“Bwana, Mbona Ulikaa Kimya?”

HAYO ni maneno ya Papa Benedict wa 16, ambaye alitembelea kambi ya mateso ya Auschwitz, Poland, mnamo Mei 28, 2006. Akiwa katika kambi hiyo ambamo Wanazi waliua mamia ya maelfu ya Wayahudi na watu wengine, aliongeza hivi: “Mahali hapa panatokeza maswali mengi sana! Maswali haya yanaulizwa daima: Mungu alikuwa wapi siku hizo? Kwa nini alikaa kimya? Angeweza jinsi gani kuacha uchinjaji huu uendelee, ushindi huu wa uovu? . . . Tunapaswa kuendelea kumlilia Mungu kwa unyenyekevu na kwa bidii: Chukua hatua! Usiwasahau wanadamu, viumbe wako!”

Hotuba hiyo ya papa iliwafanya watu wawe na maoni mbalimbali. Wengine walitambua kwamba papa aliepuka kimakusudi kutaja mambo fulani, kama vile chuki kuelekea Wayahudi, ambayo ilihusiana na matendo ya kikatili huko Auschwitz. Wengine walihisi kwamba alikuwa akijaribu kupunguza uzito wa ombi la Papa John Paul wa Pili la kutaka msamaha kwa sababu ya dhambi ambazo kanisa lilifanya. Filippo Gentiloni, ambaye ni mwandishi wa magazeti Mkatoliki, alisema hivi: “Hata hivyo, ilifaa kwamba watangazaji wengi wa habari walipoulizwa swali hilo gumu, yaani, Mungu alikuwa wapi, swali lisilo na jibu, wao waliuliza swali rahisi zaidi: Papa Pius wa 12 alikuwa wapi?” Watangazaji hao walikuwa wakizungumza kuhusu kukaa kimya kwa Papa Pius wa 12 wakati wa yale Maangamizi Makubwa.

Yale Maangamizi Makubwa na vitendo vingine vyote vya maangamizi ya jamii nzima-nzima katika historia yote ya wanadamu vinathibitisha kwamba “mwanadamu amemtawala mwanadamu kwa kumuumiza.” (Mhubiri 8:9) Zaidi ya hilo, Muumba wa mwanadamu hakai kimya visa hivyo vya ukatili vinapotokea. Katika kurasa za Biblia, amefunua sababu zinazomfanya aache uovu uwepo. Pia, Mungu ametuhakikishia kwamba hajawasahau wanadamu. Kwa kweli, muda ambao Mungu amemruhusu mwanadamu ajitawale utakwisha hivi karibuni. (Yeremia 10:23) Je, ungetaka kujua mengi zaidi kuhusu kusudi la Mungu kutuelekea? Mashahidi wa Yehova watafurahi kukusaidia kupata majibu ya Biblia kwa maswali yaliyomsumbua Papa Benedict wa 16.

[Picha katika ukurasa wa 32 zimeandaliwa na]

Oświęcim Museum