Jitihada za Kutafuta Majibu

“Baada ya kujua ‘jinsi’ ya kujiruzuku, na baada ya kupata maisha ya raha ambayo hatukuwahi kuwazia—nyumba yenye kustarehesha na redio ya kisasa ya kucheza muziki, . . . bado tunajiuliza ‘kwa nini’ tunaishi. Kwa nini tunashindana maishani? Kusudi ni nini?”—David G. Myers, profesa wa saikolojia katika Chuo cha Hope, Holland, Michigan, Marekani.

UNGEJIBU jinsi gani maswali hayo yaliyoulizwa na profesa huyo? Huenda hata watu fulani wakafikiri kwamba hakuna haja ya kutafuta majibu. Hata hivyo, kujaribu kupuuza maswali kama hayo ni kama kujaribu kupuuza kijiwe kilicho ndani ya kiatu chako, unaweza kuendelea kutembea lakini hutafurahia safari.

Huenda umewahi kujiuliza ikiwa maisha yana kusudi. Watu wengine pia wamejiuliza swali hilo. Uchunguzi wa Viwango vya Ulimwengu, ambao ni mojawapo ya uchunguzi mkubwa zaidi kuwahi kufanywa kuhusu viwango vya wanadamu, unaonyesha kwamba idadi inayoongezeka ya watu katika nchi nyingi wanafikiria “maana na kusudi la maisha.”

Ikiwa unataka kupata amani ya kweli ya akili, unahitaji kupata majibu ya maswali matatu muhimu sana.

Tulitoka wapi?

Ni nini kusudi la maisha?

Ni nini kitakachotokea wakati ujao?

Unaweza kupata wapi majibu yenye kutegemeka ya maswali hayo muhimu? Badala ya kutoa falsafa au majibu ya kukisiwa tu, habari inayofuata itatoa majibu ya Neno la Mungu, Biblia. Tunakuomba ufungue Biblia yako na kujisomea mambo inayosema.