Kuwa Macho Kunaleta Matokeo Mazuri

JE, UKO macho kutumia nafasi za kuhubiri ambazo huenda zikatokea bila kutazamiwa katika eneo la kutaniko lenu? Ndugu zetu Wakristo katika jiji la kale lenye bandari la Turku, huko Finland, walikuwa macho, na hivyo wakapata matokeo mazuri.

Muda fulani uliopita, ndugu hao wa Turku waligundua kwamba kikundi fulani cha wanaume kutoka Asia walifika katika mji wao ili kumaliza kazi ya kutengeneza meli kubwa ambayo ilikuwa katika eneo la mji wao la kurekebisha na kutengeneza meli. Baadaye, ndugu mmoja alijua hoteli ambamo wafanyakazi hao wa kigeni walikuwa wakiishi. Pia, alipata habari kwamba asubuhi na mapema, wafanyakazi hao walibebwa na mabasi kutoka kwenye hoteli zao za mjini na kupelekwa katika bandari. Papo hapo, aliwajulisha ndugu wa kutaniko la lugha ya Kiingereza huko Turku.

Wazee wa kutaniko hilo walitambua kwamba kuwapo kwa wageni wengi sana kuliwapa nafasi isiyotazamiwa ya kuwahubiria ujumbe wa Ufalme, hivyo, wakapanga haraka kampeni ya pekee. Siku ya Jumapili (Siku ya Yenga) juma hilo, wahubiri kumi walikusanyika kwenye kituo cha mabasi saa moja asubuhi. Mwanzoni, hawakuona mfanyakazi yeyote. Ndugu wakaulizana, ‘Kwani, tumechelewa sana kufika? Au wafanyakazi hao wameondoka Turku?’ Lakini mfanyakazi mmoja aliyekuwa amevaa mavazi ya kazi akatokea. Mfanyakazi mwingine akamfuata, na wengine wengi wakatokea. Muda si muda, umati mkubwa wa wafanyakazi ulikusanyika karibu na kituo hicho. Wahubiri walianza mara moja kuwaonyesha wafanyakazi hao vichapo vya Kiingereza. Jambo zuri ni kwamba muda wa saa moja hivi ulipita kabla ya wafanyakazi hao wote kupanda mabasi, na hivyo ndugu wakapata wakati wa kutosha kuzungumza na wengi wao. Wafanyakazi waliobebwa kwa mabasi hayo walichukua vijitabu 126 na magazeti 329!

Matokeo hayo mazuri yaliwatia moyo akina ndugu wapange kampeni nyingine juma lililofuata, wakati wa ziara ya mwangalizi wa mzunguko. Ilikuwa siku yenye mvua na saa 12 na nusu asubuhi, mwangalizi wa mzunguko aliongoza mkutano wa utumishi wa shambani, na wahubiri 24 wakaelekea kwenye kituo hicho cha mabasi. Siku hiyo, walibeba pia vichapo vya lugha ya Tagalog kwa sababu waligundua kwamba wengi kati ya wageni hao walitoka katika nchi ya Ufilipino. Asubuhi hiyo, wafanyakazi waliopelekwa na mabasi bandarini walichukua vitabu 7, vijitabu 69, na magazeti 479. Hebu wazia jinsi ndugu na dada walioshiriki katika kampeni hiyo walivyofurahi na kusisimka!

Kabla ya wafanyakazi hao kurudi katika nchi zao, ndugu waliwatembelea wengi wao katika hoteli zao na kuwahubiria ujumbe wa Ufalme kwa undani zaidi. Wafanyakazi wengine walisema kwamba wamewahi kuhubiriwa na Mashahidi katika sehemu nyingine za ulimwengu. Wafanyakazi hao waliwashukuru sana akina ndugu kwa sababu ya kuchukua hatua ya kuwahubiria walipokuwa huko Finland.

Je, uko macho kutumia nafasi ambazo zinaweza kutokea bila kutazamiwa katika eneo la kutaniko lenu? Je, unachukua hatua ya kuwahubiria watu wa makabila na mataifa mbalimbali? Ikiwa ndivyo, wewe pia unaweza kupata mambo mazuri yaliyoonwa kama hayo ambayo ndugu wa mji wa Turku walipata.

[Ramani/Picha katika ukurasa wa 32]

(Ona mpangilio kamili katika nakala iliyochapishwa)

FINLAND

HELSINKI

Turku