“Haiwezekani!” Neno Hilo Linamaanisha Nini?

MELI iliyoitwa Titanic, ambayo ilianza kutumika mwaka wa 1912, ndiyo iliyokuwa meli kubwa zaidi na yenye starehe zaidi wakati huo. Kwa sababu ilitengenezwa kwa ustadi wa hali ya juu kisayansi, watu wengi waliamini kwamba “haingeweza kuzama.” Hata hivyo, jambo lililotokea ni historia sasa. Kwenye safari yake ya kwanza, meli hiyo iligonga mwamba wa barafu ilipokuwa ikisafiri upande wa kaskazini katika Bahari ya Atlantiki ikazama, na watu 1,500 wakafa. Meli iliyodhaniwa kwamba haingeweza kuzama, ilitokomea ndani ya bahari kwa muda wa saa chache tu.

Neno “haiwezekani” linaweza kuwa na maana mbalimbali. Tunaweza kusema jambo haliwezekani tukimaanisha kwamba tunahisi limepita uwezo wetu wa kukabiliana nalo, hatuwezi kulitimiza, wala kulielewa. Mambo mengi ya kiteknolojia ambayo yametimizwa leo, zamani yalionekana kuwa yasiyowezekana kwa sababu yalipita uwezo wa wanadamu kuyafanya au hata kuyawazia. Wanadamu kufika mwezini, kutuma kigari kwenye sayari ya Mihiri na kukiongoza kutoka Duniani, uwezo wa kutambua chembe za urithi za wanadamu, na kutazama habari punde tu zinapotokea katika sehemu fulani ya mji au ulimwenguni—hayo yote ni mambo halisi ambayo huenda miaka 50 hivi iliyopita yalionekana kuwa yasiyowezekana. Jambo hilo lilielezwa vizuri na aliyekuwa Rais wa Marekani Ronald Reagan alipokuwa akihutubia kikundi cha wanasayansi wa vitengo mbalimbali: “Nyinyi ambao mnaongoza katika mambo ya kiteknolojia, tayari mmefanya mambo ambayo zamani yalionekana kwamba hayawezekani kuwa mambo ya kawaida.”

Kwa sababu ya maendeleo mengi yanayofanywa leo, Profesa John Brobeck alisema hivi: “Mwanasayansi hawezi kusema kwa uhakika kwamba jambo fulani haliwezekani. Anaweza tu kusema kwa sasa haliwezekani. Huenda hata akasema kwamba jambo haliwezi kuelezwa kulingana na uelewaji wetu wa sasa.” Profesa huyo aliendelea kusema ikiwa tunaona jambo haliwezekani, “tunachohitaji ni chanzo cha nguvu tusizozijua katika sayansi yetu ya kibiolojia na kifiziolojia. Katika Maandiko yetu, chanzo hicho cha nguvu kinatajwa kuwa nguvu za Mungu.”

 Mambo Yote Yanawezekana kwa Mungu

Muda mrefu kabla Profesa Brobeck hajasema maneno hayo, Yesu wa Nazareti, ambaye anafafanuliwa kuwa mtu mkuu zaidi aliyewahi kuishi, alisema: “Mambo yasiyowezekana kwa wanadamu yanawezekana kwa Mungu.” (Luka 18:27) Roho takatifu ya Mungu ndiyo nguvu kuu zaidi ulimwenguni. Haiwezi kupimwa na vifaa vyovyote vya kiteknolojia. Roho takatifu inaweza kutusaidia kufanya mambo ambayo hatuwezi kufanya kwa nguvu zetu wenyewe.

Nyakati nyingine, sote tunajipata katika hali ambazo tunahisi kwamba hatuwezi kukabiliana nazo. Kwa mfano, huenda tukampoteza mpendwa wetu katika kifo au maisha yetu ya familia yanaweza kuwa na mikazo sana hivi kwamba tunahisi hatuwezi kuendelea. Labda tumekata tamaa maishani na kulemewa kabisa. Tunahisi kwamba hatuna uwezo na tunakosa tumaini. Tunaweza kufanya nini?

Biblia inatuambia kwamba mtu ambaye anamwamini Mweza-Yote na anasali ili apate roho Yake takatifu huku akijitahidi kumpendeza Mungu anaweza kupata msaada wa kushinda matatizo ambayo huenda yakaonekana kuwa magumu kupita kiasi. Ona maneno ya Yesu yenye kutia moyo: “Kwa kweli ninawaambia ninyi kwamba mtu yeyote anayeuambia mlima huu, ‘Ng’oka ukatupwe baharini,’ naye hana shaka moyoni mwake lakini ana imani kwamba yale anayosema yatatukia, itakuwa hivyo kwake.” (Marko 11:23) Hakuna hali ambayo hatuwezi kuivumilia au kuikabili ikiwa tutaruhusu nguvu za Neno la Mungu na roho yake iongoze maisha yetu.

Kwa mfano, mfikirie mwanamume ambaye alikuwa katika ndoa kwa miaka 38 na mke wake akafa baada ya kuugua saratani, yaani, kansa. Alivunjika moyo kabisa. Alihisi ni kana kwamba hangeweza kustahimili hali iliyompata. Kuna nyakati ambazo alitamani kufa badala ya kuendelea kuishi bila mke wake. Alisema alihisi ni kana kwamba alikuwa akitembea katika bonde lenye kivuli kizito. Akikumbuka kipindi hicho, anaamini kwamba kumweleza Mungu huzuni yake kupitia sala na kusoma Biblia kila siku, vilevile kutafuta kwa bidii mwongozo wa roho ya Mungu kulimsaidia kukabiliana na hali ambayo aliwazia kwamba hangefaulu kuikabili.

Wenzi fulani wa ndoa walikuwa na matatizo makubwa katika ndoa yao. Mwanamume alikuwa mjeuri na alikuwa na tabia nyingi mbaya. Mke wake alihisi kwamba hangeweza kuendelea kuishi. Alijaribu kujiua. Kisha yule mwanamume akaanza kujifunza Biblia pamoja na Mashahidi wa Yehova. Mambo aliyojifunza yalimsaidia kushinda tabia zake mbaya na hasira yake kali. Mke wake alishangazwa na mabadiliko hayo ambayo alidhani hayangewezekana.

Mwanamume mwingine alifafanua mazoea aliyokuwa nayo ya kutumia dawa za kulevya na upotovu wa maadili kuwa kipindi cha mvurugo wa kihisia. Anasema: “Niliacha kujiheshimu kabisa.” Kwa bidii, alisali hivi kwa Mungu: “Bwana ninajua kwamba upo. Tafadhali nisaidie!” Baada ya kusali alianza kujifunza Biblia na Mashahidi wa Yehova na hilo likamsaidia kufanya mabadiliko makubwa maishani. “Mara kwa mara, nililemewa na hisia za hatia na kuhisi kwamba sifai kabisa,” anasema. “Pindi nyingine nilishuka moyo sana. Hata hivyo, Neno la Mungu limenisaidia kushinda hisia hizo mbaya. Nilipokosa usingizi, nilikariri Maandiko ambayo nilikuwa nimejifunza. Maandiko hayo yalinisaidia kusafisha akili zangu.” Sasa mwanamume huyo ameoa na ana furaha. Yeye na mke wake wanawasaidia wengine kwa bidii watumaini nguvu za Neno la Mungu. Alipokuwa kijana mwenye matatizo mengi, huenda aliwazia kwamba maisha aliyo nayo sasa hayawezekani.

Masimulizi hayo yanaonyesha kwamba Neno la Mungu lina nguvu na kwamba roho yake takatifu inaweza kutusaidia kufanya mambo ambayo tunadhani hayawezekani katika maisha. Lakini unaweza kusema, “Hilo linahitaji  imani!” Ndiyo, huo ni ukweli. Hata Biblia inasema kwamba “bila imani haiwezekani kamwe kumpendeza [Mungu] vema.” (Waebrania 11:6) Lakini fikiria jambo hilo kwa njia hii: Rafiki yako wa dhati, labda ni msimamizi wa benki au ni mtu mwenye mamlaka, anakwambia: “Usiwe na wasiwasi. Ukihitaji chochote, njoo nikusaidie.” Bila shaka, utafurahi kusikia ahadi kama hiyo. Jambo la kusikitisha ni kwamba, wanadamu hawategemeki. Labda rafiki yako anajipata katika hali ambayo inamzuia kutimiza ahadi aliyokupa kwa unyoofu. Pia, ikiwa atakufa basi hatakuwa tena na uwezo wa kukusaidia. Kwa upande mwingine, Mungu hawezi kupatwa na mambo yanayowapata wanadamu. Biblia inatuhakikishia hivi: “Hakuna jambo lisilowezekana kwa Mungu.”​—Luka 1:37, Biblia Habari Njema.

“Je, Unaamini Hilo?”

Katika Biblia kuna matukio yanayothibitisha ukweli wa maneno hayo yaliyotajwa katika fungu lililotangulia. Fikiria mifano kadhaa.

Mwanamke fulani aliyeitwa Sara, alipokuwa na umri wa miaka 90, alicheka alipoambiwa kwamba angezaa mwana, lakini kuwapo kwa taifa la Israeli ni uthibitisho wa kwamba alimzaa. Mwanamume fulani aliyemezwa na samaki mkubwa na kukaa tumboni kwa siku tatu, aliokoka na hata akaandika habari hiyo. Jina lake ni Yona. Luka, aliyekuwa daktari alijua tofauti kati ya kupoteza fahamu na kufa. Aliandika kumhusu Eutiko, kijana aliyeanguka kutoka kwenye dirisha la chumba kilichokuwa ghorofani na akafa lakini akafufuliwa. Matukio hayo si hekaya. Ukiyachunguza kwa makini utaona kwamba ni ya kweli.​—Mwanzo 18:10-14; 21:1, 2; Yona 1:17; 2:1, 10; Matendo 20:9-12.

Yesu alimwambia Martha, rafiki yake, jambo fulani lenye kushangaza: “Kila mtu aliye hai na ananiamini hatakufa kamwe.” Baada ya kutoa ahadi hiyo ambayo ilionekana kana kwamba haiwezekani, Yesu aliuliza swali hili muhimu: “Je, unaamini hilo?” Bado swali hilo lina maana kwetu leo.​—Yohana 11:26.

Kuishi Milele Duniani, Je, Ni Jambo Lisilowezekana?

Waandishi fulani waliandika hivi kwenye karatasi iliyokuwa na maelezo ya kisheria kuhusu kuishi muda mrefu: “Kipindi ambacho huenda tutaishi muda mrefu kuliko tunavyoishi sasa hakiko mbali sana—labda tutaishi milele.” Kitabu The New Encyclopædia Britannica kinaeleza kwamba zaidi ya chembe za mwili kufa, au kuchakaa na kuzeeka, inaonekana kwamba chanzo cha kifo ni sababu fulani isiyojulikana ambayo inavuruga mifumo ya mwili au kuiharibu kabisa. * Kinasema kwamba: “Mtu huzeeka kwa sababu mifumo tata inayodhibiti mambo mwilini inaacha kufanya kazi kabisa.”

Ingawa habari hii inapendeza, kwa kulinganishwa na maelezo ya kisayansi, Biblia inatupa sababu zenye kusadikisha zaidi kwamba tunaweza kuishi milele. Muumba wetu Yehova Mungu ambaye ndiye Chanzo cha uhai anatuahidi kwamba “kwa kweli atameza kifo milele.” (Zaburi 36:9; Isaya 25:8) Je, unaamini jambo hilo? Yehova ndiye anayetoa ahadi hiyo, na hawezi kusema uwongo.​—Tito 1:2.

[Maelezo ya Chini]

[Blabu katika ukurasa wa 27]

“Mambo ambayo zamani yalionekana kwamba hayawezekani [yamekuwa] mambo ya kawaida.”​—RONALD REAGAN

[Blabu katika ukurasa wa 28]

Hali fulani maishani inapokulemea, unatafuta msaada wapi?

[Picha Hisani katika ukurasa wa 27]

NASA photo