uhai wake akiitwa ghafula kwenda vitani. Ndivyo ilivyo kwa upande wa kiroho. Tukiruhusu mtazamo wetu wa uharaka ufifie, huenda tusiwe tayari kushinda mashambulizi tunayokabili na labda hatutakuwa tayari siku ya Yehova itakapokuja. (Luka 21:36; 1 Wathesalonike 5:4) Ikiwa kuna yeyote ambaye ‘amerudi nyuma asimfuate Yehova,’ huu ndio wakati wa kumtafuta Yehova tena.—Sefania 1:3-6; 2 Wathesalonike 1:8, 9.

18, 19. Ni nini kitakachotusaidia kuweka karibu akilini “kuwapo kwa siku ya Yehova”?

¹⁸ Haishangazi kwamba mtume Petro anatuhimiza tuweke karibu akilini “kuwapo kwa siku ya Yehova”! Tunaweza kufanya hivyo jinsi gani? Njia moja ni kutenda “matendo matakatifu ya mwenendo na vitendo vya ujitoaji-kimungu.” (2 Petro 3:11, 12) Kujishughulisha sana na matendo hayo kutatusaidia kutazamia kwa hamu kuja kwa “siku ya Yehova.” Neno la Kigiriki linalotafsiriwa “kuweka karibu akilini” linamaanisha kihalisi “kuharakisha.” Kwa kweli, hatuwezi kuharakisha wakati uliobaki wa kuja kwa siku ya Yehova. Lakini, tunapongojea siku hiyo, tutaona kwamba wakati unapita haraka ikiwa tuna mengi ya kufanya katika utumishi wa Mungu.—1 Wakorintho 15:58.

¹⁹ Kutafakari kuhusu Neno la Mungu na vikumbusho vilivyomo, kutatuwezesha pia “kuitamani kwa hamu (kutazamia na kuharakisha) kuja” kwa siku hiyo, ndiyo, “kuingojea kila wakati.” (2 Petro 3:12, The Amplified Bible; The New Testament, ya William Barclay) Vikumbusho hivyo vinatia ndani unabii mwingi ambao unatabiri si kuja tu kwa siku ya Yehova, bali pia baraka nyingi ambazo wale ‘wanaoendelea kumtarajia Yehova’ watapata.—Sefania 3:8.

20. Ni himizo gani tunalopaswa kutia moyoni?

²⁰ Huu ndio wakati ambao sisi sote tunapaswa kutia moyoni himizo ambalo lilitolewa kupitia nabii Sefania: “Kabla haijawajilia hasira inayowaka ya Yehova, kabla haijawajilia siku ya hasira ya Yehova, mtafuteni Yehova, ninyi nyote mlio wapole wa dunia, ambao mmetenda uamuzi Wake wa hukumu. Utafuteni uadilifu, utafuteni upole. Huenda mkafichwa katika siku ya hasira ya Yehova.”—Sefania 2:2, 3.

21. Watu wa Mungu wataazimia nini mwaka wa 2007?

²¹ Kwa hiyo basi, andiko lililochaguliwa la mwaka wa 2007 linafaa sana: “Siku kuu ya Yehova iko karibu.” Watu wa Mungu wana hakika kwamba “iko karibu, nayo inaharakisha sana.” (Sefania 1:14) ‘Haitachelewa.’ (Habakuki 2:3) Kwa hiyo, tunapongojea siku hiyo, acheni sikuzote tuwe macho kuhusiana na nyakati tunamoishi, tukitambua kwamba utimizo wa mwisho wa unabii huo uko karibu!

Je, Unaweza Kujibu?

• “Siku kuu ya Yehova” ni nini?

• Kwa nini watu wengi wanapuuza uharaka wa nyakati?

• Kwa nini Wakristo wa karne ya kwanza walihitaji kuwa na mtazamo wa uharaka?

• Tunaweza kuimarisha namna gani mtazamo wetu wa uharaka?

[Maswali ya Funzo]

[Blabu katika ukurasa wa 19]

Andiko la mwaka wa 2007 litakuwa: “Siku kuu ya Yehova iko karibu.”—Sefania 1:14.

[Picha katika ukurasa wa 16, 17]

Kama ilivyokuwa siku za Noa, wadhihaki watashtuka Yehova atakapotenda

[Picha katika ukurasa wa 18]

Wakristo walipaswa kuchukua hatua bila kukawia walipoona Yerusalemu “limezingirwa na majeshi yaliyopiga kambi”