1, 2. Ni vita gani halisi ambavyo viko karibu kuanza, na watumishi wa Mungu hawatahitaji kufanya nini katika vita hivyo?

MNAMO Oktoba 30, 1938, mamilioni ya watu nchini Marekani walikuwa wakisikiliza kipindi maarufu cha redio cha michezo ya kuigiza. Jioni hiyo, kulikuwa na mchezo uliotegemea kitabu cha hekaya za kisayansi kinachoitwa The War of the Worlds. Waigizaji waliojifanya kuwa watangazaji wa habari walisema kwamba viumbe kutoka sayari ya Mihiri wangeivamia Dunia na kusababisha uharibifu mkubwa. Ingawa ilikuwa imetangazwa kwamba huo ulikuwa mchezo wa kuigiza, wasikilizaji wengi walidhani kwamba uvamizi huo ulikuwa halisi na hivyo wakaogopa sana. Wengine hata walichukua hatua fulani za kujilinda kutokana na viumbe hao wa kuwaziwa.

² Leo, kuna vita halisi vinavyokaribia kuanza. Hata hivyo, watu wengi hawachukui hatua yoyote ya kujilinda. Vita hivyo havijatabiriwa katika kitabu cha hekaya za kisayansi, bali katika Biblia, Neno la Mungu lililoongozwa na roho takatifu. Ni vita vya Har–Magedoni—vita vya Mungu vya kuuharibu mfumo huu mwovu wa mambo. (Ufu. 16:14-16) Katika vita hivyo, watumishi wa Mungu walio duniani hawatahitaji kujilinda kutokana na viumbe kutoka sayari nyingine. Hata hivyo, watashtushwa na matukio yenye kustaajabisha na yenye kuogopesha ya nguvu za Mungu.

3. Tutachunguza unabii gani, na kwa nini tupendezwe na unabii huo?

³ Unabii wa Biblia ulioandikwa katika Zekaria sura ya 14 unahusiana moja kwa moja na vita vya Har–Magedoni. Ingawa uliandikwa miaka 2,500 hivi iliyopita, unabii huo unahusu maisha yetu. (Rom. 15:4) Mambo mengi yanayotajwa katika unabii huo yanahusu hali zinazowaathiri watu wa Mungu tangu Ufalme wa Kimasihi uliposimamishwa mbinguni mwaka wa 1914 na  pia unahusu matukio yenye kusisimua tutakayoona hivi karibuni. Mambo yenye kuvutia ya unabii huo yanatia ndani kutokea kwa “bonde kubwa sana,” na kutiririka kwa “maji yaliyo hai.” (Zek. 14:4, 8) Bonde hilo linatimiza sehemu muhimu katika kuwalinda waabudu wa Yehova. Na tukielewa jinsi maji hayo yaliyo hai yanavyoweza kutunufaisha, tutaona umuhimu wa kuyanywa na pia tutasitawisha hamu ya kutaka kunywa maji hayo. Hivyo, tutafaidika tukikazia sana uangalifu unabii huo.—2 Pet. 1:19, 20.

4. (a) “Siku ya Yehova” ilianza lini? (b) Waabudu wa Yehova walitangaza nini miaka mingi kabla ya 1914, na viongozi wa ulimwengu waliitikiaje?

⁴ Sura ya 14 ya kitabu cha Zekaria inaanza kwa kutaja “siku ya Yehova.” (Soma Zekaria 14:1, 2.) Siku ya Yehova ni nini? Ni ile “siku ya Bwana,” ambayo ilianza wakati “ufalme wa ulimwengu” ulipokuwa “ufalme wa Bwana wetu na wa Kristo wake.” (Ufu. 1:10; 11:15) Siku hiyo ilianza mwaka wa 1914 wakati Ufalme wa Kimasihi ulipoanza mbinguni. Miaka mingi kabla ya mwaka wa 1914, waabudu wa Yehova waliwatangazia watu wa mataifa kwamba mwisho wa “nyakati zilizowekwa za mataifa” ungefika mwaka huo na kwamba ulimwengu ungeingia katika kipindi cha matatizo ambacho hakijawahi kamwe kutokea duniani. (Luka 21:24) Watu wa mataifa waliitikiaje? Badala ya kutii onyo hilo lililotolewa kwa wakati unaofaa, viongozi wa kisiasa na wa kidini waliwadhihaki na kuwatesa waeneza-injili hao watiwa-mafuta wenye bidii. Kwa hiyo, viongozi hao wa ulimwengu walimdhihaki Mungu Mweza Yote, kwa kuwa mabalozi wa Ufalme watiwa-mafuta wanawakilisha “Yerusalemu la mbinguni,” yaani, Ufalme wa Kimasihi kwa sababu wao ni sehemu ya Ufalme huo.—Ebr. 12:22, 28.

5, 6. (a) Ni hatua gani iliyotabiriwa ambayo mataifa yalichukua dhidi ya “jiji hilo” na ‘raia’ wake? (b) ‘Watu waliobaki’ ni akina nani?

⁵ Zekaria alitabiri hatua ambayo mataifa yangechukua kwa kusema hivi: “Jiji hilo [Yerusalemu] litatekwa.” “Jiji hilo” la mfano ni Ufalme wa Kimasihi wa Mungu. Linawakilishwa duniani na ‘raia’ wake, yaani, Wakristo watiwa-mafuta ambao wangali duniani. (Flp. 3:20) Wakati wa Vita vya Kwanza vya Ulimwengu, washiriki wenye madaraka wa sehemu ya kidunia ya tengenezo la Yehova “walitekwa,” au kukamatwa, na kufungwa gerezani huko Atlanta, Georgia, Marekani. ‘Nyumba zao zilinyakuliwa’ katika maana ya kwamba walikandamizwa na kutendewa kwa ukatili pamoja na watu wengine wasio na hatia walioshika utimilifu. Ni kana kwamba wavamizi walipora utajiri wa watiwa-mafuta hao kwa kupiga marufuku machapisho yao na kuzuia kazi yao ya kutangaza Ufalme.

⁶ Ingawa watu wa Mungu walikuwa wachache, uwongo ulienezwa kuwahusu, wakapingwa, na kuteswa na wavamizi, ibada ya kweli haingeweza kufutiliwa mbali. Kulikuwa na ‘watu waliobaki,’ yaani, watiwa-mafuta waliobaki duniani ambao walikataa kwa ushikamanifu ‘kukatiliwa mbali kutoka katika jiji hilo.’

7. Utimilifu wa Mashahidi wa Yehova watiwa-mafuta unawawekea mfano gani waabudu wote wa kweli leo?

⁷ Je, unabii huo ulitimia kikamili kufikia mwishoni mwa Vita vya Kwanza vya Ulimwengu? Hapana. Mataifa yangeendelea kuwashambulia watiwa-mafuta walio duniani na waandamani wao washikamanifu wenye tumaini la kuishi milele duniani. (Ufu. 12:17) Vita vya Pili vya Ulimwengu vilithibitisha jambo hilo. Utimilifu wa Mashahidi waaminifu wa Mungu watiwa-mafuta unawachochea watumishi wa Mungu leo kuvumilia majaribu yoyote wanayokabili, kutia ndani upinzani kutoka kwa watu  wa familia yao wasioamini, wafanyakazi wenzao, au wanashule wenzao wanaowadhihaki kwa sababu ya imani yao. (1 Pet. 1:6, 7) Haidhuru wanaishi eneo gani, waabudu wa kweli wameazimia kuliko wakati mwingine wowote ule ‘kusimama imara katika roho moja,’ bila ‘kuwaogopa wapinzani wao.’ (Flp. 1:27, 28) Hata hivyo, watu wa Yehova watapata wapi usalama katika ulimwengu unaowachukia?—Yoh. 15:17-19.

8. (a) Katika Biblia, milima inaweza kufananisha nini? (b) Ule “mlima wa mizeituni” unafananisha nini?

⁸ Kwa kuwa Yerusalemu—‘lile jiji’—linafananisha Yerusalemu la mbinguni, basi ule “mlima wa mizeituni, ulioko mbele ya Yerusalemu,” lazima uwe wa mfano. Mlima huo unafananisha nini? Nao “utapasuliwa katikati” na kuwa milima miwili kwa njia gani? Kwa nini Yehova anaiita “milima yangu”? (Soma Zekaria 14:3-5.) Katika Biblia, milima inaweza kufananisha falme, au serikali. Baraka na ulinzi huhusianishwa pia na mlima wa Mungu. (Zab. 72:3; Isa. 25:6, 7) Kwa hiyo, mlima wa mizeituni ambapo Mungu anasimama upande wa mashariki wa Yerusalemu la kidunia unafananisha enzi kuu ya Yehova ya ulimwengu wote, yaani, utawala wake mkuu zaidi.

9. “Mlima wa Mizeituni” unapasuliwa katikati katika maana gani?

⁹ Kupasuliwa katikati kwa mlima wa mizeituni kunamaanisha nini? Mlima huo, ulio mashariki mwa Yerusalemu, unapasuliwa katikati katika maana ya kwamba Yehova anasimamisha utawala mwingine mdogo. Utawala huo wa pili ni Ufalme wa Kimasihi ulio mikononi mwa Yesu Kristo. Ndiyo sababu Yehova anatumia maneno “milima yangu” kuirejelea ile milima miwili inayotokana na kupasuliwa kwa ule “Mlima wa Mizeituni.” (Zek. 14:4) Milima yote miwili ni yake.

10. Lile “bonde kubwa sana” katikati ya ile milima miwili linafananisha nini?

¹⁰ Mlima huo wa mfano unapopasuliwa, yaani, nusu upande wa kaskazini na nusu upande wa kusini, miguu ya Yehova inakanyaga imara juu ya milima yote miwili. “Bonde kubwa sana” linatokea katikati ya miguu ya Yehova. Bonde hilo la mfano linafananisha ulinzi kutoka kwa Mungu unaowawezesha watumishi wa Yehova kupata usalama chini ya enzi yake kuu ya ulimwengu wote, na chini ya Ufalme wa Kimasihi wa Mwana wake. Yehova atahakikisha kwamba ibada safi haitafutiliwa mbali kamwe. Kugawanyika kwa mlima wa mizeituni kulitokea lini? Mlima huo uligawanyika wakati Ufalme wa Kimasihi uliposimamishwa mwaka wa 1914, mwishoni mwa Nyakati za Mataifa. Waabudu wa kweli walianza lini kukimbilia katika bonde hilo la mfano?

11, 12. (a) Kukimbilia katika bonde la mfano kulianza lini? (b) Ni nini kinachothibitisha kwamba mkono wenye nguvu wa Yehova unawalinda watu wake?

¹¹ Yesu aliwaonya wafuasi wake hivi: “Mtachukiwa na mataifa yote kwa sababu ya jina langu.” (Mt. 24:9) Chuki hiyo imezidi kuongezeka katika siku za mwisho za mfumo huu wa mambo, hasa tangu mwaka wa 1914. Licha ya kwamba mabaki watiwa-mafuta walishambuliwa vikali na wapinzani wao wakati wa Vita vya Kwanza vya Ulimwengu, kikundi hicho cha watu waaminifu hakikuangamizwa kabisa. Katika mwaka wa 1919, waliachiliwa huru kutoka katika utumwa wa Babiloni Mkubwa—ile milki ya ulimwenguni pote ya dini ya uwongo. (Ufu. 11:11, 12) * Huo ndio wakati ambapo watu walianza kukimbilia katika lile bonde la milima ya Yehova.

 ¹² Tangu mwaka wa 1919, lile bonde la Mungu la ulinzi linaendelea kuwalinda waabudu wa kweli duniani pote. Kwa makumi ya miaka, machapisho ya Biblia na huduma ya shambani ya Mashahidi wa Yehova imepigwa marufuku na kuwekewa vizuizi katika sehemu nyingi za ulimwengu. Katika nchi fulani, bado Mashahidi wako chini ya vizuizi vya aina hiyo. Mataifa hayatafaulu kamwe kufutilia mbali ibada ya kweli hata yakijaribu kadiri gani! Yehova ataendelea kuutumia mkono wake wenye nguvu kuwalinda watu wake.—Kum. 11:2.

13. Tufanye nini ili tubaki katika bonde la Yehova la ulinzi, na kwa nini ni muhimu sana tufanye hivyo sasa?

¹³ Tukishikamana na Yehova na kusimama imara katika kweli, yeye na Mwana wake, Yesu Kristo, watatimiza sehemu yao, na Mungu hataruhusu kitu au mtu yeyote ‘atunyakue kutoka mkononi Mwake.’ (Yoh. 10:28, 29) Yehova yuko tayari kutupatia msaada wowote ule tunaohitaji ili tuendelee kumtii akiwa Mwenye Enzi Kuu ya Ulimwengu Wote na kuendelea kuwa raia washikamanifu wa Ufalme wa Kimasihi. Ni lazima tubaki katika bonde la ulinzi, kwa kuwa bonde hilo litakuwa muhimu zaidi kwa waabudu wa kweli wakati wa dhiki kuu inayokaribia upesi.

14, 15. Itakuwaje kwa wale watakaokuwa nje ya lile bonde katika “siku [ya Mungu] ya vita” dhidi ya adui zake?

¹⁴ Kadiri mwisho wa mfumo huu wa mambo unavyokaribia, ndivyo Shetani atakavyozidi kuwashambulia watumishi wa Yehova. Kisha “siku [ya Mungu] ya vita” dhidi ya adui zake itafika. Yehova atahakikisha kwamba mojawapo ya mashambulizi ya Shetani litakuwa la mwisho. Kuliko siku nyingine yoyote “ya pigano,” Mwenye Enzi Kuu ya ulimwengu wote ataonyesha wazi katika siku hiyo kwamba yeye ni Shujaa.—Zek. 14:3.

¹⁵ Itakuwaje kwa wale watakaokuwa nje ya “bonde kubwa sana” la ulinzi katika siku ya Mungu ya vita? “Nuru yenye thamani” ya kibali cha Mungu haitawaangazia. Katika siku hiyo ya pigano inayokuja, “farasi, nyumbu, ngamia, na punda-dume, na kila aina ya mnyama wa kufugwa”—wanyama wanaofananisha vifaa vya kivita vya mataifa—ataathiriwa. Vifaa kama hivyo “vitagandamana” kana kwamba vimegandishwa na baridi kali, yaani, havitafanya kazi. Yehova atatumia pia magonjwa na “tauni.” Iwe tauni hiyo itakuwa halisi au la, itakomesha vitisho vyenye kuogopesha. Siku hiyo, “macho ya mtu . . . na ulimi wake utaoza” katika maana ya kwamba maadui watashambulia kwa upofu na maneno yao ya kikaidi yatanyamazishwa. (Zek. 14:6, 7, 12, 15) Hakuna eneo lolote duniani litakaloepuka uharibifu huo. Vikosi vitakavyomuunga mkono Shetani katika pigano hilo vitakuwa vingi sana. (Ufu. 19:19-21) “Wale waliouawa na Yehova siku hiyo hakika watakuwa kutoka mwisho mmoja wa dunia mpaka mwisho wa pili.”—Yer. 25:32, 33.

16. Kwa kuwa siku ya Yehova ya vita inakaribia, ni maswali gani tunayopaswa kutafakari, na tutahitaji kufanya nini?

¹⁶ Sikuzote vita husababisha mateso, hata kwa washindi wa vita hivyo. Huenda chakula kikapungua. Huenda mali zikapotea. Huenda maisha yakawa magumu zaidi. Huenda watu wakapoteza uhuru wao. Tutafanya nini hali kama hizo zikitupata? Je, tutaogopa? Je, tutaikana imani yetu chini ya hali hizo ngumu? Je, tutapoteza tumaini letu na kukata tamaa kabisa? Wakati wa dhiki kuu, litakuwa jambo muhimu sana kwetu kudumisha imani yetu katika uwezo wa Yehova wa kuokoa na kubaki katika bonde la Yehova la ulinzi!—Soma Habakuki 3:17, 18.

17, 18. (a) “Maji yaliyo hai” ni nini? (b) “Bahari ya mashariki” na “bahari ya magharibi” zinafananisha nini? (c) Unapotazamia wakati ujao, umeazimia kufanya nini?

¹⁷ Baada ya Har–Magedoni, “maji yaliyo hai” yataendelea kutiririka kutoka kwenye kiti cha Ufalme wa Kimasihi. Hayo “maji yaliyo hai” ni maandalizi ya Yehova ya uzima wa milele. Ile “bahari ya mashariki” inarejelea Bahari ya Chumvi, na ile “bahari ya magharibi” inarejelea Bahari ya Mediterania. Na bahari hizo zinafananisha watu. Bahari ya Chumvi inaweza kufananisha watu walio katika kaburi la ujumla la wanadamu wote. Kwa kuwa Bahari ya Mediterania imejaa viumbe, inaweza kwa kufaa kufananisha ule “umati mkubwa” wa waokokaji wa Har–Magedoni. (Soma Zekaria 14:8, 9; Ufu. 7:9-15) Kwa hiyo, washiriki wa vikundi vyote viwili watafaidika kwa kuwekwa huru kutokana na laana ya kifo iliyosababishwa na Adamu kadiri wanavyoendelea kunywa yale maji ya uhai ya mfano, au kunywa kutokana na ule “mto wa maji ya uzima.”—Ufu. 22:1, 2.

¹⁸ Chini ya ulinzi wa Yehova, tutaokoka mwisho wa mfumo huu mwovu wa mambo na kuingia katika ulimwengu mpya wa Mungu wenye uadilifu. Ingawa tunachukiwa na mataifa yote, acheni tuazimie kuendelea kuwa raia washikamanifu wa Ufalme wa Mungu, na kubaki katika bonde la Yehova la ulinzi.