Wakristo Wanapopepetwa Kama Ngano

MUDA mfupi kabla ya kifo chake, Yesu aliwaonya hivi wafuasi wake: “Tazama! Shetani amedai kuwapata ninyi ili awapepete kama ngano.” (Luka 22:31) Alimaanisha nini aliposema hivyo?

Katika siku za Yesu, kazi ya kuvuna ngano ilikuwa ngumu na ilichukua muda mrefu. Kwanza, wavunaji walikusanya mabua ya ngano kutoka katika mashamba. Kisha, wakayapiga-piga kwenye uwanja mgumu au wakatumia wanyama wa kufugwa kuvuta chombo cha kupuria juu ya mabua hayo ili kuyavunja-vunja. Walifanya hivyo ili kuondoa mbegu za ngano kutoka kwenye mabua na makapi. Halafu, wakulima walirusha hewani mchanganyiko huo wa mabua, makapi, na ngano. Mbegu nzima za ngano zilianguka tena kwenye uwanja wa kupuria, huku upepo ukiyapeperusha makapi. Mwishowe, ngano ilipepetwa kwa makini ili kuondoa uchafu.

Kupatana na maneno ya Yesu, Shetani aliwashambulia sana wanafunzi wa Yesu wakati huo, naye anatushambulia leo. (Efe. 6:11) Ni kweli kwamba si kila tatizo tunalokabili maishani linasababishwa moja kwa moja na Shetani. (Mhu. 9:11) Hata hivyo, Shetani anajitahidi sana kutumia njia yoyote ile ili kuvunja utimilifu wetu. Kwa mfano, huenda akatushawishi tufuatie vitu vya kimwili maishani, tuchague burudani zisizofaa, au tujihusishe katika mwenendo mpotovu kingono. Pia, anaweza kuwatumia wanashule au wafanyakazi wenzetu na watu wetu wa ukoo ambao si waamini watusukume kufuatia kabisa miradi yote ya kielimu na kikazi katika ulimwengu huu. Zaidi ya hayo, Shetani anaweza kutumia mateso ya moja kwa moja anapojitahidi kuvunja utimilifu wetu kwa Mungu. Bila shaka, kuna njia nyingine nyingi ambazo Shetani anatumia kutupepeta.

Tunaweza kumpinga jinsi gani adui huyo mwenye nguvu? Hatuwezi kufanikiwa kwa nguvu zetu wenyewe. Shetani ana nguvu kuliko sisi; hata hivyo, tunajua kwamba Yehova ana nguvu nyingi sana kuliko Shetani. Tukiwa na uhakika kabisa katika Yehova, tukisali kwa bidii tupewe hekima na ujasiri wa kuvumilia, na tukitegemea kabisa mwongozo wake, atatupa nguvu za kupinga mashambulizi ya Shetani.—Zab. 25:4, 5.

Tunapojaribiwa, tunahitaji kuwa na uwezo wa “kutofautisha yaliyo sawa na yaliyo makosa pia” ili tuepuke kupotoshwa na mbinu za Shetani. (Ebr. 5:13, 14) Yehova anaweza kutusaidia kusitawisha uwezo huo. Kisha, tunahitaji kudumu katika njia iliyo sawa, chini ya hali zozote zile. Tukifuata mwongozo wa Yehova, hapana shaka kwamba atategemeza azimio letu la ujasiri la kufanya yaliyo sawa.—Efe. 6:10.

Huenda Shetani akajaribu kutupepeta kama ngano. Lakini kwa nguvu za Yehova, tunaweza kumpinga Shetani tukiwa thabiti katika imani. (1 Pet. 5:9) Ndiyo, Neno la Yehova linatuhakikishia hivi: “Mpingeni Ibilisi, naye atawakimbia ninyi.”—Yak. 4:7.