“Akatushurutisha Kwelikweli”

UKARIBISHAJI-WAGENI ni zoea linalojulikana sana katika nchi za Mashariki. Kwa mfano, huko India washiriki wa familia wanaweza hata kukaa njaa na kumpa chakula chao mgeni ambaye hawakumtazamia. Ni jambo la kawaida kwa mama huko Iran kujaza chakula kwenye friji ili awe na kitu cha kuwapa wageni ambao wanawatembelea bila kutazamiwa.

Roho hiyo ya ukarimu ilionyeshwa na watu wengi wanaotajwa katika Biblia. Mfano mmoja mzuri ni Lidia, ambaye huenda alikuwa Myahudi aliyegeuzwa imani. Lidia aliishi Filipi, jiji kuu la wilaya ya Makedonia. Siku fulani ya Sabato, mtume Paulo na waandamani wake walimkuta Lidia na wanawake wengine wakiwa wamekusanyika kando ya mto nje ya jiji la Filipi. Pindi hiyo, Yehova alifungua moyo wa Lidia wakati Paulo alipokuwa akizungumza. Kwa sababu hiyo, Lidia na watu wa nyumbani mwake wakabatizwa. Kisha Lidia akawasihi hivi wasafiri hao: “Ikiwa ninyi mmeniona kuwa mwaminifu kwa Yehova, ingieni ndani ya nyumba yangu.” Luka, mwandamani wa Paulo anasema: “Akatushurutisha kwelikweli.”—Matendo 16:11-15.

Kama Lidia, Wakristo leo wanawakaribisha waamini wenzao, kama vile waangalizi wanaosafiri na wake zao. Wenyeji hao ‘wanawashurutisha kwelikweli’ wageni wao. Kwa kufanya hivyo, wenyeji hao wanapata baraka kutokana na mazungumzo yenye kujenga na ushirika wa kiroho. Ijapokuwa Mashahidi wengi wa Yehova si matajiri, ‘wanafuata mwendo wa ukaribishaji-wageni.’ (Waroma 12:13; Waebrania 13:2) Roho yao ya kutoa inawaletea furaha. Bila shaka, Yesu hakukosea aliposema: “Kuna furaha zaidi katika kutoa kuliko ilivyo katika kupokea.”—Matendo 20:35.