Huruma Katika Ulimwengu Wenye Ukatili

MWANAMUME fulani nchini Burundi ameshikwa na malaria kali. Anahitaji kupelekwa hospitalini haraka sana. Lakini atapelekwa jinsi gani? Hakuna gari la kumpeleka. Wawili kati ya marafiki wake wa karibu wanamsaidia. Wanampandisha kwenye baiskeli na kumsukuma kwa muda wa saa tano. Wanafunga safari yenye kuchosha kupitia eneo lenye milima. Kisha, wanapanda basi na kumpeleka kwenye hospitali iliyo karibu zaidi. Anapata nafuu baada ya siku chache.

Katika sehemu nyingine za dunia, baada ya Kimbunga Katrina, ambacho kiliharibu eneo la Ghuba ya Marekani mnamo Agosti (Mwezi wa 8) 2005, wafanyakazi wa kujitolea wanapata nyumba iliyoangukiwa na kuvunjwa na miti. Kwa siku nzima, wafanyakazi hao, ambao hawamfahamu hata kidogo mwenye nyumba hiyo, wanakata miti hiyo kwa msumeno na kuiondoa. Mwenye nyumba hiyo anasema, “Ninawashukuru sana [watu] hawa.”

Ripoti zilizotiwa chumvi za vyombo vya habari zinazungumzia hasa mauaji na matendo ya kikatili. Mara nyingi, matendo ya huruma na fadhili yanayofanywa kila siku yanafunikwa na habari hizo za ukatili. Hata hivyo, hilo halimaanishi kwamba watu kotekote hawatamani kupendwa na kuonyeshwa huruma. Tunatamani sana kuonyeshwa huruma! Huenda maoni kama hayo yakaonyeshwa sana wakati wa Krismasi, watu wengi wanapozungumza au kuimba kuhusu ‘amani kati ya watu wa nia njema.’—Luka 2:14.

Huenda isiwe rahisi kuonyesha huruma katika ulimwengu ambamo watu wengi hawaonekani  kuwa wenye urafiki na ukarimu. Watu wengi wana maoni ya kwamba ukatili na kutojali kunaleta mafanikio na ushindi. Inaonekana wengi wanaishi kupatana na kanuni ya kwamba ni jambo la hekima zaidi kuwa mkatili kuliko kuwa mwenye huruma. Pupa na ubinafsi unawazuia watu wasionyeshe huruma.

Kwa sababu hiyo, watu wengi wanajitanguliza bila kujali hisia ama faida za watu wengine. Mashujaa wa kiume katika michezo na burudani wanasemwa kuwa “wanaume halisi” wasioonyesha huruma nyororo. Watawala fulani wa kisiasa wana tabia hiyohiyo.

Hivyo, inafaa tujiulize: Kwa nini tuwajali wengine? Je, huruma ni sifa iliyo na nguvu? Na ni nini kinachoweza kutusaidia kuonyesha huruma? Habari inayofuata itazungumzia maswali hayo.

[Picha katika ukurasa wa 3]

•Je, kuonyesha huruma ni udhaifu?

•Je, huruma ina nguvu?

•Unaweza kuwajali wengine katika njia gani?