Je, Macho ya Mungu Yako Juu Yako?

JE, YEHOVA, yule Muumba Stadi, ana uwezo wa kuona? Bila shaka anaona! Biblia inasema hivi waziwazi: “Yule anayelifanya jicho, je, hawezi kutazama?” (Zaburi 94:9) Yehova ana uwezo mkubwa zaidi wa kuona kuliko wa wanadamu. Haoni tu sura yetu ya nje bali pia ‘anachunguza mioyo,’ na anaweza ‘kuipima mioyo.’ (Methali 17:3; 21:2) Ndiyo, ana uwezo wa kuchanganua mawazo, nia, na tamaa zetu za ndani kabisa.

Yehova anajua vizuri matatizo ambayo huenda tukapata maishani, naye anajibu maombi yetu. Mtunga-zaburi aliandika hivi: “Macho ya Yehova yanawaelekea waadilifu, na masikio yake yanakielekea kilio chao cha kuomba msaada. Yehova yuko karibu na wale waliovunjika moyo; naye huwaokoa wale waliopondwa roho.” (Zaburi 34:15, 18) Inafariji kama nini kujua kwamba Yehova anaelewa hali zetu na kwamba anajibu dua zetu za kutoka moyoni!

Yehova Mungu anajua matendo tunayofanya hata tukiwa gizani. Ndiyo, “vitu vyote viko uchi navyo vimefunuliwa wazi machoni pake yeye ambaye tunatoa hesabu kwake.” (Waebrania 4:13) Hivyo, iwe matendo yetu ni mazuri au mabaya, Mungu anayaona yote. (Methali 15:3) Kwa mfano, andiko la Mwanzo 6:8, 9 linasema kwamba ‘Noa alipata kibali machoni pa Yehova’ na kwamba “alitembea pamoja na Mungu wa kweli.” Ndiyo, Noa alipata kibali na kubarikiwa na Yehova kwa sababu alikuwa mtiifu na alitegemeza kanuni za Mungu za uadilifu. (Mwanzo 6:22) Tofauti na hilo, watu wa siku za Noa walikuwa wajeuri na wenye mwenendo mpotovu kimaadili. Mungu hakuwa kipofu asione hali hiyo. ‘Aliona kuwa ubaya wa mwanadamu ulikuwa mwingi duniani na kila mwelekeo wa fikira za moyo wake ulikuwa mbaya tu wakati wote.’ Mwishowe, Yehova alileta uharibifu juu ya waovu hao lakini akamlinda Noa na familia yake.—Mwanzo 6:5; 7:23.

Je, utapata kibali cha Yehova? Kwa kweli, macho ya Yehova, “yanaenda huku na huku duniani kote ili aonyeshe nguvu zake kwa ajili ya wale ambao moyo wao ni mkamilifu kumwelekea yeye.” (2 Mambo ya Nyakati 16:9) Hivi karibuni, atawaondoa tena waovu wote duniani na kuwaokoa wale ambao ni wapole moyoni.—Zaburi 37:10, 11.