SIKUZOTE kula pamoja katika meza ya Yehova kumekuwa jambo la kitheokrasi lenye kufurahisha. Watu wa Mungu wanapokusanyika kwa ajili ya mlo wa kiroho, wanafurahia pia kula pamoja chakula cha kimwili.

Mnamo Septemba 1919, Wanafunzi wa Biblia walifanya kusanyiko la siku nane huko Cedar Point, Ohio, Marekani. Hoteli zilikuwa tayari kuandaa vyumba na milo kwa ajili ya wajumbe, hata hivyo kulikuwa na watu wengi zaidi kuliko ilivyotarajiwa. Wahudumu wengi wa hoteli waliacha kutoa huduma kwa sababu ya kulemewa na umati wa watu. Msimamizi mmoja wa hoteli aliwauliza wajumbe wa kusanyiko ikiwa kuna vijana wanaoweza kumsaidia, na wengi walikubali kwa kupenda. Sadie Green alikuwa mmoja wao. Alisema hivi: “Hiyo ilikuwa mara yangu ya kwanza kuwa mhudumu wa hoteli, lakini nilifurahia.”

Katika miaka iliyofuata, kulikuwa na mpango wa kuandaa chakula kusanyikoni uliowapa nafasi wajitoleaji wengi kuwatumikia ndugu na dada zao. Pia, kufanya kazi pamoja kuliwasaidia vijana wengi kujiwekea malengo ya kiroho. Gladys Bolton alisaidia kuandaa chakula katika kusanyiko la mwaka wa 1937. Alisema hivi: “Nilikutana na watu kutoka sehemu mbalimbali na kusikia jinsi walivyokabiliana na matatizo yao. Kwa mara ya kwanza nikaanza kutamani kuwa painia.”

Mhudhuriaji aitwaye Beulah Covey alisema, “Wafanyakazi walijitoa kabisa na hivyo kila kitu kilifanywa kwa mpangilio mzuri sana.” Hata hivyo, kazi hiyo ilikuwa na changamoto zake. Katika mwaka wa 1969, Angelo Manera alitambua kuwa ana mgawo wa kuandaa chakula baada ya kuwasili katika uwanja wa Dodger, huko Los Angeles, California. Alikiri hivi, “Nilishtuka sana!” Matayarisho yalihusisha kuchimba mtaro wenye urefu wa meta 400 ili kupitisha gesi kwenda jikoni!

Katika mwaka wa 1982, huko Sierra Leone, wajitoleaji wenye bidii walihitaji kwanza kusafisha uwanja na kisha kujenga mkahawa kwa kutumia vifaa walivyokuwa navyo. Mnamo 1951, huko Frankfurt,  Ujerumani, ndugu walikodi gari-moshi na wakatumia mvuke uliotolewa na gari hilo kupikia. Wahudumu waliwapakulia chakula watu 30,000 kwa saa. Ili kuwarahisishia kazi ya kuosha vyombo wajitoleaji hao 576, wahudhuriaji walibeba visu na nyuma zao wenyewe. Huko Yangon, Myanmar, wapishi wenye ufikirio hawakutumia pilipili nyingi katika mlo ulioandaliwa kwa ajili ya wajumbe kutoka sehemu mbalimbali duniani.

Katika kusanyiko lililofanywa huko Marekani, mwaka wa 1950, watu walipanga foleni ndefu kwenye jua kali ili kwenda kuchukua chakula, lakini jambo hilo lilimnufaisha Annie Poggensee. Alisema hivi: “Nilifurahia sana mazungumzo ya dada wawili ambao walikuja kwa mashua kutoka Ulaya.” Kila mmoja alieleza jinsi Yehova alivyomsaidia kuhudhuria kusanyiko hilo. “Dada hao walikuwa na furaha sana kuliko mtu yeyote,” akasema Annie. “Hawakujali urefu wa foleni wala joto.”

Katika makusanyiko mengi makubwa, kulikuwa na meza za kulia chakula zilizowekwa chini ya mahema. Watu walipaswa kula haraka ili kuwapisha wenzao. Maelfu wengine walikula jinsi gani? Mtu mmoja ambaye hakuwa Shahidi alisema hivi: “Hii ni dini ya ajabu. Wanakula wakiwa wamesimama.”

Ufanisi na mpangilio uliokuwepo uliwashangaza wenye mamlaka. Baada ya kukagua mkahawa wetu katika Uwanja wa Yankee huko New York City, ofisa wa jeshi la Marekani alimhimiza Major Faulkner, kutoka Idara ya Vita ya Uingereza, afanye ukaguzi kama huo. Kwa hiyo, yeye na mkewe walikuja katika kusanyiko lenye kichwa “Ufalme Wenye Ushindi” lililofanywa mwaka wa 1955 huko Twickenham, Uingereza. Alisema kwamba aliona upendo ukitawala katika mkahawa.

Kwa miaka mingi, ndugu na dada walijitolea kuandaa milo yenye lishe na isiyo na gharama kubwa, kwa manufaa ya wahudhuriaji wa makusanyiko. Lakini mara nyingi kazi hiyo kubwa ilihitaji wajitoleaji wengi wafanye kazi kwa saa nyingi, na hata walikosa kusikiliza sehemu fulani za kusanyiko au kusanyiko lote. Mpango wa kuandaa chakula kusanyikoni ulirahisishwa katika sehemu nyingi mwishoni mwa miaka ya 1970. Kisha, kuanzia mwaka wa 1995, wahudhuriaji waliombwa wabebe vyakula vyao wenyewe. Hilo liliwawezesha wale waliokuwa wakipika na kugawa chakula kufurahia programu ya kiroho na ushirika wa Kikristo. *

Yehova anawathamini sana wale waliofanya kazi kwa bidii kwa ajili ya waamini wenzao! Huenda wengine wakatamani sana shangwe iliyotokana na mpango huo wa kuandaa chakula kusanyikoni. Lakini jambo moja ni hakika: Bado upendo unatawala katika makusanyiko yetu.—Yoh. 13:34, 35.