Idadi ya watu wanaotenda kwa heshima inazidi kupungua. Wagonjwa wasio na heshima wanawagombeza madaktari; wateja katika mikahawa huwatendea wahudumu kwa njia isiyo na heshima; abiria huwatendea vibaya wahudumu wa ndege; watoto wakaidi huwadhihaki, kuwatisha, na kuwashambulia walimu; na baadhi ya wanasiasa huhusika katika kashfa huku wanasiasa wenzao wakijaribu kujionyesha kuwa watu wenye kuheshimika sana.

 Hata hivyo, Biblia inatoa mwongozo unaofaa wa kuonyesha mwenendo wenye heshima ni upi. Pia, inaeleza kwa nini leo watu hawatendi kwa heshima.

 Ulimwenguni pote watu wanazidi kutenda kwa ukosefu wa heshima, yaani, hawajiendeshi kwa tabia nzuri, yenye maadili, na inayokubalika.

•    Kulingana na utafiti uliofanywa hivi karibuni na shirika la Gallup, Wamarekani waliohojiwa walisema kwamba katika miaka 22 iliyopita viwango vya maadili nchini Marekani vimeshuka zaidi sasa kuliko wakati mwingine wowote ndani ya kipindi hicho.

•    Utafiti mwingine uliohusisha watu 32,000 katika nchi 28, asilimia 65 kati ya waliohojiwa walisema kwamba ukosefu wa heshima leo haujawahi kuonekana wakati mwingine katika historia.

 Biblia ilitabiri tabia tunayoona leo.

•    “Katika siku za mwisho nyakati ngumu zitakuja. Watu watajipenda wenyewe na kupenda fedha. Watakuwa na majivuno na wenye jeuri. Watawatukana wengine kwa matusi. Hawatawatii wazazi wao. Watakuwa wasio na shukrani. . . . Hawatakuwa na upendo kwa wengine na . . . watakuwa wakatili.”​—2 Timotheo 3:1-3, Tafsiri ya Kusoma kwa Urahisi.

 Ili upate habari zaidi kuhusiana na jinsi unabii huu unavyotimizwa, soma makala yenye kichwa, “Je, Biblia Ilitabiri Mitazamo na Matendo ya Watu Leo?”

 Katika ulimwengu ambapo heshima inazidi kuzorota, mamilioni ya watu wameona kwamba Biblia ni mwongozo unaofaa wa kumsaidia mtu kutenda kwa heshima. Mashauri yake “yanategemeka sikuzote, sasa na milele.” (Zaburi 111:8) Fikiria mifano kadhaa:

•    Biblia inasema hivi: “Mambo yote mnayotaka watu wawatendee ninyi, lazima ninyi pia mwatendee vivyo hivyo.”​—Mathayo 7:12.

   Maana: Tunapaswa kuwatendea wengine kwa fadhili na heshima, kama tu tunavyotaka kutendewa.

•    Biblia inasema hivi: “Kwa sababu mmeacha udanganyifu, semeni ukweli kila mmoja na mwenzake.”​—Waefeso 4:25.

   Maana: Tunapaswa kuwa wanyoofu katika yote tunayosema na kufanya.

 Ili upate habari nyingi zaidi kuhusu habari hii, tafadhali soma:

•    Mnara wa Mlinzi toleo lenye kichwa “Mema na Mabaya—Mwongozo Unaoweza Kutegemea.”

•    Makala yenye kichwa “Jinsi Biblia Inavyoweza Kukusaidia Kuwa Mstahimilivu.”