“Ninyi Mnapaswa Kuwa Watu wa Namna Gani!”

“Kwa kuwa hivyo vitu vyote vitayeyushwa jinsi hiyo, ninyi mnapaswa kuwa watu wa namna gani katika matendo matakatifu ya mwenendo na vitendo vya ujitoaji-kimungu!”—2 PET. 3:11.

1. Kwa nini barua ya pili ya Petro ilikuwa himizo la wakati unaofaa kwa Wakristo walioishi katika siku zake?

MTUME Petro alipoandika barua yake ya pili iliyoongozwa na roho ya Mungu, tayari kutaniko la Kikristo lilikuwa limevumilia mateso mengi, lakini jambo hilo halikuwa limepunguza bidii ya kutaniko au ukuzi wake. Kwa hiyo, Ibilisi alitumia mbinu nyingine, mbinu ambayo ilikuwa imefaulu mara nyingi kabla ya hapo. Kama Petro anavyofunua, Shetani alijaribu kuwapotosha watu wa Mungu kwa kutumia walimu wa uwongo ambao walikuwa na “macho yenye kujaa uzinzi” na “moyo uliozoezwa kutamani.” (2 Pet. 2:1-3, 14; Yuda 4) Kwa kufaa, barua ya pili ya Petro ni himizo la kutoka moyoni linalowatia moyo Wakristo kuendelea kuwa waaminifu kwa Mungu.

2. Ni jambo gani linalokaziwa katika andiko la 2 Petro sura ya 3, na tunapaswa kujiuliza maswali gani?

² Petro aliandika hivi: “Ninaona hili kuwa sawa, maadamu ningali katika maskani hii, kuwaamsha ninyi kwa kuwakumbusha, nikijua ninavyojua kwamba kuondolewa kwa maskani yangu kutakuwa hivi karibuni . . . Kwa hiyo nitafanya yote ninayoweza pia kila wakati ili, baada ya kuondoka kwangu, ninyi mweze kuyataja mambo haya kwa ajili yenu wenyewe.” (2 Pet. 1:13-15) Ndiyo, Petro alijua kwamba kifo chake kilikuwa kimekaribia, lakini alitamani kwamba vikumbusho vyake vya wakati unaofaa viendelee kukumbukwa. Na kwa kweli,  vikumbusho hivyo vilitiwa ndani ya Biblia na sote tunaweza kuvisoma leo. Sura ya 3 ya barua ya pili ya Petro inatufaa sana leo, kwa kuwa inakazia “siku za mwisho” za mfumo huu wa mambo na kuharibiwa kwa mbingu ya mfano na dunia ya mfano. (2 Pet. 3:3, 7, 10) Petro anatutolea shauri gani? Kufuata shauri lake kutatusaidia jinsi gani tustahili kukubaliwa na Yehova?

3, 4. (a) Petro alitoa himizo gani la mshangao, na akatoa onyo gani? (b) Ni mambo gani matatu ambayo tutazungumzia?

³ Baada ya kutaja kuhusu kuharibiwa kwa ulimwengu wa Shetani, Petro alisema: “Ninyi mnapaswa kuwa watu wa namna gani katika matendo matakatifu ya mwenendo na vitendo vya ujitoaji-kimungu!” (2 Pet. 3:11, 12) Ni wazi kwamba hakuwa akiuliza swali, badala yake, alikuwa akitoa himizo la mshangao ambalo linachochea fikira. Petro alijua kwamba ni wale wanaofanya mapenzi ya Yehova na kuonyesha sifa zinazompendeza Mungu ndio tu watakaookolewa katika ile “siku ya kisasi” inayokuja. (Isa. 61:2) Basi, mtume huyo aliongezea hivi: “Kwa hiyo, ninyi, wapendwa, mkiwa na ujuzi huu wa kimbele, jilindeni ili msichukuliwe mbali pamoja nao [walimu wa uwongo] kwa kosa la watu wanaokaidi sheria, mwanguke kutoka kwenye uimara wenu wenyewe.”—2 Pet. 3:17.

⁴ Akiwa mmoja kati ya watu waliokuwa na ‘ujuzi wa kimbele,’ Petro alijua kwamba katika siku za mwisho, Wakristo wangepaswa hasa kuwa waangalifu ili wadumishe utimilifu wao. Baadaye, mtume Yohana alieleza waziwazi kwa nini wangepaswa kuwa waangalifu. Aliona kimbele Shetani akifukuzwa kutoka mbinguni akiwa na “hasira kali” kuelekea wale “wanaoshika amri za Mungu na walio na kazi ya kutoa ushahidi kumhusu Yesu.” (Ufu. 12:9, 12, 17) Mwishowe, watumishi washikamanifu wa Mungu waliotiwa mafuta pamoja na waandamani wao waaminifu wa “kondoo wengine” watakuwa washindi. (Yoh. 10:16) Lakini, namna gani sisi binafsi? Je, tutadumisha utimilifu wetu? Tutafaulu kufanya hivyo ikiwa tutajitahidi (1) kusitawisha sifa zinazompendeza Mungu, (2) kubaki bila doa na bila dosari au kasoro kiadili na kiroho, na (3) kuwa na maoni yanayofaa kuhusu majaribu. Acheni tuzungumzie mambo hayo.

Sitawisha Sifa Zinazompendeza Mungu

5, 6. Tunapaswa kujitahidi kusitawisha sifa gani, na kwa nini hilo linahitaji ‘jitihada yenye bidii’?

⁵ Mwanzoni mwa barua yake ya pili, Petro aliandika hivi: “Mkiitikia kwa kuchanga kwenu jitihada yote yenye bidii, ongezeni kwenye imani yenu wema wa adili, kwenye wema wenu wa adili ujuzi, kwenye ujuzi wenu kujizuia, kwenye kujizuia kwenu uvumilivu, kwenye uvumilivu wenu ujitoaji-kimungu, kwenye ujitoaji-kimungu wenu upendo wa kindugu, kwenye upendo wenu wa kindugu upendo. Kwa maana mambo hayo yakikaa ndani yenu na kufurika, yatawazuia kuwa ama wasiotenda au wasiozaa matunda kuhusiana na ujuzi sahihi juu ya Bwana wetu Yesu Kristo.”—2 Pet. 1:5-8.

⁶ Ni kweli kwamba ‘jitihada yenye bidii’ inahitajiwa ili kushiriki katika utendaji mbalimbali unaotusaidia kusitawisha sifa zinazompendeza Mungu. Kwa mfano, tunahitaji kujitahidi ili kuhudhuria mikutano yote ya Kikristo, kusoma Biblia kila siku, na kufuata programu nzuri ya kujifunza kibinafsi. Na huenda tukahitaji kujitahidi sana na kupanga mambo vizuri ili tuwe na jioni ya Ibada ya Familia kwa ukawaida, ambayo ni yenye kufurahisha, na yenye kujenga. Lakini mara tu tunapozoea kufuata ratiba au programu nzuri, inakuwa rahisi zaidi kuendelea kuwa na mazoea hayo yenye kujenga—hasa tunapoona faida za kufanya hivyo.

7, 8. (a) Watu fulani wamesema nini kuhusu jioni ya Ibada ya Familia? (b) Unafaidika jinsi gani kutokana na ibada yenu ya familia?

⁷ Dada mmoja anaandika hivi kuhusu mpango wa ibada ya familia: “Unatuwezesha kujifunza mambo mengi sana.” Dada mwingine anasema hivi: “Kusema kweli, sikutaka mpango wa funzo la kitabu uishe. Huo ndio mkutano niliopenda zaidi. Lakini sasa, tunapokuwa na jioni ya Ibada ya Familia, ninatambua kwamba Yehova anajua kile tunachohitaji na wakati tunapokihitaji.” Ndugu mmoja ambaye ni kichwa cha familia anasema hivi: “Ibada ya familia inatusaidia sana. Kuwa na mkutano unaozungumzia mahitaji  yetu hususa tukiwa wenzi wa ndoa ni jambo zuri ajabu! Sote wawili tunahisi kwamba tunafanya maendeleo katika kuonyesha tunda la roho takatifu, na tunapata furaha nyingi ambayo hatujawahi kamwe kupata katika huduma yetu.” Ndugu mwingine ambaye pia ni kichwa cha familia anasema hivi: “Watoto wanafanya utafiti wao na wanajifunza mengi—na wanafurahia jambo hilo. Mpango huo unatusaidia kuwa na hakika zaidi kwamba Yehova anajua mahangaiko yetu na anajibu sala zetu.” Je, unahisi vivyo hivyo kuhusu mpango huo mzuri ajabu kutoka kwa Yehova?

⁸ Msiruhusu mambo madogo-madogo yavuruge ibada ya familia. Wenzi fulani wa ndoa walisema hivi: “Kila siku ya Alhamisi (Siku ya 4) jioni, kwa majuma manne yaliyopita, jambo fulani lilitokea katika familia yetu ambalo lingetufanya tukose funzo letu, lakini hatukuruhusu lituvuruge.” Bila shaka, huenda nyakati nyingine mkalazimika kubadili ratiba yenu. Hata hivyo, mnapaswa kuazimia kutokosa kuwa na jioni ya Ibada ya Familia—hata kwa juma moja!

9. Yehova alimtegemeza Yeremia jinsi gani, na tunaweza kujifunza nini kutokana na mfano wake?

⁹ Nabii Yeremia anatuwekea mfano mzuri. Alihitaji chakula cha kiroho ambacho alipewa na Yehova na alikithamini sana. Chakula hicho kilimwezesha kuwahubiria kwa uvumilivu watu ambao hawakukubali ujumbe wake. Alisema hivi: “Neno la Yehova lilikuwa . . . kama moto unaowaka ambao umefungiwa ndani ya mifupa yangu.” (Yer. 20:8, 9) Pia, chakula hicho kilimsaidia kuvumilia nyakati ngumu ambazo zilifikia kilele wakati Yerusalemu lilipoharibiwa. Leo, tuna Neno lote la Mungu lililoandikwa. Tunapojifunza Neno hilo kwa bidii na kuwa na maoni ya Mungu kuhusu mambo mbalimbali, kama Yeremia, tutaweza kuvumilia kwa shangwe katika huduma, tutadumisha uaminifu tunapojaribiwa, na tutabaki safi kiadili na kiroho.—Yak. 5:10.

Endelea Kuwa “Bila Doa na Bila Dosari”

10, 11. Kwa nini ni lazima tufanye yote tunayoweza ili tuendelee kuwa “bila doa na bila dosari,” na tunahitaji kufanya nini ili tufanikiwe?

¹⁰ Tukiwa Wakristo, tunajua kwamba tunaishi katika siku za mwisho. Kwa hiyo, hatushangai kuona kwamba ulimwengu unapenda sana mambo ambayo Yehova anachukia, kama vile pupa, ngono zilizopotoka, na jeuri. Kwa ufupi, tunaweza kuifafanua hivi mbinu ya Shetani: ‘Ikiwa watumishi wa Mungu hawawezi kutishwa, labda wanaweza kupotoshwa.’ (Ufu. 2:13, 14) Hivyo, ni lazima tuchukue kwa uzito himizo hili lenye upendo la Petro: “Fanyeni yote mnayoweza ili mwishowe [Mungu] awapate ninyi mkiwa bila doa na bila dosari na mkiwa katika amani.”—2 Pet. 3:14.

¹¹ Maneno “fanyeni yote mnayoweza” yanalingana na himizo lililotolewa mapema na Petro la kuchanga “jitihada yote yenye bidii.” Ni wazi kwamba Yehova—ambaye alimwongoza Petro kwa roho takatifu kuandika maneno hayo—anajua kwamba tunahitaji kujitahidi wenyewe ili tuendelee kuwa “bila doa na bila dosari,” yaani, tusichafuliwe na mambo machafu ya ulimwengu wa Shetani. Kujitahidi wenyewe kunatia ndani kuulinda moyo wetu ili usishindwe na tamaa mbaya. (Soma Methali 4:23; Yakobo 1:14, 15.) Pia, kunatia ndani kuwapinga kabisa wale wanaoshangaa kuhusu mwenendo wetu wa Kikristo na ambao ‘wanaendelea kututukana.’—1 Pet. 4:4.

12. Tunapata uhakikisho gani katika andiko la Luka 11:13?

¹² Kwa sababu ya hali yetu ya kutokamilika,  ni lazima tupambane sana ili tufanye yaliyo sawa. (Rom. 7:21-25) Tunaweza tu kutazamia kufanikiwa ikiwa tutamtegemea Yehova, ambaye anawapa kwa ukarimu roho takatifu wale wanaomwomba kwa unyoofu. (Luka 11:13) Kisha, roho hiyo takatifu inasitawisha ndani yetu sifa ambazo zinatufanya tustahili kukubaliwa na Mungu na ambazo zinatusaidia kushinda vishawishi na pia majaribu maishani, ambayo huenda yatazidi kuongezeka kadiri siku ya Yehova inavyokaribia.

Acha Majaribu Yakutie Nguvu

13. Ni nini kitakachotusaidia kuvumilia majaribu tunayopata katika maisha yetu?

¹³ Kwa kuwa tunaishi katika mfumo huu wa kale wa mambo, ni lazima tutapatwa na majaribu ya aina mbalimbali. Lakini badala ya kushuka moyo, kwa nini usione majaribu kuwa nafasi nzuri ya kumhakikishia Mungu kwamba unampenda na kuboresha imani yako kumwelekea na kuelekea Neno lake? Mwanafunzi Yakobo aliandika hivi: “Oneni yote kuwa shangwe, ndugu zangu, mnapokutana na majaribu ya namna mbalimbali, mkijua kwamba sifa iliyojaribiwa ya imani yenu hutokeza uvumilivu.” (Yak. 1:2-4) Kumbuka pia kwamba “Yehova anajua jinsi ya kuwakomboa watu wenye ujitoaji-kimungu kutoka katika jaribu.”—2 Pet. 2:9.

14. Mfano wa Yosefu unakutia moyo jinsi gani?

¹⁴ Fikiria mfano wa Yosefu, mwana wa Yakobo ambaye aliuzwa utumwani na ndugu zake. (Mwa. 37:23-28; 42:21) Je, imani ya Yosefu ilidhoofika kwa sababu ya kutendewa kwa njia hiyo ya ukatili? Je, alimkasirikia Mungu kwa kuruhusu apatwe na uovu huo? Neno la Mungu linajibu waziwazi hapana! Hata hivyo, huo haukuwa mwisho wa majaribu ya Yosefu. Baadaye, alishtakiwa kwa uwongo kwamba alijaribu kumlala mwanamke kwa nguvu na akafungwa gerezani. Hata hivyo, kwa mara nyingine tena hakuyumba-yumba kamwe katika ujitoaji-kimungu wake. (Mwa. 39:9-21) Badala yake, aliamua kuacha majaribu yamtie nguvu, na akabarikiwa sana kwa kufanya hivyo.

15. Tunajifunza nini kutokana na mfano wa Naomi?

¹⁵ Ni kweli kwamba majaribu yanaweza kutuhuzunisha au hata kutufanya tushuke moyo. Labda nyakati nyingine Yosefu alihisi hivyo. Bila shaka, watumishi wengine waaminifu wa Mungu walihisi hivyo pia. Mfikirie Naomi, ambaye alifiwa na mume wake na watoto wake wawili wa kiume. Alisema hivi: “Msiniite Naomi. Niiteni Mara [yaani, “Uchungu”], kwa maana Mweza-Yote amenifanya kuwa na uchungu sana.” (Rut. 1:20, 21) Naomi alitenda kwa njia ya kawaida na inayoeleweka. Hata hivyo, kama Yosefu, Naomi hakupoteza imani katika Yehova na hakuyumba-yumba katika kushikilia utimilifu wake. Hivyo, Yehova akamthawabisha mwanamke huyo mwenye thamani. (Rut. 4:13-17, 22) Zaidi ya hayo, katika dunia Paradiso inayokuja, Yehova ataondoa madhara  yote yaliyosababishwa na Shetani na ulimwengu wake mwovu. “Mambo ya zamani hayatakumbukwa akilini, wala hayataingia moyoni.”—Isa. 65:17.

16. Tunapaswa kuwa na mtazamo gani kuelekea sala, na kwa nini?

¹⁶ Hata tukipatwa na majaribu gani, Mungu atatutegemeza kwa upendo wake. (Soma Waroma 8:35-39.) Ingawa Shetani hataacha kujaribu kutuvunja moyo, atashindwa ikiwa tutabaki tukiwa na “utimamu wa akili, na kukesha kuhusiana na sala.” (1 Pet. 4:7) Yesu alisema hivi: “Basi, endeleeni kukesha wakati wote mkiomba dua ili mpate kufanikiwa kuponyoka mambo yote hayo yaliyokusudiwa kutukia, na kusimama mbele ya Mwana wa binadamu.” (Luka 21:36) Ona kwamba Yesu alitumia neno “dua,” ambalo linamaanisha sala inayotolewa kwa bidii sana. Kwa kutuhimiza tutoe dua, Yesu alikuwa akikazia kwamba huu si wakati wa kupuuza msimamo wetu mbele zake na mbele za Baba yake. Ni wale tu walio na msimamo unaokubalika ndio watakaokuwa na tumaini la kuokoka siku ya Yehova.

Endelea Kuwa na Bidii Katika Utumishi wa Yehova

17. Ikiwa ni vigumu kuhubiri katika eneo lenu, unaweza kufaidika jinsi gani kutokana na mfano mzuri wa manabii wa kale?

¹⁷ Kushiriki katika utendaji mbalimbali wa kiroho kunatuburudisha. Hilo linatukumbusha maneno haya ya Petro: “Ninyi mnapaswa kuwa watu wa namna gani katika matendo matakatifu ya mwenendo na vitendo vya ujitoaji-kimungu!” (2 Pet. 3:11) Tendo kubwa zaidi kati ya matendo hayo ni kutangaza habari njema. (Mt. 24:14) Ni kweli kwamba inaweza kuwa vigumu kuhubiri katika maeneo fulani, labda kwa sababu ya upinzani au kwa sababu watu hawapendezwi na ujumbe wetu, au kwa sababu tu watu wana shughuli nyingi za kila siku za maisha. Watumishi wa kale wa Yehova walikabiliana na watu waliokuwa na mitazamo kama hiyo. Hata hivyo, hawakuvunjika moyo kamwe lakini waliendelea kurudi “tena na tena” wakiwa na ujumbe waliopewa na Mungu. (Soma 2 Mambo ya Nyakati 36:15, 16; Yer. 7:24-26) Ni nini kilichowasaidia kuvumilia? Waliona mgawo wao kama Yehova alivyouona, bali si kulingana na maoni ya ulimwengu. Pia, waliona kwamba ni heshima kubwa zaidi kuitwa kwa jina la Mungu.—Yer. 15:16.

18. Kazi ya kuhubiri kuhusu Ufalme itakuwa na matokeo gani juu ya kutukuzwa kwa jina la Mungu wakati ujao?

¹⁸ Sisi pia tuna pendeleo la kutangaza jina na kusudi la Yehova. Fikiria jambo hili: Kwa sababu ya kazi yetu ya kuhubiri, maadui wa Mungu hawatakuwa na kisingizio chochote watakapoikabili uso kwa uso siku kuu ya Yehova. Kwa kweli, kama Farao wa kale, watajua kwamba Yehova ndiye anayepigana nao. (Kut. 8:1, 20; 14:25) Wakati huohuo, Yehova atawathawabisha watumishi wake waaminifu kwa kuonyesha waziwazi kabisa kwamba kwa kweli, walikuwa wawakilishi wake.—Soma Ezekieli 2:5; 33:33.

19. Tunaweza kuonyesha jinsi gani kwamba tunafaidika na subira ya Yehova?

¹⁹ Karibu mwisho wa barua yake ya pili, Petro aliwaandikia hivi waamini wenzake: “Ioneni subira ya Bwana wetu kuwa wokovu.” (2 Pet. 3:15) Ndiyo, acheni tuendelee kufaidika na subira ya Yehova. Jinsi gani? Kwa kusitawisha sifa zinazompendeza, kwa kuendelea kuwa “bila doa na bila dosari,” kwa kuwa na mtazamo unaofaa kuelekea majaribu, na kwa kuendelea kuwa na bidii katika kazi ya Ufalme. Tukifanya hivyo, tutakuwa na nafasi nzuri ya kupata baraka zisizo na mwisho ambazo zinahusiana na “mbingu mpya na dunia mpya.”—2 Pet. 3:13.

Je, Unakumbuka?

• Tunaweza kusitawisha namna gani sifa zinazompendeza Mungu?

• Tunaweza jinsi gani kuendelea kuwa “bila doa na bila dosari”?

• Tunajifunza nini kutokana na mfano wa Yosefu na Naomi?

• Kwa nini ni pendeleo kubwa sana kushiriki katika kazi ya kuhubiri?

[Maswali ya Funzo]

[Picha katika ukurasa wa 9]

Ni nini kitakachowasaidia ninyi waume msitawishe sifa zinazompendeza Mungu, na kusaidia familia zenu kuzisitawisha?

[Picha katika ukurasa wa 10]

Tunaweza kujifunza nini kutokana na jinsi Yosefu alivyopambana na majaribu?