Punde si punde nikaanza kufanya mazoezi ya viungo vya mwili na kujenga misuli. Hatimaye nilifungua kituo cha mazoezi huko San Leandro, California, Marekani, na nikashirikiana na wajenga misuli kutia ndani mmoja aliyeshinda shindano la kujenga misuli nchini Marekani. Hata hivyo, sikuridhika hata baada ya kuwa na mwili wenye misuli iliyojengeka.

Siku moja rafiki yangu aliyejua tamaa yangu ya kuielewa Biblia, alipendekeza nikutane na mtu fulani aliyemjua. Asubuhi iliyofuata, mmoja wa Mashahidi wa Yehova alikuja nyumbani kwangu. Kwa saa nne, alijibu maswali yangu akitumia Biblia. Nilimwomba arudi jioni, na tulizungumzia Biblia hadi saa sita usiku. Nilifurahia yale niliyojifunza na niliomba kwenda naye siku iliyofuata ili nione jinsi alivyohubiri. Nilishangaa kuona vile alivyotumia Biblia kuwajibu watu maswali yao. Nami nikatamani kufanya hivyo pia!

Hivyo, nikaacha biashara yangu na nikaanza kuhubiri pamoja na painia huyo, kama wahudumu wa wakati wote wa Mashahidi wa Yehova wanavyoitwa. Nilibatizwa Mei 1948, kwenye kusanyiko katika Uwanja wa Cow Palace, San Francisco, California. Baadaye mwaka huo nikawa painia.

Wakati huohuo, niliwaomba Mashahidi wamtembelee mama yangu. Alikubali na baada ya muda mfupi akawa Shahidi wa Yehova. Licha ya kupingwa na familia yake, aliendelea kuwa mwaminifu kwa Mungu hadi alipokufa miaka mingi baadaye. Hakuna wengine katika familia yetu ambao walikuja kuwa Mashahidi.

Mwaka wa 1950, nilihamia Grand Junction, Colorado ambako nilikutana na Billie. Alizaliwa mwaka wa 1928 na alilelewa katika kipindi cha Mshuko Mkubwa wa Kiuchumi. Mama yake Minnie, alimsomea Biblia kila usiku kwa mwangaza wa taa ya mafuta. Akiwa na miaka minne Billie alijua kusoma na pia hadithi nyingi za Biblia. Mwishoni mwa miaka ya 1940, mama yake alijifunza katika Biblia pamoja na Mashahidi kwamba wanadamu hawaendi motoni wanapokufa, bali huenda kaburini. (Mhubiri 9:5, 10) Minnie na mume wake wakawa Mashahidi.

Mwaka wa 1949, Billie alirudi kutoka chuoni Boston na akaanza kujifunza Biblia kwa bidii. Badala ya kuwa mwalimu, aliamua kujiweka wakfu ili amtumikie Mungu. Alibatizwa mwaka wa  1950 katika kusanyiko la kimataifa la Mashahidi wa Yehova lililofanyika kwenye Uwanja wa Yankee, New York. Muda mfupi baadaye, tulikutana, tukaoana na tukaanza utumishi wa wakati wote pamoja.

Tulianza kutumikia huko Eugene, Oregon na tukapata marafiki wengi. Mwaka wa 1953, tulihamia Grants Pass, Oregon, ili kusaidia kutaniko ndogo lililokuwa huko. Baadaye mwaka huo, tulialikwa kuhudhuria darasa la 23 la Gileadi, yaani shule ya Mashahidi ya kuwazoeza wamishonari, iliyokuwa karibu na South Lansing, New York, kilometa 400 kaskazini mashariki mwa jiji la New York.

Desemba mwaka wa 1954, miezi mitano baada ya kuhitimu Gileadi, mimi na Billie tulipanda ndege na kuelekea Brazili. Baada ya kusafiri kwa saa moja, injini moja iliharibika, lakini tulitua Bermuda tukiwa salama. Baada ya kutua tena ghafula Kuba na kusafiri kwa saa 36 zenye kuchosha, tulifika kwenye ofisi ya tawi ya Mashahidi wa Yehova jijini Rio de Janeiro, Brazili.

Baada ya kukaa muda mfupi, mimi na Billie pamoja na wamishonari wengine wawili, tulienda Bauru, São Paulo ili kufungua makao mapya ya wamishonari. Jiji hilo lilikuwa na idadi ya watu 50,000, nasi tulikuwa Mashahidi wa kwanza huko.

Tulianza kuwahubiria watu nyumbani kwao, lakini kasisi Mkatoliki wa eneo hilo alianza kutupinga mara moja. Alitufuata na kuwahimiza watu wasitusikilize. Hata hivyo, baada ya majuma kadhaa, tulijifunza Biblia na familia moja kubwa na wote walikubali ukweli wa Biblia na baadaye wakabatizwa. Wengine pia wakaanza kujifunza.

Familia hiyo ilikuwa na mtu wa ukoo ambaye alikuwa kiongozi wa klabu fulani mashuhuri. Nilifanya mipango ya kufanyia kusanyiko humo. Kasisi wa eneo hilo aliposisitiza kwamba mkataba ulikuwa umevunjwa, kiongozi wa klabu hiyo alikutana na wanachama na kuwaambia: “Mkivunja mkataba huu, nitajiuzulu!” Walikubali kusanyiko lifanyiwe hapo.

Mwaka uliofuata yaani 1956, tulialikwa tuhudhurie kusanyiko huko Santos, São Paulo. Mashahidi 40 hivi walisafiri kwenda huko kwa garimoshi. Tuliporudi Bauru, nilipata barua ya mgawo wa kuwa mwangalizi anayesafiri ili kutembelea makutaniko ya Mashahidi wa Yehova. Hivyo, tukaanza kazi ambayo tuliifanya kwa miaka 25 huko Brazili, na tulitembelea karibu sehemu zote za nchi hiyo kubwa.

Siku hizo, haikuwa rahisi kusafiri. Hatimaye tulitembelea nchi yote kwa kutumia basi, garimoshi, gari la kukokotwa na farasi, baiskeli, na pia tulitembea. Mojawapo ya majiji ya kwanza tuliyotembelea ni Jaú, São Paulo. Kasisi wa eneo hilo alitupinga.

“Hamwezi kuwahubiria ‘kondoo wangu!’” alifoka.

“Si wako,” tukamjibu. “Ni wa Mungu.”

Tulipanga kuonyesha sinema The New World Society in Action, iliyohusu kazi yetu ya kuhubiri ulimwenguni pote, lakini kasisi huyo alipanga watu watushambulie. Tuliwajulisha polisi mara moja. Kasisi huyo na wafuasi wake walipofika ukumbini, waliwakuta polisi langoni wakiwa na bunduki. Watu wengi walifurahia sana kutazama sinema hiyo.

 Karibu kila mahali tulipotumikia siku hizo, tulichukiwa na kupingwa na viongozi wa kidini. Kwa mfano, huko Brusque karibu na Blumenau, Santa Catarina, kulikuwa na mapainia wawili ambao walitumika licha ya upinzani mkali. Hata hivyo, uvumilivu wao ulithawabishwa. Miaka 50 baadaye, eneo hilo lina zaidi ya makutaniko 60 na pia Jumba la Kusanyiko maridadi katika jiji lililo karibu la Itajaí!

Jambo moja lililotufurahisha sana katika kazi yetu ya kusafiri ni wakati tuliotumia pamoja na Mashahidi wengine kutayarisha makusanyiko makubwa. Katika miaka ya 1970 nilipata pendeleo la kutumika kama mwangalizi wa kusanyiko katika Uwanja mkubwa wa Morumbi. Makutaniko 100 yaliyo karibu yaliombwa kutuma watu kumi kutoka kila kutaniko ili wasaidie kusafisha uwanja usiku uliotangulia kusanyiko.

Wachezaji wa mpira walipoondoka uwanjani usiku huo, walisikika wakidhihaki, “Hebu tazama wale wanawake wadogo wakiwa na fagio zao.” Hata hivyo, kufikia saa sita usiku, uwanja wote ulikuwa safi! Msimamizi wa uwanja huo alisema hivi kwa mshangao, “Ingewachukua wafanyakazi wangu juma zima kufanya kazi ambayo nyinyi Mashahidi mmefanya kwa saa chache tu!”

Baba yangu alikufa mwaka wa 1980, hivyo tulirudi Marekani ili kumtunza mama yangu, huko Fremont, California. Tulifanya kazi ya kusafisha majengo usiku na tukaendelea kupainia na kuwahubiria Wareno katika eneo hilo. Baadaye, tulihamia San Joaquin Valley, ambako tuliwatafuta watu waliozungumza Kireno katika eneo kubwa kuanzia Sacramento hadi Bakersfield. Sasa kuna makutaniko kumi hivi ya Kireno huko California.

Baada ya mama yangu kufa, mwaka wa 1995, tulihamia Florida na kumtunza baba yake Billie hadi alipokufa. Mama yake alikuwa amekufa mwaka wa 1975. Mwaka wa 2000, tulihamia eneo la jangwani kusini magharibi mwa Colorado na tukatumika huku tukiwahubiria kwa wakati wote Wenyeji wa Asili wa Marekani katika maeneo ya Navajo na Ute. Kwa kusikitisha, Billie alikufa Februari mwaka wa 2014.

Ninafurahi sana kwamba miaka 65 iliyopita, nilikutana na Shahidi wa Yehova aliyejibu maswali yangu mengi akitumia Biblia! Pia, ninafurahi kwa kuwa nilithibitisha mambo aliyosema yalitegemea Biblia. Kwa hiyo, nimepata thawabu nyingi katika kumtumikia Mungu.