Yehova ‘Atasababisha Haki Ifanywe’
Yehova ‘Atasababisha Haki Ifanywe’
“Je, Mungu hatasababisha haki ifanywe kwa ajili ya watu wake waliochaguliwa ambao wanampaazia sauti mchana na usiku?”—LUKA 18:7.
1. Ni nani wanaokutia moyo, na kwa nini?
ULIMWENGUNI pote, Mashahidi wa Yehova wanafurahia kushirikiana na ndugu na dada Wakristo ambao wamemtumikia Yehova kwa miaka mingi. Je, unawajua kibinafsi wapendwa fulani kati ya hao? Pengine unamfikiria dada mzee ambaye alibatizwa miaka mingi iliyopita na ambaye kwa kawaida hakosi kuhudhuria mikutano kwenye Jumba la Ufalme. Au labda unamfikiria ndugu aliyezeeka ambaye kila juma anaunga mkono kwa ushikamanifu mpango wa kutaniko wa huduma ya shambani, na amekuwa akifanya hivyo kwa miaka mingi. Ni kweli kwamba wengi kati ya waaminifu hao walifikiri kwamba kufikia sasa vita vya Har–Magedoni vingekuwa vimepiganwa. Hata hivyo, uhakika wa kwamba ulimwengu huu usio na haki bado upo haujadhoofisha uhakika wao katika ahadi za Yehova wala azimio lao la ‘kuvumilia mpaka mwisho.’ (Mathayo 24:13) Imani yenye nguvu inayoonyeshwa na watumishi hao washikamanifu wa Yehova kwa kweli inatia moyo kutaniko zima.—Zaburi 147:11.
2. Ni hali gani inayotusikitisha?
2 Hata hivyo, nyakati nyingine, huenda tukaona jambo tofauti na hilo. Mashahidi wengine walishiriki katika huduma kwa miaka mingi, lakini baada ya muda imani yao katika Yehova ikadhoofika, nao wakaacha kushirikiana na kutaniko la Kikristo. Tunasikitika kwamba Wakristo hao wamemwacha Yehova, na tunatamani sana kuendelea kumsaidia kila “kondoo aliyepotea” arudi kundini. (Zaburi 119:176; Waroma 15:1) Hata hivyo, tofauti hiyo, kwamba Wakristo fulani wanabaki waaminifu huku wengine wakipoteza imani, inatokeza maswali. Ni nini kinachowasaidia Mashahidi wengi kudumisha imani yao katika ahadi za Yehova huku wengine wakiipoteza? Sisi binafsi tunaweza kufanya nini ili kuhakikisha kwamba tunaendelea kuwa na usadikisho imara kuwa “siku kuu ya Yehova” inakaribia? (Sefania 1:14) Acheni tuchunguze mfano unaopatikana katika Injili ya Luka.
Onyo kwa Wale Wanaoishi Wakati ‘Mwana wa Binadamu Anapofika’
3. Ni nani hasa wanaoweza kufaidika na mfano wa mjane na mwamuzi, na kwa nini?
3 Katika Luka sura ya 18, tunapata mfano wa Yesu kuhusu mjane na mwamuzi. Mfano huo unafanana na mfano wa mkaribishaji asiyeacha kuomba ambao tulizungumzia katika makala iliyotangulia. (Luka 11:5-13) Hata hivyo, mistari mingine katika sura hiyo ya Biblia inayozungumzia mfano wa mjane na mwamuzi inaonyesha kwamba mfano huo unahusu hasa wale wanaoishi wakati ‘Mwana wa binadamu anapofika’ katika mamlaka ya Ufalme, kipindi ambacho kilianza mwaka wa 1914.—Luka 18:8. *
4. Yesu alizungumzia nini kabla ya kutoa mfano ulio katika Luka sura ya 18?
4 Kabla ya kutoa mfano huo, Yesu alisema kwamba uthibitisho wa kuwapo kwake katika mamlaka ya Ufalme ungeonekana kotekote “kama vile umeme” ambao “hung’aa kutoka sehemu moja chini ya mbingu mpaka sehemu nyingine chini ya mbingu.” (Luka 17:24; 21:10, 29-33) Hata hivyo, watu wengi wanaoishi “wakati wa mwisho” hawangetilia maanani uthibitisho huo ulio wazi. (Danieli 12:4) Kwa nini? Kwa sababu ileile iliyofanya watu wa siku za Noa na za Loti wapuuze maonyo ya Yehova. Siku hizo, watu ‘walikuwa wakila, wakinywa, wakinunua, wakiuza, wakipanda, na kujenga mpaka siku walipoharibiwa.’ (Luka 17:26-29) Walikufa kwa sababu walijishughulisha sana na mambo hayo ya kawaida hivi kwamba hawakufanya mapenzi ya Mungu. (Mathayo 24:39) Leo, watu kwa ujumla wanajishughulisha sana na mambo ya kila siku hivi kwamba hawaoni uthibitisho unaoonyesha kuwa mwisho wa ulimwengu huu usiomwogopa Mungu unakaribia.—Luka 17:30.
5. (a) Yesu aliwaonya nani hasa, na kwa nini? (b) Ni nini kimewafanya wengine wapoteze imani yao?
5 Kwa wazi, Yesu aliwahangaikia wafuasi wake kwa kuwa alijua kwamba wao pia wangeweza kukengeushwa na ulimwengu wa Shetani, kiasi cha kuweza ‘kurudia vitu vilivyo nyuma.’ (Luka 17:22, 31) Na, kwa kweli, hali hiyo imewapata Wakristo fulani. Kwa miaka mingi Wakristo hao walitazamia sana siku ambayo Yehova angekomesha ulimwengu huu mbovu. Hata hivyo, Har–Magedoni ilipokosa kufika wakati waliotazamia, walivunjika moyo. Uhakika wao kwamba siku ya Yehova ya hukumu iko karibu ulidhoofika. Walipunguza bidii yao katika huduma, na pole kwa pole, wakajiingiza sana katika shughuli za kila siku za maisha hivi kwamba hawakuwa na wakati wa kutosha wa kufanya mambo ya kiroho. (Luka 8:11, 13, 14) Baada ya muda, ‘walirudia vitu vilivyo nyuma.’ Inahuzunisha kama nini!
Uhitaji wa “Kusali Sikuzote”
6-8. (a) Simulia mfano wa mjane na mwamuzi. (b) Yesu alisema nini kuhusu maana ya mfano huo?
6 Tunaweza kufanya nini ili kuhakikisha kwamba uhakika wetu imara katika utimizo wa ahadi za Yehova haudhoofiki? (Waebrania 3:14) Yesu alizungumza kuhusu swali hilo baada tu ya kuwaonya wanafunzi wake wasirudi nyuma kwenye ulimwengu mbovu wa Shetani.
7 Luka anaandika kwamba Yesu ‘aliendelea kuwaambia mfano juu ya uhitaji wao wa kusali sikuzote bila kukata tamaa.’ Yesu alisema: “Katika jiji fulani kulikuwako mwamuzi fulani ambaye hakuwa akimwogopa Mungu wala hakuwa na heshima kwa mwanadamu. Lakini kulikuwako mjane katika jiji hilo naye akawa akimwendea, akisema, ‘Hakikisha kwamba nitapata haki kutoka kwa mshitaki wangu.’ Basi, kwa muda fulani alikuwa hana nia, lakini baadaye akasema moyoni mwake, ‘Ijapokuwa mimi simwogopi Mungu wala simheshimu mwanadamu, hakika, kwa sababu ya kuendelea kwa mjane huyu kunisumbua, nitahakikisha kwamba atapata haki, ili asiendelee kuja kunishambulia mpaka animalize.’”
8 Baada ya kutoa mfano huo, Yesu alieleza maana yake: “Sikieni lile ambalo mwamuzi huyo, ijapokuwa si mwadilifu, alisema! Basi, kwa hakika je, Mungu hatasababisha haki ifanywe kwa ajili ya watu wake waliochaguliwa ambao wanampaazia sauti mchana na usiku, hata ingawa ana ustahimilivu kwao? Ninawaambia ninyi, Yeye atasababisha watendewe haki upesi. Hata hivyo, Mwana wa binadamu atakapofika, je, kwa kweli ataipata imani duniani?”—Luka 18:1-8.
“Hakikisha Kwamba Nitapata Haki”
9. Ni jambo gani kuu linalokaziwa katika mfano wa mjane na mwamuzi?
9 Jambo kuu katika mfano huo liko wazi kabisa. Linatajwa na wale wanaohusika katika mfano huo na Yesu pia. Mjane alisihi hivi: “Hakikisha kwamba nitapata haki.” Mwamuzi huyo akasema: “Nitahakikisha kwamba atapata haki.” Yesu akauliza: “Je, Mungu hatasababisha haki ifanywe?” Na kumhusu Yehova, Yesu alisema hivi: “Yeye atasababisha watendewe haki upesi.” (Luka 18:3, 5, 7, 8) Ni wakati gani hasa Mungu ‘atasababisha haki ifanywe’?
10. (a) Haki ilifanywa wakati gani katika karne ya kwanza? (b) Haki itafanywa kwa ajili ya watu wa Mungu wakati gani na jinsi gani?
10 Katika karne ya kwanza, “siku za kupatiliza haki” (au “siku za kisasi,” Kingdom Interlinear) zilifika mwaka wa 70 W.K., Yerusalemu na hekalu lake lilipoharibiwa. (Luka 21:22) Kwa watu wa Mungu leo, haki itafanywa katika “ile siku kuu ya Yehova.” (Sefania 1:14; Mathayo 24:21) Wakati huo, Yehova ‘atawalipa dhiki wale wanaowafanyia dhiki’ watu wake, “[Yesu Kristo] anapoleta kisasi juu ya wale wasiomjua Mungu na wale wasiotii habari njema juu ya Bwana wetu Yesu.”—2 Wathesalonike 1:6-8; Waroma 12:19.
11. Haki itafanywa “upesi” kwa njia gani?
11 Lakini, tunapaswa kuelewa namna gani uhakikisho wa Yesu wa kwamba Yehova atasababisha haki ifanywe “upesi”? Neno la Mungu linaonyesha kwamba “hata ingawa [Yehova] ana ustahimilivu,” atatekeleza haki upesi wakati unaofaa utakapofika. (Luka 18:7, 8; 2 Petro 3:9, 10) Katika siku za Noa, Gharika ilipofika, waovu waliharibiwa bila kukawia. Vivyo hivyo, katika siku za Loti, moto uliposhuka kutoka mbinguni, waovu waliangamia. Yesu alisema: “Itakuwa vivyo hivyo siku ile ambayo Mwana wa binadamu atafunuliwa.” (Luka 17:27-30) Kwa mara nyingine tena, waovu watapatwa na “uharibifu wa ghafula.” (1 Wathesalonike 5:2, 3) Kwa kweli, tunaweza kuwa na uhakika kamili kwamba Yehova hataruhusu ulimwengu wa Shetani uendelee siku moja zaidi kuliko haki inavyodai.
“Atasababisha Watendewe Haki”
12, 13. (a) Mfano wa Yesu wa mjane na mwamuzi unatufundisha somo jinsi gani? (b) Kwa nini tunaweza kuwa na uhakika kwamba Yehova atasikiliza sala zetu na kusababisha haki ifanywe?
12 Mfano wa Yesu wa mjane na mwamuzi unakazia kweli nyingine muhimu. Yesu alieleza maana ya mfano huo kwa kusema hivi: “Sikieni lile ambalo mwamuzi huyo, ijapokuwa si mwadilifu, alisema! Basi, kwa hakika je, Mungu hatasababisha haki ifanywe kwa ajili ya watu wake waliochaguliwa?” Bila shaka, Yesu hakuwa akimlinganisha Yehova na mwamuzi huyo kana kwamba Mungu angewatendea hivyo wale wanaomwamini. Badala yake, Yesu aliwafundisha wafuasi wake jambo fulani kumhusu Yehova kwa kukazia tofauti kati ya mwamuzi huyo na Mungu. Yehova na mwamuzi huyo wanatofautiana katika njia gani?
13 Mwamuzi katika mfano wa Yesu “si mwadilifu,” lakini “Mungu ni Mwamuzi mwadilifu.” (Zaburi 7:11; 33:5) Mwamuzi huyo hakumjali mjane huyo kibinafsi, lakini Yehova anamjali kila mtu mmoja-mmoja. (2 Mambo ya Nyakati 6:29, 30) Mwamuzi hakuwa na nia ya kumsaidia yule mjane, lakini Yehova ana nia, ndiyo, anataka sana kuwasaidia wale ambao wanamtumikia. (Isaya 30:18, 19) Tunajifunza nini? Ikiwa mwamuzi asiye mwadilifu alisikiliza maombi ya mjane na kumfanyia haki, je, Yehova hatasikiliza hata zaidi sala za watu wake na bila shaka kusababisha haki ifanywe kwa ajili yao?—Methali 15:29.
14. Kwa nini hatupaswi kuacha kuamini kuja kwa siku ya Mungu ya hukumu?
14 Kwa hiyo, wale wanaoacha kuamini kuja kwa siku ya Mungu ya hukumu wanafanya kosa zito sana. Kwa nini? Kwa kuacha imani yao thabiti ya kwamba “siku kuu ya Yehova” imekaribia, wanatilia shaka uwezo wa Yehova wa kutimiza ahadi zake kwa uaminifu. Lakini hakuna mtu aliye na haki ya kutilia shaka uaminifu wa Mungu. (Ayubu 9:12) Swali linalofaa ni, Je, sisi binafsi tutaendelea kuwa waaminifu? Na hilo hasa ndilo jambo ambalo Yesu alikazia mwishoni mwa mfano wake wa mjane na mwamuzi.
“Je, kwa Kweli Ataipata Imani [Hii] Duniani?”
15. (a) Ni swali gani ambalo Yesu aliuliza, na kwa nini? (b) Tunapaswa kujiuliza swali gani?
15 Yesu aliuliza swali hili lenye kuamsha fikira: “Mwana wa binadamu atakapofika, je, kwa kweli ataipata imani [hii] duniani?” (Luka 18:8) Maneno ‘imani hii,’ yanaonyesha kwamba Yesu hakuwa akizungumzia imani kwa ujumla, lakini imani fulani hususa, yaani, imani kama ya yule mjane. Yesu hakujibu swali lake. Aliuliza swali hilo ili kuwafanya wanafunzi wake wafikirie jinsi imani yao wenyewe ilivyo. Je, ilikuwa ikidhoofika pole kwa pole hivi kwamba walikuwa katika hatari ya kurudia vitu walivyoacha nyuma? Au je, walikuwa na imani kama ile iliyoonyeshwa na mjane? Leo, sisi pia tunapaswa kujiuliza, ‘“Mwana wa binadamu” anapata imani ya aina gani moyoni mwangu?’
16. Yule mjane alikuwa na imani ya aina gani?
16 Ili tuwe kati ya wale ambao watafanyiwa haki na Yehova, tunapaswa kufuata mfano wa yule mjane. Alikuwa na imani ya aina gani? Alionyesha imani yake kwa kuendelea ‘kumwendea mwamuzi huyo, akisema, “Hakikisha kwamba nitapata haki.”’ Mjane huyo aliendelea kufanya hivyo ili afanyiwe haki na mwanadamu asiye mwadilifu. Vivyo hivyo, watumishi wa Mungu leo wanaweza kuwa na uhakika kwamba watafanyiwa haki na Yehova hata ikichukua muda mrefu kuliko walivyotazamia. Zaidi ya hayo, wanaonyesha uhakika wao katika ahadi za Mungu kwa kuendelea kusali, ndiyo, kwa ‘kupaaza sauti kwa Yehova mchana na usiku.’ (Luka 18:7) Kwa kweli, ikiwa Mkristo angeacha kusali ili haki ifanywe, angeonyesha kwamba ameacha kuwa na uhakika wa kwamba Yehova atatenda kwa ajili ya watumishi wake.
17. Tuna sababu gani za kudumu katika sala na kuendelea kuamini kwamba siku ya Yehova ya hukumu itakuja hakika?
17 Hali za pekee za mjane huyo zinatuonyesha kwamba tuna sababu nyingine za kudumu katika sala. Fikiria tofauti fulani kati ya hali zake na zetu. Mjane huyo aliendelea kumwendea mwamuzi hata ingawa hakuna mtu aliyemtia moyo kufanya hivyo. Lakini Neno la Mungu linatutia moyo sana ‘tudumu katika sala.’ (Waroma 12:12) Mjane huyo hakuwa na uhakikisho wowote kwamba maombi yake yangetimizwa, lakini Yehova ametuhakikishia kwamba haki itafanywa. Kupitia nabii wake, Yehova alisema hivi: “Hata yakikawia, endelea kuyatarajia; kwa maana bila shaka yatatimia. Hayatachelewa.” (Habakuki 2:3; Zaburi 97:10) Mjane huyo hakuwa na msaidizi yeyote wa kumwombea ili maombi yake yachukuliwe kwa uzito. Lakini sisi tuna msaidizi mwenye nguvu, Yesu, “aliye kwenye mkono wa kuume wa Mungu, ambaye pia hutuombea.” (Waroma 8:34; Waebrania 7:25) Kwa hiyo, ikiwa mjane huyo, ajapokabili hali ngumu, aliendelea kumwomba mwamuzi huyo akitumaini kwamba haki itafanywa, je, hatupaswi kuendelea hata zaidi kuamini kwamba siku ya Yehova ya hukumu itakuja hakika?
18. Sala itaimarisha jinsi gani imani yetu na kutusaidia tufanyiwe haki?
18 Mfano wa mjane unatufundisha kwamba kuna uhusiano wa karibu kati ya imani na sala na kwamba tunapodumu katika sala tunaweza kushinda uvutano ambao unaweza kudhoofisha imani yetu. Bila shaka, hilo halimaanishi kwamba kusali kijuu-juu tu ili kujionyesha kutatuzuia tusipoteze imani yetu. (Mathayo 6:7, 8) Tunapochochewa kusali kwa sababu tunatambua kwamba tunamtegemea Mungu kabisa, sala itatuvuta karibu na Mungu na kuimarisha imani yetu. Na kwa kuwa imani ni muhimu ili kupata wokovu, haishangazi kwamba Yesu aliona uhitaji wa kuwatia moyo wanafunzi wake ‘wasali sikuzote bila kukata tamaa’! (Luka 18:1; 2 Wathesalonike 3:13) Ni kweli kwamba kuja kwa “ile siku kuu ya Yehova” hakutegemei sala zetu. Siku hiyo itakuja, tusali tusisali. Lakini bila shaka kufanyiwa haki na kuokoka au kutookoka kwetu binafsi vita vya Mungu, kunategemea imani tuliyo nayo, matendo ya uadilifu, na kusali.
19. Tunathibitisha jinsi gani kwamba tunaamini kabisa kuwa Mungu ‘atasababisha haki ifanywe’?
19 Kama tunavyokumbuka, Yesu aliuliza hivi: “Mwana wa binadamu atakapofika, je, kwa kweli ataipata imani [hii] duniani?” Ni nini jibu la swali hilo lenye kuamsha fikira? Tunafurahi kama nini kwamba leo mamilioni ya watumishi waaminifu wa Yehova ulimwenguni pote wanathibitisha kwa sala zao, subira, na uvumilivu wao kwamba wana imani hiyo! Hivyo, swali la Yesu linaweza kujibiwa hivi: Ndiyo! Ingawa ulimwengu wa Shetani unatutendea isivyo haki leo, tunaamini kabisa kwamba Mungu ‘atasababisha haki ifanywe kwa ajili ya watu wake waliochaguliwa.’
[Maelezo ya Chini]
^ fu. 3 Ili kuelewa kabisa maana ya mfano huo, soma Luka 17:22-33. Ona jinsi maneno “Mwana wa binadamu” kwenye Luka 17:22, 24, 30 yanavyotusaidia kujibu swali lililoulizwa kwenye Luka 18:8.
Je, Unakumbuka?
• Ni nini kimewafanya Wakristo fulani wapoteze imani?
• Kwa nini tunaweza kuwa na imani thabiti kwamba siku ya Yehova ya hukumu itakuja?
• Tuna sababu gani za kudumu katika sala?
• Kuendelea kusali kutatusaidia jinsi gani tusipoteze imani yetu?
[Maswali ya Funzo]
[Picha katika ukurasa wa 26]
Ni jambo gani linalokaziwa na mfano wa mjane na mwamuzi?
[Picha katika ukurasa wa 29]
Mamilioni ya watu leo wanaamini kabisa kwamba Mungu ‘atasababisha haki ifanywe’