“Uwe Hodari na Mwenye Nguvu Sana”
“Uwe Hodari na Mwenye Nguvu Sana”
“Uwe hodari na mwenye nguvu sana . . . Yehova Mungu wako yupo pamoja nawe.”—YOS. 1:7-9.
UNGEJIBUJE?
Ni katika njia gani Enoko na Noa walionyesha uhodari?
Wanawake fulani wa nyakati za kale walikuwaje mifano mizuri katika kuonyesha imani na uhodari?
Ni mifano gani ya vijana hodari ambayo inakuvutia?
1, 2. (a) Nyakati nyingine ni nini kinachohitajiwa ili kufanya mambo yaliyo sawa katika maisha yetu ya kila siku? (b) Tutachunguza nini katika makala hii?
UHODARI au ujasiri ni kinyume cha woga, kuona haya, na kuwa na hofu. Huenda tukafikiria kwamba mtu hodari ni yule aliye na nguvu, shujaa, na hata jasiri. Hata hivyo, nyakati nyingine, mtu anahitaji kuwa hodari na mtulivu ili kuendelea kufanya mambo yaliyo sawa katika maisha ya kila siku.
2 Watu fulani wanaotajwa katika masimulizi ya Biblia hawakuwa waoga hata walipokuwa chini ya hali ngumu sana. Wengine walionyesha uhodari katika hali za kawaida ambazo kwa ujumla zinawapata watumishi wa Yehova. Tunaweza kujifunza nini kutokana na mifano ya watu hodari wanaotajwa katika Biblia? Tunawezaje kuwa hodari?
MASHAHIDI HODARI KATIKA ULIMWENGU USIOMWOGOPA MUNGU
3. Enoko alitabiri nini kuhusu watu wasiomwogopa Mungu?
3 Ilihitaji uhodari ili kuwa shahidi wa Yehova miongoni mwa watu waovu duniani kabla ya Gharika ya siku za Noa. Hata hivyo, Enoko, mtu “wa saba kutoka kwa Adamu,” alitoa kwa ujasiri ujumbe huu wa kinabii: “Tazama! Yehova alikuja pamoja na watakatifu wake makumi ya maelfu, ili kufanya hukumu juu ya wote, na kuwathibitisha kuwa ni wenye hatia wote wasiomwogopa Mungu kuhusu matendo yao yote ya kutomwogopa Mungu ambayo walitenda kwa njia ya kutomwogopa Mungu, na kuhusu mambo yote ya kushtua ambayo watenda-dhambi wasiomwogopa Mungu walisema juu yake.” (Yuda 14, 15) Enoko alisema kana kwamba mambo hayo yalikuwa tayari yametukia kwa sababu unabii huo ungetimia kwa hakika. Na wanadamu wasiomwogopa Mungu waliangamia katika gharika iliyotukia duniani pote!
4. Noa “alitembea pamoja na Mungu” licha ya hali gani?
4 Gharika ilitukia katika mwaka wa 2370 K.W.K., miaka zaidi ya 650 baada ya huduma ya kinabii ya Enoko. Wakati huohuo, Noa alizaliwa, akalea wana, naye pamoja na wana hao wakajenga safina. Malaika waovu walikuwa wamejivika miili ya kibinadamu, wakachukua wanawake warembo, na kuzaa nao Wanefili. Isitoshe, uovu wa mwanadamu ulikuwa mwingi, na dunia ikajaa jeuri. (Mwa. 6:1-5, 9, 11) Licha ya hali zote hizo, “Noa alitembea pamoja na Mungu” na alitoa ushahidi kwa ujasiri akiwa “mhubiri wa uadilifu.” (Soma 2 Petro 2:4, 5.) Tunahitaji uhodari kama huo katika siku hizi za mwisho.
WALIONYESHA IMANI NA UHODARI
5. Musa alionyeshaje imani na uhodari?
5 Musa alikuwa mfano mzuri katika kuonyesha imani na uhodari. (Ebr. 11:24-27) Tangu mwaka wa 1513 hadi 1473 K.W.K., Mungu alimtumia Musa kuwaongoza Waisraeli kutoka Misri na pia kuwaongoza wakiwa nyikani. Musa alihisi kwamba hakuwa na uwezo wa kutimiza mgawo huo, lakini aliukubali. (Kut. 6:12) Yeye na ndugu yake, Haruni, walienda tena na tena mbele ya Farao wa Misri aliyekuwa mkatili na kwa uhodari wakatangaza Mapigo Kumi ambayo kupitia hayo Yehova aliiaibisha miungu ya Misri na kuwakomboa watu Wake. (Kut., sura ya 7-12) Musa alionyesha imani na uhodari kwa sababu alitegemezwa na Mungu asiyeweza kushindwa, kama tunavyotegemezwa leo.—Kum. 33:27.
6. Tukihojiwa na watu wenye mamlaka, tutawezaje kutoa ushahidi kwa uhodari?
6 Tunahitaji uhodari kama ule wa Musa, kwa sababu Yesu alisema hivi: “Mtakokotwa na kupelekwa mbele ya magavana na wafalme kwa ajili yangu, ili kuwa ushahidi kwao na kwa mataifa. Hata hivyo, watakapowapeleka ninyi, msihangaike juu ya jambo mtakalosema au jinsi mtakavyolisema; kwa maana mtapewa jambo la kusema katika saa hiyo; kwa maana wanaosema si ninyi tu, bali ni roho ya Baba yenu inayosema kupitia ninyi.” (Mt. 10:18-20) Tukihojiwa na watu wenye mamlaka, roho ya Yehova itatuwezesha kutoa ushahidi kwa heshima, kwa imani, na uhodari.—Soma Luka 12:11, 12.
7. Kwa nini Yoshua alikuwa hodari na mwenye mafanikio?
7 Kujifunza kwa ukawaida Sheria ya Mungu kulijenga imani na uhodari wa Yoshua, mrithi wa Musa. Katika mwaka wa 1473 K.W.K., Waisraeli walikuwa tayari kuingia katika Nchi ya Ahadi. Mungu alimwamuru hivi: “Uwe hodari na mwenye nguvu sana.” Kwa kutii Sheria, Yoshua angetenda kwa hekima naye angefanikiwa. Aliambiwa hivi: “Usitetemeke wala usiwe na hofu, kwa maana Yehova Mungu wako yupo pamoja nawe kila mahali unapoenda.” (Yos. 1:7-9) Maneno hayo yalimwimarisha Yoshua kama nini! Na bila shaka, kwa sababu Mungu alikuwa pamoja naye, walifanikiwa kuimiliki sehemu kubwa ya Nchi ya Ahadi katika muda wa miaka sita tu, yaani, kufikia mwaka wa 1467 K.W.K.
WANAWAKE MASHUJAA WALIOBAKI IMARA
8. Rahabu aliwekaje mfano katika kuonyesha imani na uhodari?
8 Kwa karne nyingi, wanawake wengi hodari wamesimama imara wakiwa waabudu mashujaa wa Yehova. Kwa mfano, Rahabu, kahaba wa Yeriko, alionyesha imani katika Mungu na kwa uhodari aliwaficha wale wapelelezi wawili waliotumwa na Yoshua, na kisha akawaelekeza vibaya wanaume waliotumwa na mfalme wa jiji hilo. Rahabu na familia yake waliokolewa wakati Waisraeli walipoteka jiji la Yeriko. Rahabu aliacha kazi yake ya ukahaba, akawa mwabudu mwaminifu wa Yehova, na akaja kuwa nyanya wa Masihi. (Yos. 2:1-6; 6:22, 23; Mt. 1:1, 5) Alibarikiwa kama nini kwa sababu ya imani na uhodari wake!
9. Debora, Baraka, na Yaeli walionyeshaje uhodari?
9 Baada ya kifo cha Yoshua karibu mwaka wa 1450 K.W.K., waamuzi waliwekwa rasmi ili kutekeleza haki katika Israeli. Mfalme Yabini wa Kanaani alikuwa amewakandamiza Waisraeli kwa miaka 20 Mungu alipomtumia nabii wa kike Debora amchochee Mwamuzi Baraka ili achukue hatua. Baraka alikusanya wanaume 10,000 kwenye Mlima Tabori na alikuwa tayari kupigana na Sisera, mkuu wa jeshi la Mfalme Yabini, ambaye aliingia katika bonde la mto la Kishoni pamoja na jeshi lake na magari ya vita 900. Waisraeli walipoingia katika bonde hilo, Mungu alileta mafuriko ya ghafula ambayo yalifanya uwanja wa mapigano ujae matope na kuyafanya magari ya vita ya Wakanaani yakwame. Wanaume wa Baraka walishinda, na “kambi yote ya Sisera ikaanguka kwa makali ya upanga.” Sisera mwenyewe alikimbilia ndani ya hema la Yaeli, lakini Yaeli alimuua Sisera alipokuwa amelala. Kulingana na maneno ya kinabii ambayo Debora alimwambia Baraka, “kile kitu cha kurembesha” kilichukuliwa na mwanamke Yaeli. Kwa kuwa Debora, Baraka, na Yaeli walitenda kwa uhodari, Israeli “ikawa bila usumbufu tena kwa miaka 40.” (Amu. 4:1-9, 14-22; 5:20, 21, 31) Wanaume na wanawake wengi wanaomwogopa Mungu wameonyesha imani na uhodari kama huo.
MANENO YETU YANAWEZA KUWACHOCHEA WENGINE WAWE HODARI
10. Kwa nini inaweza kusemwa kwamba maneno yetu yanaweza kuwachochea wengine kuwa hodari?
10 Yale tunayosema yanaweza kuwachochea waabudu wenzetu wa Yehova kuwa hodari. Katika karne ya 11 K.W.K., Mfalme Daudi alimwambia mwana wake Sulemani hivi: “Uwe hodari na mwenye nguvu nawe utende. Usiogope wala usiwe na hofu, kwa maana Yehova Mungu, Mungu wangu, yuko pamoja nawe. Hatakutupa wala kukuacha mpaka itakapomalizika kazi yote ya utumishi wa nyumba ya Yehova.” (1 Nya. 28:20) Sulemani alitenda kwa uhodari na akamjengea Yehova hekalu lenye utukufu huko Yerusalemu.
11. Maneno ya uhodari ya msichana Mwisraeli yalimsaidiaje mwanamume mmoja?
11 Katika karne ya kumi K.W.K., maneno ya uhodari ya msichana Mwisraeli yalimsaidia mtu mmoja kupona ukoma wake na kujifunza kumhusu Yehova. Msichana huyo alikuwa ametekwa na kikundi cha waporaji na akaja kuwa mjakazi wa mkuu wa jeshi la Siria, mwenye ukoma, Naamani. Msichana huyo alijua habari za miujiza ambayo Yehova alifanya kupitia nabii Elisha, naye akamwambia mke wa Naamani kwamba ikiwa mume wake angesafiri kwenda Israeli, nabii wa Mungu angemponya. Naamani alienda Israeli, akaponywa kimuujiza, naye akawa mwabudu wa Yehova. (2 Fal. 5:1-3, 10-17) Ikiwa wewe ni kijana anayempenda Mungu kama msichana huyo, Mungu anaweza kukupa uhodari ili uwahubirie walimu, wanafunzi wenzako, na watu wengine.
12. Maneno ya Mfalme Hezekia yaliwachocheaje raia wake?
12 Katika nyakati ngumu, maneno yanayosemwa kwa busara yanaweza kuwachochea wengine kuwa hodari. Waashuru waliposhambulia Yerusalemu katika karne ya nane K.W.K., Mfalme Hezekia aliwaambia raia wake hivi: “Iweni hodari na wenye nguvu. Msiogope wala msiwe na hofu kwa sababu ya mfalme wa Ashuru na kwa sababu ya umati wote ulio pamoja naye; kwa maana kuna wengi walio pamoja nasi kuliko wale walio pamoja naye. Yeye, mkono wa nyama uko pamoja naye, lakini sisi, Yehova Mungu wetu yuko pamoja nasi ili kutusaidia na kupigana vita vyetu.” Watu walipokeaje maneno hayo? Na “watu wakaanza kujitegemeza juu ya maneno ya Hezekia”! (2 Nya. 32:7, 8) Maneno kama hayo yanaweza kutuchochea na kuwachochea Wakristo wengine wawe hodari zaidi wakati wanapoteswa.
13. Kwa nini Obadia msimamizi-nyumba wa Mfalme Ahabu aliweka mfano mzuri katika kuonyesha uhodari?
13 Nyakati nyingine uhodari unaonyeshwa kwa yale tunayofanya na si kwa yale tunayosema. Katika karne ya kumi K.W.K., Obadia, msimamizi-nyumba wa Mfalme Ahabu, kwa uhodari aliwaficha manabii mia moja wa Yehova katika “vikundi viwili vya watu 50 pangoni” ili wasiuawe kwa amri ya malkia mwovu Yezebeli. (1 Fal. 18:4) Kama Obadia aliyemwogopa Mungu, leo watumishi wengi washikamanifu wa Yehova kwa uhodari wamewalinda waamini wenzao kwa kukataa kuwapa watesaji habari kuwahusu waamini hao.
ESTA—MALKIA HODARI
14, 15. Malkia Esta alionyeshaje imani na uhodari, na kulikuwa na matokeo gani?
14 Malkia Esta alionyesha imani kubwa na uhodari wakati Hamani aliyekuwa mwovu alipopanga njama ya kuwaangamiza Wayahudi katika milki yote ya Uajemi katika karne ya tano K.W.K. Haishangazi kwamba Wayahudi waliomboleza na kufunga na bila shaka walisali kwa moyo wao wote! (Esta 4:1-3) Malkia Esta alikuwa amehuzunika sana. Binamu yake Mordekai alimtumia nakala ya sheria iliyoruhusu maangamizi ya Wayahudi na akamwamuru Esta aende mbele ya mfalme ili kuwatetea Wayahudi wenzake. Lakini mtu yeyote ambaye alienda kwa mfalme bila kualikwa aliuawa.—Esta 4:4-11.
15 Hata hivyo, Mordekai alimwambia Esta hivi: ‘Ikiwa utanyamaza ukombozi utasimama kutoka mahali pengine. Lakini ni nani anayejua ikiwa si kwa ajili ya wakati kama huu kwamba umefikia heshima ya kifalme?’ Esta akamhimiza Mordekai awakusanye Wayahudi huko Shushani ili wafunge kwa ajili yake. “Nitafunga vivyo hivyo,” Esta akasema, “na baada ya hapo nitaingia kwa mfalme, jambo ambalo ni kinyume cha sheria. Nami nikiangamia, na niangamie.” (Esta 4:12-17) Esta alitenda kwa uhodari, na kitabu kinachoitwa kwa jina lake kinaonyesha kwamba Mungu aliwakomboa watu wake. Katika siku zetu, Wakristo watiwa-mafuta na waandamani wao waliojiweka wakfu wanaonyesha uhodari kama huo chini ya majaribu, na “msikiaji wa sala” yuko upande wao sikuzote.—Soma Zaburi 65:2; 118:6.
“JIPENI MOYO”
16. Yesu aliwawekea vijana wetu mfano gani?
16 Pindi moja katika karne ya kwanza W.K., Yesu akiwa na umri wa miaka 12, alipatikana katika hekalu, “ameketi katikati ya walimu, akiwasikiliza na kuwauliza maswali.” Isitoshe, “wale wote waliokuwa wakimsikiliza walikuwa wakishangazwa daima na uelewaji wake na majibu yake.” (Luka 2:41-50) Ingawa alikuwa kijana mdogo, Yesu alikuwa na imani na uhodari uliohitajiwa ili kuwauliza maswali walimu wazee waliokuwa hekaluni. Kukumbuka mfano wa Yesu kutawasaidia vijana katika kutaniko la Kikristo kutumia fursa zote wanazopata ili ‘kujitetea mbele ya kila mtu ambaye hutaka kutoka kwao sababu ya tumaini lao.’—1 Pet. 3:15.
17. Kwa nini Yesu aliwahimiza wanafunzi wake ‘wajipe moyo,’ na kwa nini tunahitaji kutenda kwa uhodari?
17 Yesu aliwahimiza wengine ‘wajipe moyo.’ (Mt. 9:2, 22) Aliwaambia hivi wanafunzi wake: “Tazameni! Saa inakuja, kwa kweli, imekuja, wakati mtakapotawanyika na kwenda kila mmoja kwenye nyumba yake nanyi mtaniacha peke yangu; na bado siko peke yangu, kwa sababu Baba yuko pamoja nami. Nimewaambia mambo haya ili kupitia kwangu mpate kuwa na amani. Ulimwenguni mna dhiki, lakini jipeni moyo! Mimi nimeushinda ulimwengu.” (Yoh. 16:32, 33) Kama wafuasi wa mapema wa Yesu, sisi pia tunakabiliana na chuki ya ulimwengu, lakini acheni tusiwe kama ulimwengu. Kutafakari juu ya mfano wa uhodari wa Mwana wa Mungu kunaweza kutupatia uhodari au ujasiri wa kukataa kuchafuliwa na ulimwengu huu. Aliushinda ulimwengu, sisi pia tunaweza kuushinda.—Yoh. 17:16; Yak. 1:27.
“JIPE MOYO!”
18, 19. Mtume Paulo alitoa uthibitisho gani wa imani na uhodari?
18 Mtume Paulo alivumilia majaribu mengi. Pindi moja, Wayahudi huko Yerusalemu walikuwa karibu kumrarua vipande-vipande, lakini askari-jeshi Waroma wakamwokoa. Wakati wa usiku, “Bwana akasimama kando yake na kusema: ‘Jipe moyo! Kwa maana kama vile ambavyo umekuwa ukitoa ushahidi kamili katika Yerusalemu juu ya mambo yanayonihusu, vivyo hivyo utatoa ushahidi katika Roma pia.’” (Mdo. 23:11) Paulo alifanya vivyo hivyo.
19 Bila woga, Paulo aliwakemea ‘mitume walio bora sana,’ ambao walitaka kulichafua kutaniko huko Korintho. (2 Kor. 11:5; 12:11) Tofauti na mitume hao, Paulo angeweza kuonyesha uthibitisho wa utume wake, kama vile vifungo, mapigo, safari zenye hatari, hatari nyingine, njaa, kiu, na usiku mwingi bila usingizi, na pia mahangaiko mengi kuhusu waamini wenzake. (Soma 2 Wakorintho 11:23-28.) Huo ni mfano bora kama nini wa imani na uhodari, na ulithibitisha kwamba Paulo aliimarishwa na Mungu!
20, 21. (a) Toa mfano unaoonyesha kwamba ni lazima tuendelee kujipa uhodari. (b) Huenda tukahitaji kuonyesha uhodari chini ya hali gani, na tunaweza kuwa na hakika kuhusu nini?
20 Si Wakristo wote ambao watateswa vikali. Hata hivyo, wote wanahitaji kujipa ujasiri ili kupambana na matatizo ya maisha. Kwa mfano: Kijana mmoja huko Brazili alikuwa mshiriki wa genge moja. Baada ya kujifunza Biblia, aliona uhitaji wa kufanya mabadiliko, lakini kwa kawaida yeyote aliyetoka katika genge hilo aliuawa. Kijana huyo alisali, na akatumia maandiko ili kumwonyesha kiongozi wa genge hilo kwa nini hangeweza kuendelea kushirikiana nao. Kijana huyo aliruhusiwa kwenda zake bila kuadhibiwa na akawa mhubiri wa Ufalme.
21 Uhodari unahitajiwa ili kuhubiri habari njema. Vijana Wakristo wanahitaji sifa hiyo ili kudumisha utimilifu shuleni. Uhodari unahitajiwa ili mtu aombe likizo kazini ili kuhudhuria vipindi vyote vya kusanyiko la wilaya. Na tungeweza kutoa mifano mingine mingi. Hata hivyo, licha ya matatizo ambayo tunakabili, Yehova atasikiliza ‘sala zetu za imani.’ (Yak. 5:15) Na bila shaka, anaweza kutupatia roho yake takatifu ili tuweze ‘kuwa hodari na wenye nguvu sana’!
[Maswali ya Funzo]
[Picha katika ukurasa wa 11]
Enoko alihubiri kwa uhodari katika ulimwengu ambao haukumwogopa Mungu
[Picha katika ukurasa wa 12]
Yaeli alikuwa hodari na mwenye nguvu
