Mtegemee Yehova Kadiri Mwisho Unavyokaribia
Mtegemee Yehova Kadiri Mwisho Unavyokaribia
“Mtegemeeni Yehova, kwa nyakati zote.”—ISA. 26:4.
1. Ni tofauti gani iliyopo kati ya watumishi wa Mungu na watu wengine katika ulimwengu?
TUNAISHI katika ulimwengu ambamo mamilioni ya watu hawajui tena wamtegemee nani au wategemee nini, labda kwa sababu wameumizwa au wamekatishwa tamaa mara nyingi sana. Hali ni tofauti kama nini kwa watumishi wa Yehova! Wakiongozwa na hekima ya kimungu, wanajua kwamba si jambo la akili kuutegemea ulimwengu huu au ‘watu wake wenye vyeo.’ (Zab. 146:3) Badala yake, wanaweka maisha yao na wakati wao ujao katika mikono ya Yehova, huku wakijua kwamba anawapenda na kwamba sikuzote anatimiza Neno lake.—Rom. 3:4; 8:38, 39.
2. Yoshua alithibitisha jinsi gani kwamba Mungu ni mwenye kutegemeka?
2 Yoshua aliyeishi zamani alithibitisha kwamba Mungu ni mwenye kutegemeka. Alipokuwa akikaribia mwisho wa maisha yake, aliwaambia hivi Waisraeli wenzake: “Mnajua vema kwa mioyo yenu yote na kwa nafsi zenu zote kwamba halikukosa kutimia hata neno moja kati ya maneno yote mema ambayo Yehova Mungu wenu amewaambia ninyi. Yote yametimia kwenu.”—Yos. 23:14.
3. Jina la Mungu linafunua nini kumhusu?
3 Yehova anatimiza ahadi zake, si kwa sababu tu anawapenda watumishi wake bali hasa kwa ajili ya jina lake mwenyewe. (Kut. 3:14; 1 Sam. 12:22) Kuhusu jina la Mungu, utangulizi wa tafsiri moja ya Biblia (The Emphasized Bible) ya J. B. Rotherham, unasema: “[Jina hilo] ni mojawapo ya ahadi nzuri zaidi; na linaonyesha uwezo wa Mungu wa kubadilikana kulingana na hali zozote, matatizo yoyote, na uhitaji wowote unaoweza kutokea . . . [Ni] ahadi, . . . ufunuo, ukumbusho, kiapo. Mungu atakuwa mwaminifu sikuzote kwa Jina hilo; Hatalionea aibu kamwe.”
4. (a) Andiko la Isaya 26:4 linatuhimiza tufanye nini? (b) Tutachunguza nini katika habari hii?
4 Jiulize hivi: ‘Je, ninamjua Yehova vizuri sana hivi kwamba ninaweza kumtegemea kikamili? Je, ninatazamia wakati ujao nikiwa na uhakika, huku nikijua kwamba Mungu anaongoza mambo kabisa?’ Andiko la Isaya 26:4 linasema hivi: “Mtegemeeni Yehova, kwa nyakati zote, kwa maana katika Yah Yehova kuna Mwamba wa mpaka nyakati zisizo na kipimo.” Ni kweli kwamba siku hizi Mungu haingilii kimuujiza maisha ya watu kama alivyofanya pindi fulani katika nyakati za Biblia. Hata hivyo, akiwa “Mwamba wa mpaka nyakati zisizo na kipimo,” anaweza kutegemeka “kwa nyakati zote.” Mungu wetu mwenye kutegemeka anawasaidia jinsi gani waabudu wake waaminifu leo? Acheni tuchunguze njia tatu: Anatutia nguvu tunapotafuta msaada wake ili kupinga kishawishi, anatutegemeza tunapokabili upinzani wa moja kwa moja au watu wasiopendezwa na ujumbe wetu, na anatutia nguvu tunapolemewa na mahangaiko. Tunapochunguza njia hizo tatu, hakikisha kwamba unatafakari jinsi unavyoweza kulitia nguvu tumaini lako katika Yehova.
Mtegemee Mungu Unaposhawishiwa Kutenda Mambo Mabaya
5. Ni wakati gani ambapo tegemeo letu katika Mungu linaweza kujaribiwa sana?
5 Ni jambo moja kumtegemea Yehova inapohusu ahadi yake ya Paradiso au ufufuo, mambo ambayo tunatamani sana. Lakini linaweza kuwa jambo tofauti kabisa kumtegemea inapohusu masuala ya maadili, na kusadiki kabisa kutoka moyoni kwamba kutii njia zake na viwango vyake ni jambo linalofaa ambalo litatuletea furaha kubwa zaidi. Mfalme Sulemani aliandika shauri hili: “Mtegemee Yehova kwa moyo wako wote wala usitegemee uelewaji wako mwenyewe. Mtambue yeye katika njia zako zote, naye atanyoosha mapito yako.” (Met. 3:5, 6) Ona maneno “njia” zetu na “mapito” yetu. Ndiyo, tunapaswa kuonyesha kwamba tunamtegemea Mungu katika maisha yetu yote, bali hatumtegemei tu kuhusiana na tumaini letu la Kikristo. Tunaweza kuonyesha jinsi gani kwamba tunamtegemea Mungu vishawishi vinapotokea?
6. Tunaweza jinsi gani kutia nguvu azimio letu la kukataa kabisa mawazo mabaya?
6 Ili tuachane na mambo mabaya ni lazima kwanza tubadili njia yetu ya kufikiri. (Soma Waroma 8:5; Waefeso 2:3.) Basi, unaweza jinsi gani kutia nguvu azimio lako la kukataa kabisa mawazo mabaya? Fikiria njia hizi tano: 1. Tafuta msaada wa Mungu kupitia sala. (Mt. 6:9, 13) 2. Tafakari juu ya mifano ya Biblia inayohusu wale waliokosa kumsikiliza Yehova na wale waliomsikiliza. Kisha ona mambo yaliyowapata. * (1 Kor. 10:8-11) 3. Tafakari juu ya madhara ya kiakili na kihisia ambayo wewe na wapendwa wako mnaweza kupata kwa sababu ya dhambi. 4. Fikiria jinsi Mungu anavyohisi wakati mmoja wa watumishi wake anapoanguka katika dhambi nzito. (Soma Zaburi 78:40, 41.) 5. Wazia jinsi moyo wa Yehova unavyojaa shangwe anapoona mwabudu wake mshikamanifu akipinga mambo mabaya na kufanya yaliyo sawa, iwe mbele ya watu au faraghani. (Zab. 15:1, 2; Met. 27:11) Wewe pia unaweza kuonyesha kwamba unamtegemea Yehova.
Mtegemee Mungu Unapokabili Upinzani na Watu Wasiopendezwa na Ujumbe Wetu
7. Yeremia alipata majaribu gani, na nyakati fulani alihisi jinsi gani?
7 Ndugu zetu wengi wanatumika katika maeneo ambako ni vigumu sana kuvumilia. Nabii Yeremia alitumikia katika mazingira kama hayo, wakati ufalme wa Yuda ulipokuwa katika siku zake za mwisho zenye misukosuko. Kila siku imani yake ilijaribiwa kwa sababu alitangaza kwa utii ujumbe mbalimbali wa hukumu ya Mungu. Pindi fulani, hata mwandishi wake mshikamanifu, Baruku, alilalamika kwamba amechoka. (Yer. 45:2, 3) Je, Yeremia alivunjika moyo? Mara kwa mara, alishuka moyo. Alisema hivi: “Na ilaaniwe ile siku nilipozaliwa! Kwa nini nimetoka ndani ya tumbo la uzazi ili kuona kazi ngumu na huzuni na ili siku zangu zifikie mwisho wake katika aibu tupu?”—Yer. 20:14, 15, 18.
8, 9. Kulingana na andiko la Yeremia 17:7, 8 na Zaburi 1:1-3, ni lazima tufanye nini ili tuendelee kuzaa matunda mazuri?
8 Hata hivyo, Yeremia hakukata tamaa. Aliendelea kumtegemea Yehova. Kwa hiyo, nabii huyo mwaminifu aliona utimizo wa maneno haya ya Yehova kwenye Yeremia 17:7, 8: “Amebarikiwa yule mtu hodari anayemtegemea Yehova, na ambaye Yehova amekuwa uhakika wake. Na hakika yeye atakuwa kama mti uliopandwa kando ya maji, unaopeleka mizizi yake kando ya mto; naye hataona joto linapoingia, bali kwa kweli majani yake yatakuwa mengi. Na katika mwaka wa ukame hatahangaika, wala hataacha kuzaa matunda.”
9 Kama mti wa matunda wenye majani mengi “uliopandwa kando ya maji” au shamba la miti ya matunda linalomwagiliwa maji, Yeremia ‘hakuacha kamwe kuzaa matunda.’ Alikataa kushawishiwa na wadhihaki waovu waliomzunguka. Badala yake, alishikamana na yule aliye Chanzo cha “maji” yanayoendeleza uhai na akatii kila jambo ambalo Yehova alimwambia. (Soma Zaburi 1:1-3; Yer. 20:9) Yeremia ni kielelezo kizuri kwetu kama nini, hasa kwa wale ambao wanamtumikia Mungu katika maeneo magumu! Ikiwa unakabili hali kama hiyo, endelea kumtegemea sana Yehova, ambaye atakupatia uvumilivu unapoendelea ‘kulifanyia jina lake tangazo la hadharani.’—Ebr. 13:15.
10. Tuna baraka gani, na tunapaswa kujiuliza swali gani?
10 Kwa kweli, Yehova ametupatia vitu vingi vya kiroho ili kutusaidia kupambana na maisha katika siku hizi za mwisho. Kwa mfano, ameandaa Neno la Mungu lililo kamili, ambalo linatafsiriwa kwa usahihi katika lugha nyingi zaidi. Ameandaa chakula kingi cha kiroho kwa wakati unaofaa kupitia jamii ya mtumwa mwaminifu na mwenye busara. Na ametupatia ushirika wa umati mkubwa wa waamini wenzetu kwenye mikutano na makusanyiko ambao wanatutegemeza. Je, unatumia kikamili maandalizi hayo? Wote wanaofanya hivyo “watapiga vigelegele kwa shangwe kwa sababu ya hali nzuri ya moyo.” Hata hivyo, wale ambao hawamsikilizi Mungu, ‘watalia kwa sababu ya maumivu ya moyo na watapiga mayowe kwa sababu ya mvunjiko kabisa wa roho.’—Isa. 65:13, 14.
Mtegemee Mungu Unaposhughulika na Mahangaiko
11, 12. Kwa sababu ya matatizo ya ulimwengu, tunahitaji kufanya nini ikiwa tuna hekima ya kweli?
11 Kama ilivyotabiriwa, ole zinazowakumba wanadamu zinazidi kuongezeka kama mafuriko. (Mt. 24:6-8; Ufu. 12:12) Wakati mafuriko halisi yanapotokea, jambo ambalo watu wanafanya kwa kawaida ni kukimbilia sehemu ya juu au kupanda juu ya paa ya nyumba, yaani, sehemu yoyote iliyoinuka. Vivyo hivyo, matatizo ya ulimwengu yanapoongezeka, mamilioni ya watu wanatafuta kimbilio katika yale yanayoonekana kuwa maeneo yaliyoinuka kiuchumi, kisiasa, au mashirika ya kidini, na pia katika sayansi na teknolojia. Lakini hawawezi kupata usalama wa kweli katika mambo hayo yote. (Yer. 17:5, 6) Hata hivyo, watumishi wa Yehova wana kimbilio lililo hakika, yaani, “Mwamba wa mpaka nyakati zisizo na kipimo.” (Isa. 26:4) Mtunga-zaburi alisema hivi: “[Yehova] ni mwamba wangu na wokovu wangu, kilele changu salama.” (Soma Zaburi 62:6-9.) Tunaweza jinsi gani kuufanya Mwamba huo kuwa kimbilio letu?
12 Tunashikamana na Yehova wakati tunapotii Neno lake, ambalo mara nyingi linatofautiana na hekima ya kibinadamu. (Zab. 73:23, 24) Kwa mfano, huenda watu ambao wanaongozwa na hekima ya wanadamu wakasema: ‘Una maisha mafupi sana; yatumie kikamili.’ ‘Tafuta kazi nzuri ya maisha.’ ‘Chuma pesa nyingi.’ ‘Nunua hiki na kile.’ ‘Safiri; furahia ulimwengu.’ Kwa upande mwingine, hekima inayotoka kwa Mungu inapatana na shauri hili: “[Acheni] wale wanaoutumia ulimwengu wawe kama wale wasioutumia kwa ukamili; kwa maana tamasha ya ulimwengu huu inabadilika.” (1 Kor. 7:31) Vivyo hivyo, Yesu anatuhimiza sikuzote tutangulize mambo ya Ufalme na hivyo kujiwekea “hazina mbinguni,” ambako zitakuwa salama kabisa.—Mt. 6:19, 20.
13. Tukiwa na andiko la 1 Yohana 2:15-17 akilini, tunapaswa kujiuliza maswali gani?
13 Je, mtazamo wako kuelekea “ulimwengu” huu na “vitu vilivyo katika ulimwengu” unaonyesha kwamba unamtegemea Mungu kabisa? (1 Yoh. 2:15-17) Je, utajiri wa kiroho na mapendeleo ya utumishi wa Ufalme ni ya maana na yenye thamani zaidi kwako kuliko vitu vinavyotolewa na ulimwengu huu? (Flp. 3:8) Je, unajitahidi kudumisha ‘jicho rahisi’? (Mt. 6:22) Bila shaka, Mungu hataki ukose busara au uwe mtu asiyejali, hasa ikiwa una familia ambayo unapaswa kutunza. (1 Tim. 5:8) Lakini anatazamia watumishi wake wamtegemee kikamili, wasitegemee ulimwengu wa Shetani unaoangamia.—Ebr. 13:5.
14-16. Wengine wamefaidika jinsi gani kwa kudumisha ‘jicho rahisi’ na kutanguliza mambo ya Ufalme?
14 Fikiria mfano wa Richard na Ruth, wazazi wenye watoto watatu. Richard anasema hivi: “Nilihisi moyoni kwamba ningeweza kufanya mambo mengi zaidi kwa ajili ya Yehova. Nilikuwa na maisha mazuri lakini nilihisi kwamba nilikuwa nikimpa Mungu masalio tu. Baada ya kusali kuhusu jambo hilo na kuhesabu gharama, mimi na Ruth tulikubaliana kwamba ningemwomba mkubwa wangu wa kazi arekebishe ratiba yangu ili nifanye kazi kwa siku nne kila juma, hata ingawa wakati huo nchi yetu ilikuwa na matatizo ya kiuchumi. Ombi langu lilikubaliwa, na katika muda wa mwezi mmoja nilianza kufanya kazi kulingana na ratiba mpya.” Richard anahisi namna gani?
15 Anasema hivi: “Ninapokea mshahara ambao umepungua kwa asilimia 20 ukilinganishwa na mshahara niliokuwa nikipata, lakini sasa nina siku 50 za ziada kila mwaka za kuwa pamoja na familia yangu na kuwazoeza watoto. Nimeongeza mara mbili wakati ninaotumia katika huduma ya shambani, nimeongeza mara tatu hesabu ya mafunzo yangu ya Biblia, na ninafanya mengi zaidi katika kutaniko. Na kwa sababu nina wakati mwingi zaidi wa kusaidia kutunza watoto, Ruth ameweza kufanya utumishi wa painia msaidizi mara kwa mara. Nimeazimia kudumisha ratiba hii kwa muda mrefu iwezekanavyo.”
16 Roy na Petina, ambao bado wanaishi na binti yao nyumbani, walipunguza ratiba yao ya kazi ili washiriki katika huduma ya wakati wote. Roy anasema hivi: “Ninafanya kazi siku tatu kwa juma, na Petina anafanya kazi siku mbili. Pia, tulitoka katika nyumba kubwa na kuhamia nyumba ndogo, ambayo ni rahisi zaidi kutunza. Tulifanya upainia kabla ya kuzaa mwana na binti yetu, na hatukupoteza kamwe tamaa ya kufanya upainia. Hivyo, watoto wetu walipokuwa wakubwa, tulirudi tena katika huduma ya wakati wote. Hakuna kiasi cha pesa kinachoweza kulinganishwa na baraka ambazo tumepata.”
Acha “Amani ya Mungu” Ilinde Moyo Wako
17. Maandiko yamekufariji jinsi gani kuhusiana na mambo yasiyotazamiwa ambayo yanatokea maishani?
17 Hakuna yeyote kati yetu anayejua mambo yanayoweza kutokea kesho, kwa kuwa “wakati na tukio lisilotazamiwa” linatupata sisi sote. (Mhu. 9:11) Hata hivyo, kutojua mambo yanayoweza kutokea kesho hakupaswi kutuzuia tusiwe na amani ya akili leo, kama ilivyo kwa wale ambao hawana usalama unaotegemea uhusiano wa karibu pamoja na Mungu. (Mt. 6:34) Mtume Paulo aliandika hivi: “Msihangaike juu ya kitu chochote, bali katika kila jambo kwa sala na dua pamoja na kutoa shukrani maombi yenu na yajulishwe Mungu; na amani ya Mungu yenye ubora unaozidi fikira zote itailinda mioyo yenu na nguvu zenu za akili.”—Flp. 4:6, 7.
18, 19. Mungu anatufariji katika njia gani mbalimbali? Toa mfano.
18 Ndugu na dada wengi ambao wanapitia hali ngumu za maisha wamepata utulivu na amani ya moyoni kutoka kwa Yehova. Dada mmoja anasema hivi: “Daktari mpasuaji alijaribu tena na tena kuniogopesha ili nikubali kutiwa damu mishipani. ‘Salamu’ yake ya kwanza ilikuwa ‘Ni ujinga gani huu wa kutotiwa damu mishipani?’ Wakati huo na pia nyakati nyingine, nilisali kimyakimya kwa Yehova, na nikahisi nikiwa na amani yake moyoni. Nilijisikia nikiwa na nguvu kama mwamba. Ingawa nilikuwa dhaifu kwa sababu kiwango changu cha damu kilikuwa kimepungua sana, nilieleza sababu za Kimaandiko zilizo wazi kuhusu msimamo wangu.”
19 Nyakati nyingine Mungu anaweza kuandaa msaada tunaohitaji kupitia mwamini mwenzetu anayetufariji au kupitia chakula cha kiroho cha wakati unaofaa. Inaelekea kwamba umewahi kumsikia ndugu au dada fulani akisema: “Nilihitaji sana habari hii. Iliandikwa tu kwa ajili yangu!” Ndiyo, hata tuwe katika hali gani au tuwe na uhitaji gani, Yehova ataonyesha kwamba anatupenda tukimtegemea. Kwa vyovyote vile, sisi ni “kondoo” wake, naye ametuita kwa jina lake.—Zab. 100:3; Yoh. 10:16; Mdo. 15:14, 17.
20. Kwa nini watumishi wa Yehova watakaa kwa usalama ulimwengu wa Shetani utakapofikia mwisho wake?
20 Wakati wa “siku ya ghadhabu ya Yehova” inayokaribia sana, kila kitu ambacho ulimwengu wa Shetani unategemea kitaharibiwa. Dhahabu, fedha, na vitu vingine vyenye thamani havitaweza kuandaa usalama wowote. (Sef. 1:18; Met. 11:4) Kimbilio pekee litakuwa ‘Mwamba wetu wa mpaka nyakati zisizo na kipimo.’ (Isa. 26:4) Basi acheni tuonyeshe kwamba tunamtegemea Yehova kikamili sasa kwa kutembea kwa utii katika njia zake za uadilifu, kwa kutangaza ujumbe wake wa Ufalme hata tukikabili upinzani au watu wasiopendezwa na ujumbe wetu, na kwa kumtupia mahangaiko yetu yote. Tunapofanya mambo hayo, kwa kweli ‘tutakaa salama wala hatutasumbuliwa na hofu ya msiba.’—Met. 1:33.
[Maelezo ya Chini]
Je, Unaweza Kueleza?
Tunaweza kumtegemea Mungu jinsi gani
• tunaposhawishiwa kutenda mabaya?
• tunapokabili upinzani au watu wasiopendezwa na ujumbe wetu?
• tunaposhughulika na mahangaiko?
[Maswali ya Funzo]
[Picha katika ukurasa wa 13]
Kushikamana na viwango vya Mungu kunaleta furaha
[Picha katika ukurasa wa 15]
“Yehova ni Mwamba wa mpaka nyakati zisizo na kipimo”