Mkaribie Mungu

“Aliutuliza Uso wa Yehova”

“NILIHISI sifai,” anasema mwanamume aliyekuwa ameacha kufuata viwango vya Mungu alivyojifunza akiwa mtoto. Alipoanza kuchukua hatua za kubadili maisha yake, hakuwa na hakika kwamba Mungu angemsamehe. Lakini mtenda-dhambi huyu mwenye kutubu alifarijiwa na simulizi la Biblia kumhusu Manase, katika 2 Mambo ya Nyakati 33:1-17. Kama umewahi kuhisi kuwa hufai kwa sababu ya dhambi za wakati uliopita, wewe pia unaweza kufarijiwa na mfano wa Manase.

Manase alilelewa na wazazi waliomhofu Mungu. Hezekia, baba yake, alikuwa moja kati ya wafalme bora wa Yuda. Manase alizaliwa miaka mitatu hivi baada ya Mungu kurefusha maisha ya baba yake kimuujiza. (2 Wafalme 20:1-11) Bila shaka, Hezekia aliona mwana huyo kuwa zawadi iliyotokana na rehema za Mungu na alijitahidi kumsaidia kupenda ibada safi. Lakini si wakati wote ambapo watoto wa wazazi wanaomhofu Mungu wanafuata kielelezo cha wazazi wao. Ilikuwa hivyo katika kisa cha Manase.

Manase alikuwa na umri usiozidi miaka 12 baba yake alipokufa. Kwa kusikitisha, Manase ‘alifanya yaliyokuwa mabaya machoni pa Yehova.’ (Mstari wa 1, 2) Je, mfalme huyo mchanga aliongozwa vibaya na washauri waliopuuza ibada ya kweli? Biblia haisemi. Lakini inataja kuwa Manase alianza kuabudu sanamu na kuwa mkatili. Alijenga madhabahu kwa miungu ya uwongo, akawatoa wanawe dhabihu, akawasiliana na pepo, na kuweka sanamu ya kuchongwa katika hekalu la Yehova huko Yerusalemu. Manase alionywa tena na tena lakini akawa mkaidi na kukataa kumsikiliza Yehova, Mungu ambaye kupitia muujiza wake wa kurefusha maisha ya baba yake, Manase aliweza kuzaliwa.—Mstari wa 3-10.

Mwishowe, Yehova aliruhusu Manase apelekwe Babiloni akiwa amefungwa pingu. Akiwa uhamishoni, Manase alikuwa na nafasi ya kutafakari kuhusu maisha yake. Je, sasa aliona kuwa sanamu zake zisizo na uhai wala nguvu zilishindwa kumsaidia? Je, alikumbuka mambo ambayo baba yake mwenye kumhofu Mungu alimfundisha akiwa mtoto? Vyovyote vile, moyo wa Manase ulibadilika. Biblia inasema: ‘Aliutuliza uso wa Yehova Mungu wake, akaendelea kujinyenyekeza sana. Naye akaendelea kusali kwake Yeye.’ (Mstari wa 12, 13) Lakini, je, mtu huyo aliyefanya dhambi nzito kama hizo angeweza kweli kusamehewa na Mungu?

Toba ya Manase ya kutoka moyoni ilimgusa Yehova. Mungu alisikia sala zake za kuomba msamaha na ‘kumrudisha Yerusalemu kwenye ufalme wake.’ (Mstari 13) Manase alithibitisha toba yake kwa kufanya yote aliyoweza ili kurekebisha makosa yake. Kwa mfano, aliondoa ibada ya sanamu katika ufalme wake na kuwahimiza watu wake “wamtumikie Yehova.”—Mstari wa 15-17.

Ikiwa unahisi hustahili msamaha wa Mungu kwa sababu ya dhambi ulizofanya wakati uliopita, basi mfano wa Manase unaweza kukutia moyo. Simulizi hilo ni sehemu ya Neno la Mungu lililoongozwa na roho. (Waroma 15:4) Bila shaka, Yehova anataka tujue kuwa yeye ‘yuko tayari kutusamehe.’ (Zaburi 86:5) Yehova anapendezwa na hali ya moyoni ya mtenda-dhambi bali si dhambi aliyofanya. Mtenda-dhambi ambaye kupitia sala anatubu kutoka moyoni, anaacha mwenendo wake mbaya, na kujitahidi kabisa kufanya yaliyo sawa, anaweza ‘kuutuliza uso wa Yehova’ kama Manase alivyofanya.—Isaya 1:18; 55:6, 7.

Usomaji wa Biblia unaopendekezwa kwa mwezi wa Januari (Mwezi wa 1):

▪ 2 Mambo ya Nyakati 29-36–Ezra 1-10