Unaweza Kuvumilia Hali Ngumu

KATIKA nyakati hizi za hatari, watu wengi wanavumilia matatizo yaliyo kama dhoruba. Hata hivyo, kumpenda Mungu na kushikamana na kanuni zake kunawasaidia Wakristo kuvumilia matatizo hayo. Jinsi gani? Jibu linaweza kupatikana katika mfano uliotolewa na Yesu Kristo. Aliwalinganisha wanafunzi wake watiifu na “mtu mwenye busara, aliyejenga nyumba yake juu ya mwamba.” Yesu alisema hivi: “Mvua ikanyesha na mafuriko yakaja na pepo zikavuma na kuipiga nyumba hiyo, lakini haikuporomoka, kwa maana msingi wake ulikuwa umejengwa juu ya mwamba.”—Mathayo 7:24, 25.

Ona kwamba ingawa mtu anayetajwa kati- ka mfano huo ni mwenye busara, bado anakabili matatizo ambayo yanalinganishwa na mvua inayonyesha, mafuriko, na upepo unaoharibu. Hivyo, Yesu hakuonyesha kwamba wanafunzi wake wangeepuka hali ngumu na kuwa na amani ya kudumu na utulivu maishani. (Zaburi 34:19; Yakobo 4:13-15) Lakini alisema kwamba watumishi waaminifu wa Mungu wanaweza kujitayarisha na kukabiliana na matatizo na taabu kama hizo.

Yesu alianza mfano huo kwa kusema hivi: “Kila mtu anayesikia maneno yangu haya na kuyatenda atafananishwa na mtu mwenye busara, aliyejenga nyumba yake juu ya mwamba.” Bila shaka, Yesu hakuwa akizungumza kuhusu kujenga nyumba halisi, bali alikuwa akizungumza kuhusu kujenga maisha. Wale ambao wanatii maneno ya Kristo wanatumia utambuzi na busara. Nia na matendo yao yanategemea mafundisho ya Kristo ambayo wamefundishwa. Mafundisho hayo ni kama mwamba. Ona kwamba mwamba huo wa mfano hauko juu ya ardhi. Ili kuufikia, mtu anayetajwa katika mfano huo alihitaji kuchimba na ‘kwenda chini kina kirefu.’ (Luka 6:48) Vivyo hivyo, wanafunzi wa Yesu wanapaswa kujitahidi sana kusitawisha sifa ambazo zitawasaidia wamkaribie Mungu zaidi.—Mathayo 5:5-7; 6:33.

Kunakuwa na matokeo gani wakati matatizo yaliyo kama dhoruba yanapojaribu uthabiti wa msingi wa Kikristo wa wafuasi wa Yesu? Kutii kwao mafundisho ya Kristo kwa kupenda na sifa zao za Kikristo kunathibitika kuwa chanzo imara cha nguvu wanapokabili hali ngumu sasa, na baadaye watakapokabili dhoruba inayokaribia ya Har–Magedoni. (Mathayo 5:10-12; Ufunuo 16:15, 16) Ndiyo, kwa kufuata mafundisho ya Kristo watu wengi wanafaulu kuvumilia majaribu yaliyo kama dhoruba. Wewe pia unaweza kufaulu.—1 Petro 2:21-23.