Jifunze Kutoka Katika Neno la Mungu

Tunawezaje Kuchagua Marafiki Wazuri?

Makala hii inazungumzia maswali ambayo huenda umejiuliza na inakuonyesha mahali unapoweza kupata majibu katika Biblia yako. Mashahidi wa Yehova watafurahi kuzungumzia majibu hayo pamoja nawe.

1. Kwa nini tuchague marafiki kwa makini?

Watu wengi wanapenda kukubaliwa na wengine. Mara nyingi tamaa hiyo inafanya tuwaige watu walio karibu nasi. Kwa hiyo, rafiki zetu wana uvutano mkubwa juu ya mitazamo inayositawi katika moyo wetu. Hivyo, marafiki wanaweza kuwa na uvutano mkubwa kuelekea sifa tutakazokuwa nazo baadaye.—Soma Methali 4:23; 13:20.

Daudi, mwandikaji wa Biblia aliyeongozwa na roho ya Mungu, alichagua rafiki zake kwa hekima. Alishirikiana na wale waliomsaidia kudumisha uaminifu akiwa mtumishi wa Mungu. (Zaburi 26:4, 5, 11, 12) Kwa mfano, Daudi alifurahia urafiki wake pamoja na Yonathani kwa sababu Yonathani alimtia moyo amtegemee Yehova.—Soma 1 Samweli 23:16-18.

2. Unawezaje kuwa rafiki ya Mungu?

Ingawa Yehova ni mweza-yote, tunaweza kuwa rafiki zake. Kwa mfano, Abrahamu alikuwa rafiki ya Mungu. Abrahamu alimtegemea na kumtii Yehova, kwa hiyo Yehova akamwona kuwa rafiki yake. (Mwanzo 22:2, 9-12; Yakobo 2:21-23) Tukimtegemea Yehova na kufanya yale anayotaka tufanye, sisi pia tunaweza kuwa rafiki zake.—Soma Zaburi 15:1, 2.

  3. Unawezaje kufaidika kwa kuwa na marafiki wazuri?

Marafiki wa kweli ni washikamanifu na wanakusaidia kufanya yaliyo sawa. (Methali 17:17; 18:24) Kwa mfano, ingawa inaonekana kwamba Yonathani alimzidi umri Daudi kwa miaka 30, na angekuwa mrithi wa ufalme wa Israeli, alimuunga mkono Daudi kwa ushikamanifu. Alifanya hivyo kwa sababu alijua Daudi ndiye aliyechaguliwa na Mungu kuwa mfalme. Marafiki wa kweli pia wana ujasiri wa kukurekebisha wanapoona ukitenda kipumbavu. (Zaburi 141:5) Marafiki wanaompenda Mungu watakusaidia kusitawisha tabia nzuri.—Soma 1 Wakorintho 15:33.

Kwenye Jumba la Ufalme la Mashahidi wa Yehova unaweza kukutana na watu ambao, kama wewe, wanapenda yaliyo sawa. Ukiwa huko, utakutana na marafiki watakaokutia moyo unapojitahidi kumpendeza Mungu.—Soma Waebrania 10:24, 25.

Hata hivyo, nyakati nyingine marafiki wanaompenda Mungu wanaweza kutuvunja moyo. Usiudhike haraka kwa sababu ya makosa yao. (Mhubiri 7:9, 20-22) Kumbuka, hakuna rafiki aliye mkamilifu na marafiki wanaompenda Mungu ni wenye thamani kwetu. Neno la Mungu linatuhimiza tusikazie fikira kasoro za Wakristo wenzetu.—Soma Wakolosai 3:13.

4. Namna gani marafiki bandia wakikupinga?

Watu wengi wanatambua kwamba wanapoanza kusaidiwa kuelewa Neno la Mungu, baadhi ya rafiki zao wa zamani huwapinga. Huenda marafiki hao hawaelewi mashauri yanayofaa au tumaini hakika ambalo umepata katika Biblia. Labda unaweza kuwasaidia.—Soma Wakolosai 4:6.

Nyakati nyingine marafiki hao bandia wanaweza kudhihaki habari njema iliyo katika Neno la Mungu. (2 Petro 3:3, 4) Wengine wao wanaweza kukudhihaki unapojitahidi kufanya yaliyo sawa. (1 Petro 4:4) Jambo hilo linapotokea, huenda ukalazimika kuchagua kati ya kuwa rafiki yao au kuwa rafiki ya Mungu. Ukichagua kuwa rafiki ya Mungu, utakuwa umechagua rafiki bora zaidi.—Soma Yakobo 4:4, 8.

Kwa habari zaidi, ona sura ya 12 na 19 ya kitabu hiki, Biblia Inafundisha Nini Hasa?, kilichochapishwa na Mashahidi wa Yehova.