Wasomaji Wetu Wanauliza

Kwa Nini Mashahidi wa Yehova Hawatumii Sanamu Katika Ibada?

Ulimwenguni pote, Wahindu, Wabudha, Wakatoliki, na washiriki wa Kanisa Othodoksi wanaona matumizi ya sanamu na michoro kuwa sehemu muhimu ya ibada yao. Katika sehemu fulani za Afrika, watu wanatumia vinyago vya mbao au mawe katika ibada. Inadhaniwa kwamba mungu fulani au roho ya mungu fulani inaishi katika vinyago hivyo.

Tofauti na dini nyingine, Mashahidi wa Yehova hawatumii sanamu au michoro yoyote katika ibada. Ukitembelea mahali wanapokutana panapojulikana kama Jumba la Ufalme, hutapata michoro ya “watakatifu” wala sanamu za Yesu au Maria. * Kwa nini? Ona yale ambayo Biblia inasema kuhusu jambo hili.

Mungu Aliwaamuru Waisraeli Wafanye Nini?

Baada ya kuwakomboa Waisraeli kutoka Misri, Yehova aliwapa maagizo hususa kuhusu jinsi alivyotaka kuabudiwa. Sheria ya pili ya zile Amri Kumi inasema hivi: “Usijifanyie sanamu ya kuchongwa wala umbo lililo kama kitu chochote kilicho juu mbinguni wala kilicho chini duniani wala kilicho ndani ya maji chini ya dunia. Usiviinamie wala kushawishiwa kuvitumikia, kwa sababu mimi Yehova Mungu wako ni Mungu anayetaka watu wajitoe kikamili.”—Kutoka 20:4, 5.

Mungu alipokuwa akimpa Musa sheria hizo, Waisraeli walikuwa wakitengeneza sanamu ya dhahabu, huenda kwa kuiga ibada ya wanyama ya Wamisri. Hawakuiita sanamu hiyo kwa jina la mungu wa Misri. Badala yake waliihusianisha na ibada ya Yehova. (Kutoka 32:5, 6) Mungu alitenda jinsi gani? Hasira yake iliwaka juu ya wale walioabudu sanamu hiyo, na Musa aliiharibu.—Kutoka 32:9, 10, 19, 20.

Baadaye, Yehova Mungu aliifafanua zaidi ile amri ya pili. Kupitia Musa aliwakumbusha Waisraeli kwamba hawapaswi kujifanyia “sanamu ya kuchongwa, umbo la mfano wowote, mfano wa mwanamume au mwanamke, mfano wa mnyama yeyote aliye duniani, mfano wa ndege yeyote mwenye mabawa ambaye huruka mbinguni, mfano wa kitu chochote kinachotembea kwenye nchi, mfano wa samaki yeyote aliye katika maji chini ya dunia.” (Kumbukumbu la Torati 4:15-18) Ni wazi kwamba Waisraeli hawakupaswa kutumia sanamu za umbo lolote kumwabudu Mungu.

Hata hivyo, baadaye Waisraeli walitumbukia tena katika ibada ya sanamu. Ili kuwasahihisha, Yehova aliwatuma manabii ambao walionya kuhusu adhabu ambayo wangepata kwa sababu ya kuabudu sanamu. (Yeremia 19:3-5; Amosi 2:8) Kama taifa, Waisraeli walipuuza maonyo ya Mungu. Kwa sababu hiyo, katika mwaka wa 607 K.W.K., Yehova aliwaruhusu Wababiloni waharibu Yerusalemu na kulipeleka taifa hilo utekwani.—2 Mambo ya Nyakati 36:20, 21; Yeremia 25:11, 12.

 Wakristo wa Karne ya Kwanza Waliamini Nini?

Katika karne ya kwanza, watu wasio Wayahudi walipogeuka na kuwa Wakristo, hawakuendelea kutumia sanamu kumwabudu Mungu. Demetrio, fundi wa fedha aliyetengeneza sanamu kule Efeso, alisema hivi kuhusu kazi ya kuhubiri ya Paulo: “Wanaume, ninyi mnajua vema kwamba sisi tumepata mafanikio yetu kutokana na biashara hii. Pia, mnaona na kusikia jinsi si katika Efeso tu, bali pia katika karibu wilaya yote ya Asia, Paulo huyu ameshawishi umati mkubwa na kuwageuza kwenye kauli nyingine, akisema kwamba wale waliofanywa kwa mikono si miungu.”—Matendo 19:25, 26.

Maneno ya Paulo yanathibitisha mashtaka ambayo Demetrio alitoa. Alipokuwa akizungumza na Wagiriki huko Athene, Paulo alisema: “Hatupaswi kuwazia kwamba Mungu ni kama dhahabu au fedha au jiwe, kama kitu kilichochongwa kwa ufundi na mtungo wa mwanadamu. Ni kweli, Mungu ameachilia mbali nyakati hizo za kutojua, lakini sasa anawaambia wanadamu wote kila mahali kwamba wanapaswa kutubu.” (Matendo 17:29, 30) Kuhusu jambo hilohilo, Paulo aliwaandikia Wathesalonike na kuwapongeza kwa kusema: ‘Mlimgeukia Mungu mkatoka kwenye sanamu zenu.’—1 Wathesalonike 1:9.

Mbali na Paulo, mtume Yohana pia aliwaonya Wakristo dhidi ya kutumia sanamu katika ibada yao. Mwishoni mwa karne ya kwanza, Yohana aliwaambia hivi kwa uthabiti: “Jilindeni na sanamu.”—1 Yohana 5:21.

Mashahidi wa Yehova wanatii mwongozo wa Mungu ulio wazi kwamba mtu yeyote asitumie sanamu za aina yoyote anapomwabudu. Wanamwamini kabisa Yehova Mungu anaposema hivi: “Mimi ni Yehova. Hilo ni jina langu; nami sitampa mwingine yeyote utukufu wangu mwenyewe, wala sitazipa sanamu za kuchongwa sifa yangu.”—Isaya 42:8.

[Maelezo ya chini]

[Blabu katika ukurasa wa 31]

“Mimi ni Yehova. Hilo ni jina langu; nami sitampa mwingine yeyote utukufu wangu mwenyewe, wala sitazipa sanamu za kuchongwa sifa yangu.”—Isaya 42:8