Je, Unaweza Kutumika Mahali Penye Uhitaji Mkubwa Zaidi wa Wahubiri?

“Tuliishi raha mustarehe nchini Marekani lakini tulikuwa na wasiwasi kwamba hali ya kutafuta sana mali katika eneo hilo ingekuwa na uvutano mbaya kwetu na kwa wana wetu wawili. Zamani mimi na mke wangu tulikuwa wamishonari, na tulitaka kufurahia tena maisha hayo rahisi lakini yenye furaha.”

MWAKA wa 1991, tamaa hiyo iliwachochea Ralph na Pam kuandikia ofisi kadhaa za tawi na kueleza kwamba walitamani kutumika mahali penye uhitaji mkubwa zaidi wa wahubiri wa Ufalme. Ofisi ya tawi ya Mexico iliwajibu kwamba kulikuwa na uhitaji mkubwa sana wa wahubiri wa Ufalme wanaoweza kuwahubiria watu wanaozungumza Kiingereza nchini humo. Ofisi hiyo ya tawi ilisema kwamba kwa kweli eneo hilo ni ‘jeupe kwa ajili ya kuvunwa.’ (Yoh. 4:35) Muda si muda, Ralph na Pam, pamoja na wana wao wawili wenye umri wa miaka 8 na 12, walikubali mwaliko huo wakaanza kujitayarisha kuhamia Mexico.

Eneo Kubwa Sana

Ralph anasema hivi: “Kabla ya kuhama Marekani, ndugu na dada fulani wenye nia nzuri walituambia hivi: ‘Ni hatari sana kuhamia nchi nyingine!’ ‘Mtafanya nini mkipatwa na ugonjwa?’ ‘Kwa nini mnahamia eneo la watu wanaozungumza Kiingereza? Watu hao wanaozungumza Kiingereza hawatapendezwa na kweli!’ Hata hivyo, tuliazimia kwenda. Bila shaka, uamuzi wetu wa kuhama haukuwa wa kushtukia tu. Kwa miaka mingi tulikuwa tukipanga kuhama. Tuliepuka kuwa na madeni ya muda mrefu, tuliweka kando kiasi fulani cha pesa, na tulizungumza mara nyingi tukiwa familia kuhusu matatizo ambayo tungekabili tukihama.”

Kwanza, Ralph na familia yake walitembelea ofisi ya tawi ya Mexico. Katika ofisi hiyo, ndugu waliwaonyesha wageni hao ramani ya nchi yote ya Mexico na kuwaambia hivi: “Hili ndilo eneo lenu!” Familia hiyo iliamua kuishi San Miguel de Allende, mji wenye wageni wengi, ulio umbali wa kilomita 240 kaskazini-magharibi ya jiji la Mexico City. Baada ya miaka mitatu kupita, kutaniko la Kiingereza lenye wahubiri 19 lilianzishwa katika mji huo. Hilo ndilo lililokuwa kutaniko la kwanza la Kiingereza katika Mexico—lakini kulikuwa na kazi nyingi zaidi iliyowangoja.

Inakadiriwa kwamba Wamarekani milioni moja hivi wanaishi katika nchi ya Mexico. Kwa kuongezea, kuna wanafunzi na wataalamu wengi wa Mexico ambao wanazungumza lugha ya Kiingereza ikiwa lugha yao ya pili. Ralph anaeleza  hivi: “Tulisali ili tupate wafanyakazi zaidi. Sikuzote tulikuwa na chumba cha ziada cha kulala katika nyumba yetu kwa ajili ya akina ndugu na dada waliokuja katika eneo letu ili ‘kuipeleleza nchi.’”—Hes. 13:2.

Waliishi Maisha Rahisi ili Wapanue Huduma Yao

Muda si muda, ndugu na dada zaidi waliotaka kupanua huduma yao walifika. Kati yao ni Bill na Kathy kutoka Marekani. Tayari walikuwa wametumikia kwa miaka 25 katika maeneo yenye uhitaji mkubwa wa wahubiri. Walikuwa wakifikiria kujifunza Kihispania, lakini mipango yao ilibadilika baada ya kuhamia mji wa Ajijic kwenye ufuo wa Ziwa Chapala. Watu wengi waliostaafu kutoka Marekani wanapenda kuishi katika mji huo. Bill anaeleza, “Katika mji wa Ajijic tulijitahidi sana kuwatafuta watu wanaozungumza Kiingereza ambao walitaka kujifunza kweli.” Kwa muda wa miaka miwili tangu walipofika katika mji huo, Bill na Kathy walifurahi kuona kutaniko la pili la Kiingereza likianzishwa nchini Mexico.

Ken na Joanne kutoka Kanada waliamua kuishi maisha rahisi ili watumie wakati zaidi katika kazi ya Ufalme. Wao pia walihamia Mexico. Ken anasema, “Ilituchukua muda kuzoea kuishi katika eneo ambalo si rahisi kupata maji ya moto, umeme, au huduma za simu kwa siku nyingi.” Hata hivyo, kushiriki katika kazi ya kuhubiri kulituletea shangwe. Muda si muda, Ken aliwekwa kuwa mtumishi wa huduma na baada ya miaka miwili akawa mzee. Mwanzoni, haikuwa rahisi kwa binti yao Britanny kuzoea kutaniko dogo la Kiingereza lenye vijana wachache. Hata hivyo, baada ya kuanza kushiriki katika miradi ya ujenzi wa Majumba ya Ufalme, alipata marafiki wengi wazuri kotekote nchini.

Patrick na Roxanne kutoka katika jimbo la Texas huko Marekani walisisimuka walipopata habari kuhusu eneo la karibu la kimishonari lenye watu wanaozungumza Kiingereza. Patrick anasema hivi: “Baada ya kutembelea Monterrey, mji ulio kaskazini-mashariki mwa Mexico, tulihisi kwamba Yehova alikuwa akituelekeza huko ili tusaidie.” Baada ya siku tano, walifaulu kuuza nyumba yao huko Texas nao ‘wakavuka na kuingia Makedonia.’ (Mdo. 16:9) Kupata riziki nchini Mexico si rahisi, lakini katika miaka miwili tu, walifurahi kuona kikundi kidogo cha Mashahidi 17 kikipanuka na kuwa kutaniko lenye wahubiri 40.

Jeff na Deb ni wenzi wa ndoa ambao pia walirahisisha maisha yao ili wapanue huduma yao. Waliuza nyumba yao kubwa huko Marekani na kuhamia nyumba ndogo huko Cancún, jiji lililo kwenye pwani ya mashariki ya Mexico. Zamani, walizoea kuhudhuria makusanyiko katika majumba ya kisasa yenye starehe karibu na nyumba yao. Sasa walilazimika kusafiri kwa muda wa saa nane ili kuhudhuria kusanyiko la karibu la Kiingereza, ambalo lilifanyiwa katika uwanja usio na paa. Lakini waliridhika sana walipoona kutaniko lenye wahubiri 50 likianzishwa huko Cancún.

Ndugu na dada fulani wa Mexico walianza pia kusaidia kuhubiri kwa lugha ya Kiingereza. Kwa mfano, Rubén na familia yake waliposikia  kwamba kutaniko la kwanza la Kiingereza lilikuwa limeanzishwa huko San Miguel de Allende na kwamba eneo la kutaniko hilo ni nchi yote ya Mexico, waliamua mara moja kusaidia. Kwa hiyo, walihitaji kujifunza Kiingereza, kuzoea utamaduni tofauti, na kusafiri mbali sana, kilomita 800 kila juma ili kuhudhuria mikutano. Rubén anasema hivi: “Tulifurahi sana kuwahubiria wageni ambao wameishi Mexico kwa miaka mingi lakini ambao ilikuwa mara ya kwanza kwao kusikia habari njema katika lugha yao wenyewe. Wengine wao walionyesha uthamini sana hivi kwamba wakatokwa na machozi.” Baada ya kusaidia kutaniko la San Miguel de Allende, Rubén na familia yake walitumikia wakiwa mapainia katika mji wa Guanajuato, ulio katikati ya Mexico, ambako walisaidia kuanzisha kutaniko la Kiingereza lenye wahubiri zaidi ya 30. Leo, wanatumikia katika kikundi cha Kiingereza huko Irapuato, mji ulio karibu na Guanajuato.

Kuwahubiria Watu Ambao Hawapatikani kwa Urahisi

Zaidi ya wageni, kuna watu wengi Mexico ambao wanazungumza Kiingereza. Mara nyingi ni vigumu kuwahubiria ujumbe wa Ufalme kwa sababu wanaishi katika maeneo ya matajiri ambako wafanyakazi wa nyumbani tu ndio wanaofungua milango. Au ikiwa wenye nyumba wanafungua milango, huenda wasitake kusikiliza ujumbe wetu kwa sababu wanafikiri kwamba Mashahidi wa Yehova ni dhehebu dogo la kienyeji. Hata hivyo, wenye nyumba hao wanapohubiriwa na Mashahidi kutoka katika nchi za ng’ambo, wengine wao wanasikiliza vizuri.

 Kwa mfano, mfikirie Gloria aliyeishi katika mji wa Querétaro, ulio katikati ya Mexico. Anasema hivi: “Zamani nilitembelewa na Mashahidi wanaozungumza Kihispania lakini sikuwasikiliza. Hata hivyo, familia na marafiki wangu walipoanza kupata matatizo, nilishuka moyo na nikamwomba Mungu anionyeshe njia. Muda mfupi baadaye, mwanamke fulani anayezungumza Kiingereza aligonga mlango wangu. Aliniuliza ikiwa kuna mtu yeyote nyumbani anayezungumza Kiingereza. Kwa sababu hakuwa mwenyeji, nilikuwa na hamu ya kumsikiliza, nikamwambia kwamba ninazungumza Kiingereza. Alipokuwa akizungumza, nilijiuliza, ‘Huyu Mmarekani anafanya nini katika mtaa wetu?’ Lakini nilikuwa nimemwomba Mungu anionyeshe ishara. Kwa hiyo, huenda mgeni huyu ndiye jibu kwa sala yangu.” Gloria alikubali kujifunza Biblia akafanya maendeleo ya haraka sana na kubatizwa, hata ingawa alipingwa na familia yake. Leo, Gloria anatumikia akiwa painia wa kawaida, na mume na mwana wake pia wanamtumikia Yehova.

Baraka Ambazo Wale Wanapanua Huduma Yao Wanapata

Kutumikia mahali penye uhitaji mkubwa zaidi wa wahubiri wa Ufalme kuna magumu fulani, lakini baraka ni nyingi. Ralph, aliyetajwa mwanzoni, anasema hivi: “Tulijifunza Biblia pamoja na watu kutoka Jamaika, Sweden, Uchina, Uingereza, na hata tulijifunza na watu fulani mashuhuri kutoka Ghana. Baadhi ya wanafunzi hao wa Biblia waliingia katika utumishi wa wakati wote. Katika miaka ambayo imepita, familia yetu imeona makutaniko saba ya Kiingereza yakianzishwa. Wana wetu wawili walijiunga pamoja nasi katika upainia, na sasa wanatumika katika Betheli ya Marekani.”

Kwa sasa, kuna makutaniko 88 na vikundi vingi vya lugha ya Kiingereza nchini Mexico. Kwa nini kuna ongezeko la haraka hivyo? Watu wengi wanaozungumza Kiingereza nchini Mexico hawakuwa wamehubiriwa kamwe na Mashahidi. Wengine walikubali kusikiliza kwa sababu hawakupata upinzani kutoka kwa marafiki na watu wa familia zao ambao ungewazuia katika nchi zao. Na wengine walikubali kujifunza Biblia kwa sababu walikuwa wamestaafu na walikuwa na wakati wa kufuatilia mambo ya kiroho. Kwa kuongezea, zaidi ya asilimia 33 ya wahubiri katika makutaniko ya Kiingereza ni mapainia, na hilo limechangia sana ukuzi na uchangamfu katika makutaniko hayo.

Utapata Baraka

Bila shaka watu wengi zaidi ulimwenguni watakubali ujumbe wa Ufalme wanaposikia ukihubiriwa katika lugha yao wenyewe. Basi inatia moyo kuona kwamba ndugu na dada wengi wa kiroho, vijana kwa wazee, waseja na waliofunga ndoa, wako tayari kuhamia maeneo yenye uhitaji mkubwa zaidi wa watangazaji wa Ufalme. Ni kweli kwamba huenda wakapata matatizo, lakini matatizo hayo si kitu yakilinganishwa na furaha wanayohisi wanapopata watu wenye mioyo minyoofu wanaokubali kweli za Biblia. Je, unaweza kufanya mabadiliko ili uweze kuhamia eneo lenye uhitaji mkubwa zaidi wa wahubiri wa Ufalme katika nchi yenu au nchi nyingine? * (Luka 14:28-30; 1 Kor. 16:9) Ikiwa ndivyo, unaweza kuwa na hakika kwamba utapata baraka nyingi sana.

[Maelezo ya chini]

[Sanduku katika ukurasa wa 21]

Watu Waliostaafu Wenye Furaha Wasaidiwa

Beryl alihamia Kanada kutoka Uingereza. Huko Kanada, alifanya kazi katika makampuni kadhaa ya kimataifa akiwa meneja. Alikuwa pia mwendeshaji-farasi hodari sana na hata alichaguliwa kuiwakilisha Kanada katika Michezo ya Olimpiki ya 1980. Alipostaafu na kuhamia Chapala, Mexico, Beryl na mume wake mara nyingi walikula katika hoteli mbalimbali katika mji huo. Alipoona watu wenye furaha waliostaafu ambao walizungumza Kiingereza, alijitambulisha na kuwauliza walikuwa wakifanya kazi gani nchini Mexico. Mara nyingi, alipata kwamba watu hao walikuwa Mashahidi wa Yehova. Beryl na mume wake waliamua kwamba ikiwa furaha na kusudi maishani linategemea kumjua Mungu, basi wao pia walitaka kumjua. Baada ya kuhudhuria mikutano ya Kikristo kwa miezi fulani, Beryl alikubali kujifunza Biblia. Kwa miaka mingi, Beryl alitumikia akiwa painia wa kawaida.

[Sanduku katika ukurasa wa 22]

“Ni Baraka Kuwa Nao”

Wale ambao wamehamia nchi zenye uhitaji mkubwa zaidi wa wahubiri wa Ufalme wanathaminiwa sana na ndugu wa nchi hizo. Ofisi moja ya tawi huko Karibea iliandika hivi: “Ikiwa mamia ya wageni wanaotumika huku wangeondoka, makutaniko hayangekuwa thabiti. Ni baraka kuwa nao.”

Neno la Mungu linasema kwamba “wanawake wanaotangaza habari njema ni jeshi kubwa.” (Zab. 68:11) Hivyo, haishangazi kwamba kuna dada wengi waseja miongoni mwa wale wanaotumika katika nchi za kigeni. Dada hao wanaojidhabihu wanasaidia sana. Ofisi moja ya tawi katika Ulaya Mashariki ilisema hivi: “Katika mengi ya makutaniko yetu, kuna idadi kubwa ya akina dada, na hata katika makutaniko fulani asilimia 70 ya wahubiri ni akina dada. Wengi wa dada hao ni wapya katika kweli, lakini dada waseja mapainia ambao wametoka nchi nyingine hutimiza jukumu muhimu sana la kuwazoeza. Dada hao kutoka nchi nyingine wanatusaidia sana!”

Dada kama hao wanahisi namna gani kuhusu kutumika katika nchi za kigeni? Angelica, dada mwenye umri wa miaka 30 hivi ambaye ametumika kwa miaka kadhaa katika nchi za kigeni akiwa painia mseja, anasema hivi: “Matatizo ni mengi. Katika mgawo mmoja, siku baada ya siku, nilitembea kwenye barabara zenye matope na nilisikitika sana kuona wanadamu wengi wakiteseka. Lakini niliridhika nilipowasaidia watu katika huduma. Niliguswa moyo pia niliposikia dada wengi katika nchi hizo wakinishukuru sana kwa sababu ya kuja kuwasaidia. Dada mmoja aliniambia kwamba mfano nilioweka kwa kusafiri kutoka mbali na kuja katika nchi yao ili kutumikia nikiwa painia ulimchochea pia kuanza utumishi wa wakati wote.”

Sue, painia mwenye umri wa miaka 50 hivi, anasema: “Bila shaka unakabili matatizo, lakini hayawezi kulinganishwa na baraka unazopata. Huduma inasisimua! Kwa kuwa ninahubiri kwa muda mrefu pamoja na dada vijana, ninazungumza nao mambo ninayojifunza katika Biblia na vichapo vyetu kuhusu kukabiliana na vipingamizi. Mara nyingi wananiambia kwamba mfano wangu katika kukabiliana na matatizo huku nikitumikia kwa miaka mingi nikiwa painia mseja unawasaidia kuona kwamba wao pia wanaweza kushinda matatizo maishani mwao. Ninaridhika kabisa ninapowasaidia dada hao.”

[Ramani katika ukurasa wa 20]

(Ona mpangilio kamili katika nakala iliyochapishwa)

MEXICO

Monterrey

Guanajuato

Irapuato

Ajijic

Chapala

Ziwa Chapala

San Miguel de Allende

Querétaro

MEXICO CITY

Cancún

[Picha katika ukurasa wa 23]

Wahubiri fulani wanapata shangwe ya kuwahubiria wageni ambao hawajawahi kamwe kusikia habari njema