Kwa Nini Upendezwe na Miujiza?

“Miujiza inaweza kuelezwa kuwa mambo yanayopingana na kanuni za sayansi.”​—RICHARD DAWKINS, ALIYEKUWA PROFESA WA UELEWAJI WA SAYANSI KATIKA JAMII.

“Kuamini miujiza ni jambo linalopatana na akili kabisa. Miujiza si mambo yanayopingana na imani ya kidini, badala yake ni wonyesho wa upendo wa Mungu kwa uumbaji na kwamba anaendelea kujihusisha nao.”​—ROBERT A. LARMER, PROFESA WA FALSAFA.

“JE, UNAAMINI miujiza?” Kama maelezo yaliyonukuliwa hapo juu yanavyoonyesha, maoni ya watu yanatofautiana kabisa. Lakini wewe ungejibuje swali hilo?

Huenda ukasita kujibu, “Ndiyo, ninaamini.” Labda unahisi kwamba kwa kukubali huenda ukaonekana kuwa mshirikina au mtu ambaye hana elimu. Watu wengi wanahisi vivyo hivyo.

Kwa upande mwingine, huenda unasadiki kwamba kwa kweli miujiza inatukia. Labda unaamini miujiza iliyoandikwa katika Biblia, kama vile Musa alivyotenganisha maji ya Bahari Nyekundu. Pia, yaelekea unaamini miujiza inayofanywa leo. Hata ripoti moja iliyotolewa hivi karibuni inaonyesha kwamba “watu wengi wanaoishi katika nchi za Magharibi​—kwa mfano robo tatu hivi ya watu wanaoishi Marekani na asilimia 38 wanaoishi Uingereza—​wanaendelea kuamini miujiza.” (The Cambridge Companion to Miracles, kilichosahihishwa na Graham H. Twelftree) Hata hivyo, si Wakristo peke yao wanaoamini miujiza. Kulingana na kitabu Britannica Encyclopedia of World Religions, kuamini matukio ya kimuujiza “ni jambo linalokubaliwa na dini zote.”

Au labda wewe uko katika kikundi cha tatu, kinachojibu: “Sijui, na sijali! Kwa sababu miujiza haitukii katika maisha yangu!” Hata hivyo, kwa nini uvutiwe na miujiza?

 Fikiria hali hii: Jiwazie unaugua ugonjwa ambao hauna tiba. Kisha, unasoma ripoti fulani katika gazeti la kitiba linaloaminika kuhusu dawa mpya ambayo inaweza kutibu ugonjwa wako, je, halingekuwa jambo la busara kutumia muda zaidi ili kuchunguza jambo hilo? Vivyo hivyo, Biblia inaahidi kwamba hivi karibuni miujiza mikubwa itatukia. Watu wote wanaoishi duniani watajionea miujiza hiyo. Je, halingekuwa jambo la busara kutumia wakati na nguvu zako ili kuchunguza ikiwa ahadi hiyo ni ya kweli?

Hata hivyo, kabla ya kuanza kuchunguza miujiza hiyo iliyoahidiwa, acha tuchunguze vipingamizi vitatu ambavyo hutokezwa ili kupinga miujiza.

[Sanduku katika ukurasa wa 3]

MUUJIZA NI NINI?

Ni tukio ambalo haliwezi kulinganishwa na nguvu za wanadamu au nguvu za asili na mara nyingi linaongozwa na nguvu fulani zisizo za kawaida.