Walijitoa Wenyewe kwa Hiari Nchini Ekuado

NDUGU mmoja kijana nchini Italia alikuwa chini ya mkazo. Alikuwa ametoka tu kumaliza elimu yake ya sekondari, naye alikuwa amepata alama za juu katika darasa lao, kwa hiyo, watu wake wa ukoo na walimu walimhimiza afuatilie elimu ya juu. Hata hivyo, miaka michache mapema, Bruno alijiweka wakfu kwa Yehova, akiahidi kutanguliza mapenzi ya Mungu katika maisha yake. Aliamua kufanya nini? Anaeleza hivi: “Nilimwambia Yehova katika sala kwamba nitaishi kulingana na wakfu wangu na kumtanguliza maishani. Lakini niliongeza kwa unyoofu katika sala kwamba sikutaka kuwa na maisha yenye kuchosha, bali maisha yenye shughuli mbalimbali katika utumishi wake.”

 Miaka michache baadaye, Bruno akahamia Ekuado, Amerika ya Kusini. Anasema hivi: “Yehova alijibu sala yangu kuliko nilivyotazamia.” Alipofika Ekuado, alishangaa kukutana na vijana wengine wengi ambao pia walihamia huko ili kumtumikia Yehova kwa njia kubwa zaidi.

VIJANA ‘WALIOMJARIBU YEHOVA’

Kuna maelfu ya vijana wengine ulimwenguni pote kama Bruno waliokubali mwaliko huu wa Yehova: “Tafadhali, mnijaribu, . . . kama sitawafungulia ninyi malango ya mbinguni na kuwamwagia baraka.” (Mal. 3:10) Wakichochewa na upendo wao kwa Mungu, waliamua ‘kumjaribu Yehova’ kwa kutoa kwa hiari wakati, nguvu, na mali zao ili kutegemeza kazi yake katika nchi ambazo zina uhitaji mkubwa zaidi wa wahubiri wa Ufalme.

Mara tu baada ya kufika katika migawo yao mipya, wajitoleaji hao hujionea kihalisi kwamba “mavuno ni mengi, lakini wafanyakazi ni wachache.” (Mt. 9:37) Kwa mfano, Jaqueline kutoka Ujerumani aliiandikia ofisi ya tawi ya Ekuado hivi kwa uchangamfu: “Nimekuwa nikitumikia nchini Ekuado kwa zaidi ya miaka miwili hivi, nami tayari nina mafunzo 13 ya Biblia, na 4 kati yao wanahudhuria mikutano kwa ukawaida. Je, hilo si jambo la kupendeza?” Chantal kutoka Kanada anasema hivi: “Mnamo mwaka 2008, nilihamia katika eneo la pwani la Ekuado ambako kulikuwa na kutaniko moja tu. Sasa kuna makutaniko  matatu na mapainia zaidi ya 30 katika eneo hilo. Hakuna kitu chochote kinachoweza kulinganishwa na furaha inayotokana na kuona wapya wengi wakifanya maendeleo!” Anaongezea: “Hivi karibuni nilihamia katika jiji lililo mita 2,743 hivi kwenye Milima ya Andes. Ingawa jiji hilo lina wakazi zaidi ya 75,000, kuna kutaniko moja tu. Ni eneo lenye matokeo sana! Ninafurahia sana utumishi.”

MATATIZO YANAYOHUSIKA

Bila shaka, kutumika katika nchi za kigeni kunatokeza matatizo mengi. Kwa kweli, vijana wengine walikabili matatizo hata kabla ya kuhamia katika eneo. Kayla kutoka Marekani anasema: “Itikio lisilofaa la ndugu fulani wenye nia nzuri katika kutaniko la nyumbani lilivunja moyo. Hawakuelewa kwa nini nilitaka kuhamia nchi ya kigeni ili kufanya upainia. Nyakati nyingine, jambo hilo lilinifanya nijiulize, ‘Je, ninafanya uamuzi unaofaa?’” Hata hivyo, Kayla aliamua kuhama. Anaeleza hivi: “Nilitoa sala nyingi kwa Yehova na pia nilizungumza kwa muda mrefu na ndugu na dada wakomavu walionisaidia kuona kwamba Yehova hubariki roho ya kuwa tayari kujitolea.”

Kujifunza lugha mpya ni tatizo kwa wengi. Siobhan kutoka Ireland anakumbuka hivi: “Niliumia moyoni kwa sababu ya kushindwa kujieleza. Ilinilazimu kujifunza kuwa mwenye subira, kujifunza lugha kwa bidii, na kujicheka mwenyewe nilipokosea.” Anna kutoka Estonia, aongeza: “Kuzoea eneo lenye joto, vumbi nyingi, na ukosefu wa maji ya moto ya kuoga, matatizo yote hayo hayangeweza kamwe kulinganishwa na kujifunza lugha ya Kihispania. Nyakati nyingine, nilikuwa karibu kuacha kabisa kujifunza lugha hiyo. Nililazimika kujifunza kukazia fikira maendeleo yangu, bali si makosa yangu.”

Pia kuna ile tamaa ya kutaka kurudi nyumbani. Jonathan kutoka Marekani anakiri hivi: “Muda mfupi baada ya kufika katika eneo, nilivunjika moyo kwa sababu ya kuwa mbali na familia na marafiki wangu. Lakini nilishinda hisia hizo kwa kukazia fikira funzo langu la kibinafsi la Biblia na huduma. Baada ya muda mfupi, matokeo yenye kusisimua niliyopata katika utumishi na marafiki wapya niliopata kutanikoni, walinisaidia kuwa tena mwenye shangwe.”

Tatizo lingine ni hali za maisha. Inaelekea kwamba maisha yatakuwa tofauti na yale uliyozoea. Beau kutoka Kanada anatuambia hivi: “Katika nchi yenu, huenda unapuuza huduma za msingi kama vile  umeme au maji ya bomba. Lakini katika eneo jipya huduma hizo hazipatikani kwa ukawaida.” Umaskini, hali ngumu za usafiri, na kutojua kusoma na kuandika ni mambo ya kawaida pia katika nchi nyingi zinazoendelea. Ines kutoka Austria anakabiliana na hali hizo kwa kukazia fikira sifa nzuri za wenyeji. Anasema hivi: “Ni wenye ukarimu sana, wapole, wenye kusaidia, na wanyenyekevu. Jambo muhimu zaidi ni kwamba wanapenda sana kujifunza mengi zaidi kumhusu Mungu.”

“BARAKA HATA KUSIWE NA UHITAJI TENA”

Ingawa vijana hao wote wanaotumikia nchini Ekuado wamejidhabihu sana, wanajionea kwamba Yehova anawaandalia “kwa wingi zaidi kupita mambo yote” waliyotarajia. (Efe. 3:20) Kwa kweli, wanahisi kwamba wamepokea “baraka hata kusiwe na uhitaji tena.” (Mal. 3:10) Hivi ndivyo wanavyohisi kuhusu huduma yao:

Bruno: “Nilianza utumishi wangu hapa Ekuado katika eneo lenye kuvutia la Amazoni. Baadaye, nilisaidia katika upanuzi wa ofisi ya tawi ya Ekuado. Sasa ninatumikia Betheli. Nilipokuwa Italia, nilifanya uamuzi wa kumtanguliza Yehova, naye kwa kweli anatimiza tamaa yangu ya kuwa na maisha yenye kusisimua na yenye shughuli mbalimbali katika utumishi wake.”

Beau: “Nimekuwa karibu sana na Yehova kwa sababu nikiwa Ekuado ninaweza kutumia wakati wangu wote kwa ajili ya mambo ya kiroho. Wakati huohuo, nimekuwa na pendeleo la ziada la kutembelea sehemu zenye kuvutia, jambo ambalo nilitaka sana kufanya.”

Anna: “Sikufikiria kwamba ningeweza kufurahia maisha kama ya mmishonari nikiwa dada mseja. Lakini sasa ninajua kwamba inawezekana. Kwa sababu ya baraka za Yehova, ninafurahia sana kazi ya kufanya wanafunzi, kujenga Majumba ya Ufalme, na kupata marafiki wapya.”

Elke: “Nilipokuwa katika nchi yangu ya Austria, nilisali mara nyingi kwa Yehova ili nipate funzo moja tu la Biblia. Lakini hapa nina mafunzo 15 ya Biblia! Ninaridhika sana ninapoona nyuso zenye furaha za wanafunzi wa Biblia wanaofanya maendeleo.”

Joel: “Ni jambo la pekee kufika katika eneo usilojua ili kumtumikia Yehova. Unajifunza kumtegemea zaidi Yehova, na inasisimua kuona akibariki jitihada zako! Katika mwaka wangu wa kwanza hapa nilipotoka Marekani, kikundi ambacho ninashirikiana nacho kiliongezeka kutoka wahubiri 6 mpaka 21. Tulikuwa na hudhurio la watu 110 kwenye Ukumbusho.”

VIPI WEWE?

Ninyi ndugu na dada vijana, je, hali zenu zinawaruhusu mtumikie katika eneo lenye uhitaji mkubwa zaidi wa wahubiri wa Ufalme? Bila shaka, ili ufanye uamuzi mkubwa kama huo unahitaji kupanga mambo vizuri. Na zaidi ya mambo yote, unahitaji kumpenda sana Yehova na jirani ili uhamie eneo lenye uhitaji. Ikiwa una upendo huo nawe unastahili kuhamia eneo lenye uhitaji, sali kwa bidii kwa Yehova kuhusu kutumikia katika nchi nyingine. Zungumza na wazazi wako Wakristo na wazee wa kutaniko lenu kuhusu tamaa yako. Huenda ukakata kauli kwamba hata wewe unaweza kufurahia kushiriki katika aina hii ya utumishi mtakatifu ambao unasisimua na kuridhisha.

[Blabu katika ukurasa wa 3]

“Nilitoa sala nyingi kwa Yehova na pia nilizungumza kwa muda mrefu na ndugu na dada wakomavu walionisaidia kuona kwamba Yehova hubariki roho ya kuwa tayari kujitolea.”​—Kayla kutoka Marekani

[Sanduku/​Picha katika ukurasa wa 6]

Jinsi ya kujitayarisha kutumikia katika nchi ya kigeni

• Uwe na mazoea mazuri ya kujifunza kibinafsi

• Pitia Huduma Yetu ya Ufalme ya Agosti 2011, ukurasa wa 4-6

• Zungumza na wengine ambao wametumikia katika nchi ya kigeni

• Fanya utafiti kuhusu historia na utamaduni wa nchi hiyo

• Jifunze mambo ya msingi kuhusu lugha ya nchi hiyo

[Sanduku/​Picha katika ukurasa wa 6]

Wengine wanaotumikia katika nchi nyingine wanajitegemeza kifedha kwa . . .

• kufanya kazi kwa miezi michache kila mwaka katika nchi yao

• kupangisha nyumba, chumba, au biashara yao

• kufanya kazi kupitia Intaneti

[Picha katika ukurasa wa 4, 5]

1 Jaqueline kutoka Ujerumani

2 Bruno kutoka Italia

3 Beau kutoka Kanada

4 Siobhan kutoka Ireland

5 Joel kutoka Marekani

6 Jonathan kutoka Marekani

7 Anna kutoka Estonia

8 Elke kutoka Austria

9 Chantal kutoka Kanada

10 Ines kutoka Austria