Makala hii inazungumzia maswali ambayo huenda umejiuliza na inakuonyesha mahali unapoweza kupata majibu katika Biblia yako. Mashahidi wa Yehova watafurahi kuzungumzia majibu hayo pamoja nawe.

1. Kwa nini Mungu amejipa jina?

Bila shaka, unapenda kuitwa kwa jina lako badala ya kuitwa kwa jina la cheo, kama vile “mwanamume,” “bwana,” “bibi,” au “mwanamke.” Jina linasaidia kukutofautisha na watu wengine. Mungu anaitwa kwa majina ya cheo kama vile “Bwana Mwenye Enzi Kuu,” “Mungu Mweza-Yote,” na ‘Muumba Mkuu.’ (Mwanzo 15:2; 17:1; Mhubiri 12:1) Lakini amejipa jina linaloweza kutusaidia kusitawisha uhusiano wa kibinafsi pamoja naye. Katika Kiswahili, jina la kibinafsi la Mungu ni Yehova.​—Soma Isaya 42:8.

Ingawa watafsiri wengi wa Biblia wamebadili jina la Mungu na kutumia majina ya cheo kama vile “Mungu” na “Bwana,” jina hilo linapatikana karibu mara 7,000 katika maandishi ya kale ya Kiebrania ya Biblia. Ni wazi kwamba Mungu anataka jina lake lijulikane.​—Soma Isaya 12:4.

2. Kwa nini ni muhimu kujua jina la Mungu?

Kujua jina la Mungu kunatia ndani mambo mengi zaidi ya kujua tu jinsi ya kulitamka. Kumjua Mungu vizuri kabisa kunamaanisha kuwa na uhusiano wa karibu pamoja naye. Jina Yehova linamaanisha “Yeye Husababisha Kuwa.” Maana ya jina hilo ni uhakikisho thabiti wa kwamba Mungu anaweza kuwa chochote kinachohitajiwa ili kutimiza kusudi lake. Hivyo, kujua jina la Mungu kunamaanisha kuamini kwamba Mungu atatimiza ahadi zake. (Zaburi 9:10) Watu wanaomjua Mungu na kutumia jina lake wanachochewa kumtegemea na kumtanguliza katika maisha yao. Yehova Mungu atawalinda watu hao.​—Soma Zaburi 91:14.

  3. Kwa nini Mungu anataka watu walijue jina lake?

Mungu anataka watu wajue jina lake kwa sababu watafaidika. Kwa kujua jina hilo wanaweza kuwa rafiki ya Mungu, wakiwa na tumaini la kuishi milele. Ndiyo sababu Yehova anataka tuwajulishe watu jina lake!​—Soma Yohana 17:3; Waroma 10:13, 14.

Yesu aliwajulisha watu jina la Mungu kwa kuwafundisha kuhusu njia za Mungu, sheria, na ahadi Zake. Leo, wafuasi wa Yesu wanaendelea kufanya kazi ya kulitangaza jina la Mungu katika mataifa yote. Wanafanya hivyo wakiwa “watu kwa ajili ya jina [la Mungu].”​—Soma Matendo 15:14; Yohana 17:26.

4. Mungu atalitukuzaje jina lake?

Yehova Mungu anataka kulitukuza jina lake kwa sababu limevunjiwa heshima. Kwa mfano, watu fulani wanasema kwamba Mungu hakuumba uhai na hivyo hatupaswi kumtii. Wengine wanasema kwamba Mungu hatujali na kwamba ndiye anayesababisha mateso yanayotupata. Watu kama hao wanalivunjia heshima jina la Mungu. Lakini hawataendelea kufanya hivyo milele. Mungu atawaharibu watu wote wanaolivunjia jina lake heshima.​—Soma Zaburi 83:17, 18.

Yehova atalitukuza jina lake wakati Ufalme wake utakapokomesha utawala wote wa wanadamu na kuleta amani na usalama duniani. (Danieli 2:44) Hivi karibuni, kila mtu atajua kwamba Yehova ndiye Mungu wa kweli.​—Soma Ezekieli 36:23; Mathayo 6:9.

Unapaswa kufanya nini? Mkaribie Mungu kwa kujifunza Neno lake na kushirikiana na watu wanaompenda. Yehova atakapolitukuza jina lake, atawakumbuka watumishi wake waaminifu.​—Malaki 3:16.

Kwa habari zaidi ona sura ya 1 ya kitabu hiki, Biblia Inafundisha Nini Hasa?, kilichochapishwa na Mashahidi wa Yehova.

[Picha katika ukurasa wa 16]

Jina la Mungu kwenye hati ya kale ya Kiebrania