“Tafadhali Pokeeni Zawadi Yangu Ndogo”

MANENO hayo yalikuwa katika barua iliyopokewa na ofisi ya tawi ya Mashahidi wa Yehova nchini Urusi. Barua hiyo iliambatanishwa na kasha kubwa lililojaa soksi za sufu.

Zawadi hiyo ilitumwa na Alla aliye na umri wa miaka 67. Alla ni Shahidi wa Yehova anayeshirikiana na kutaniko fulani la Kaskazini ya Mbali huko Urusi. Amekuwa akimtumikia Yehova kwa miaka zaidi ya kumi, akihubiri kwa bidii habari njema ya Ufalme. Hata hivyo, kwa ghafula ugonjwa wa kiharusi ulimfanya apooze kwa kadiri fulani. Lakini, akichochewa na upendo, Alla amefuata mwendo kama ule wa Dorkasi, mwanamke Mkristo wa karne ya kwanza, ambaye aliwashonea mavazi waamini wenzake.—Matendo 9:36, 39.

Alla aliandika hivi katika barua yake: “Siwezi kusogeza miguu yangu, lakini bado ninaweza kusogeza mikono yangu. Hivyo, ninahubiri kwa kuandika barua.” Aliongeza hivi: “Niliamua kwamba maadamu ninaweza kutumia mikono yangu, nitashona pea chache za soksi nzito. Ningependa akina ndugu na dada wanaoenda kujenga Majumba ya Ufalme katika maeneo yenye baridi kama vile Mashariki ya Mbali na Siberia wapewe soksi hizo.”

Yesu Kristo alisema hivi kuhusu wafuasi wake wa kweli: “Kwa jambo hili wote watajua kwamba ninyi ni wanafunzi wangu, mkiwa na upendo kati yenu wenyewe.” (Yohana 13:35) Upendo kama huo ulioonyeshwa na Alla ni alama inayowatambulisha wanafunzi wa kweli wa Yesu.