Wasomaji Wetu Wanauliza

Je, Maponyo Yote ya Kimuujiza Yanatoka kwa Mungu?

Hakuna shaka kwamba Yehova Mungu ana uwezo wa kuponya. Pia, hakuna shaka kwamba anaweza kuwapa waabudu wake uwezo wa kuponya. Kwa mfano, katika siku za mitume, uponyaji wa kimuujiza ulikuwa moja kati ya zawadi za pekee za roho yake takatifu. Mtume Paulo anaandika hivi: “Kila mmoja hupewa ufunuo wa roho kwa kusudi lenye faida. Kwa mfano, mtu mmoja hupewa maneno ya hekima kupitia roho, . . . mwingine zawadi za maponyo kwa roho moja hiyo, . . . mwingine kutoa unabii, . . . mwingine lugha tofauti.”—1 Wakorintho 12:4-11.

Hata hivyo, katika barua hiyohiyo aliyowaandikia Wakorintho, Paulo alisema pia kwamba zawadi za kimuujiza za roho takatifu ya Mungu zingekoma. Alisema hivi: “Kama kuna zawadi za kutoa unabii, zitaondolewa mbali; kama kuna lugha, zitakoma; kama kuna ujuzi, utaondolewa mbali.”—1 Wakorintho 13:8.

Katika karne ya kwanza, Yesu Kristo na mitume wake waliwaponya watu kimuujiza. Katika siku za mitume, zawadi za roho kama vile kuwaponya watu, zilikusudiwa kumletea Mungu utukufu na kuonyesha kwamba Yehova alilikubali na kulibariki kutaniko la Kikristo lililokuwa limeanzishwa wakati huo. Lakini baada ya kutaniko la Kikristo kukomaa na kuimarika zawadi za pekee hazikukaziwa sana, bali sifa kama vile imani thabiti, tumaini, na upendo ndizo zilizothibitisha kwamba Wakristo walikubaliwa na Mungu. (Yohana 13:35; 1 Wakorintho 13:13) Kwa hiyo, mwaka wa 100 W.K. hivi, Mungu hakuwapa tena watu uwezo wa kuponya kimuujiza ili kuonyesha kwamba aliwakubali. *

Hata hivyo, huenda ukajiuliza, ‘Kwa nini bado ninasikia habari kuwahusu watu walioponywa kimuujiza?’ Kwa mfano, gazeti moja lilisimulia kisa cha mtu aliyesemekana anaugua kansa. Alikuwa na uvimbe kichwani, katika figo, na hata ndani ya mifupa. Hakutarajia kupona, lakini anasema kwamba siku moja Mungu “aliongea” naye. Gazeti hilo linasema kwamba baada ya siku chache alikuwa amepona kabisa.

Unaposikia simulizi kama hilo, jiulize: ‘Je, habari hii inaweza kuthibitishwa? Je, madaktari wamethibitisha kwamba yale ambayo mtu huyu anasema ni ya kweli? Na hata inapoonekana kama kwa kweli mtu ameponywa, je, Biblia inafundisha kwamba Mungu anahusika katika maponyo yote ya kimuujiza?’

Jibu la swali la mwisho hasa ni muhimu. Yesu aliwaonya wafuasi wake hivi: “Jihadharini na manabii wa uwongo . . . Wengi wataniambia siku hiyo, ‘Bwana, Bwana, hatukutoa unabii katika jina lako, na kufukuza roho waovu katika jina lako, na kufanya matendo mengi yenye nguvu katika jina lako?’ Na hata hivyo nitawaambia waziwazi: Sikuwajua ninyi kamwe! Ondokeni kwangu, ninyi wenye matendo ya uasi-sheria.”—Mathayo 7:15, 21-23.

Andiko hilo linaonyesha wazi kwamba Mungu hahusiki katika maponyo yote yanayosemekana kuwa ya kimuujiza. Ili tusidanganywe na wale wanaodai kufanya miujiza katika jina la Mungu, tunahitaji kupata ujuzi sahihi kumhusu Mungu, kutumia uwezo wetu wa kufikiri, na kujua jinsi ya kuwatambulisha watu wanaofanya mapenzi ya Mungu.—Mathayo 7:16-19; Yohana 17:3; Waroma 12:1, 2.

[Maelezo ya chini]