Je, kifo kina nguvu kuliko Mungu? La hasha! Kifo, au “adui” yeyote, anawezaje kuwa na nguvu kuliko “Mungu Mweza-Yote”? (1 Wakorintho 15:26; Kutoka 6:3) Mungu ana nguvu za kuondoa kifo kupitia ufufuo, na anaahidi kufanya hivyo katika ulimwengu mpya. * Kwa nini tunaamini ahadi hiyo? Yesu, Mwana wa Mungu, anatuambia maneno ambayo yanatupatia tumaini.—Soma Mathayo 22:31, 32.

Akizungumza na Masadukayo, ambao hawakuamini ufufuo, Yesu alisema: “Kwa habari ya ufufuo wa wafu, je, hamkusoma mliloambiwa na Mungu, akisema, ‘Mimi ni Mungu wa Abrahamu na Mungu wa Isaka na Mungu wa Yakobo’? Yeye ni Mungu, si wa wafu, bali wa walio hai.” Hapa Yesu alikuwa akirejelea mazungumzo kati ya Mungu na Musa kwenye kichaka kilichokuwa kikiwaka moto karibu mwaka wa 1514 K.W.K. (Kutoka 3:1-6) Kulingana na Yesu, maneno ambayo Yehova alimwambia Musa—“Mimi ni Mungu wa Abrahamu na Mungu wa Isaka na Mungu wa Yakobo”—yanaonyesha kwamba ahadi ya ufufuo hakika itatimia. Jinsi gani?

Kwanza fikiria muktadha. Yehova alipokuwa akiongea na Musa, wazee wa ukoo Abrahamu, Isaka, na Yakobo walikuwa wamekufa zamani, Abrahamu kwa miaka 329, Isaka miaka 224, na Yakobo miaka 197. Na bado Yehova alisema “Mimi ni”—hakusema “Mimi nilikuwa”—Mungu wao. Yehova alizungumza kuhusu wazee hao waliokufa kana kwamba bado walikuwa hai. Kwa nini?

Yesu alifafanua: “Yeye [Yehova] ni Mungu, si wa wafu, bali wa walio hai.” Hebu fikiria maana ya maneno hayo. Kama hakungekuwa na ufufuo, basi Abrahamu, Isaka, na Yakobo wangebaki wafu milele. Ikiwa hali ingekuwa hivyo, Yehova angekuwa Mungu wa wafu. Hilo lingemaanisha kwamba kifo kina nguvu kuliko Yehova, kana kwamba yeye ni dhaifu sana asiweze kuwakomboa watumishi wake kutoka kwa kifo.

Basi, tunaweza kusema nini kuhusu Abrahamu, Isaka, Yakobo, na watumishi wote waaminifu wa Yehova ambao wamekufa? Yesu alisema maneno haya yenye nguvu: “Kwake, hao wote wako hai.” (Luka 20:38) Kwa kweli, kusudi la Yehova la kuwafufua watumishi wake waaminifu waliokufa litatimia hakika kwa kuwa anawaona kana kwamba wako hai. (Waroma 4:16, 17) Yehova amewaweka hao wote katika kumbukumbu lake lisilo na mipaka hadi wakati wake wa kuwafufua utakapofika.

Je, unavutiwa na wazo la kuungana tena na wapendwa wako waliokufa? Ikiwa ndivyo, kumbuka kwamba Yehova ana nguvu za kuwafufua wafu. Hakuna kinachoweza kumzuia kutimiza ahadi yake ya ufufuo. Tunakutia moyo ujifunze mengi kuhusu ahadi ya ufufuo na Mungu atakayeitimiza. Bila shaka, hilo litakusaidia umkaribie Yehova, “Mungu . . . wa walio hai.”