Katika siku hizi za mwisho tunatarajia kusikia “kuhusu vita na habari za vita.” (Mathayo 24:6) Hata hivyo, ndugu zetu wanapokabili matatizo kwa sababu ya mambo haya wanapata msaada wanaohitaji. Ripoti ya 3 ya Baraza Linaloongoza ya 2022 ilikuwa na habari zenye kutia moyo kuhusu kazi ya kutoa msaada inayofanywa Ulaya Mashariki ili kuwasaidia wale walioathiriwa na vita vinavyoendelea nchini Ukrainia. Msaada huo unafikishwaje licha ya vita vinavyoendelea katika maeneo hayo? Jitihada zetu za kutoa msaada zimewasaidiaje akina ndugu na dada nchini Ukrainia?

 Februari 24, 2022, siku ambayo vita vilizuka nchini Ukrainia, Halmashauri ya Waratibu iliidhinisha fedha ambazo zingetumiwa kuwasaidia ndugu zetu nchini Ukrainia. Ofisi ya tawi ya Ukrainia ilianza kununua bidhaa zilizopatikana nchini na kisha kuzisambaza upesi kupitia Halmashauri 27 za Kutoa Msaada zilizokuwa zimewekwa.

 Isitoshe kazi ilianza mara moja katika Makao Makuu ya Mashahidi wa Yehova ili kuchunguza ni msaada wa aina gani nyingine ambao ungehitajika. Halmashauri ya Waratibu na Halmashauri ya Utangazaji ya Baraza Linaloongoza ziliomba Idara ya Ununuzi ya Ulimwenguni Pote ishirikiane na wawakilishi kutoka kwenye ofisi ya tawi ya Ukrainia na ya Poland kushughulikia uhitaji huo na kufanya mipango hususa. Kila siku, akina ndugu kutoka kwenye Idara ya Ununuzi, ya Usafirishaji, na ya Kisheria katika ofisi hizo mbili walikutana pamoja na mshiriki mmoja wa Halmashauri ya Tawi ya Ukrainia, pamoja na washiriki wa Idara ya Ununuzi ya Ulimwenguni Pote ili kutekeleza mipango iliyofanywa.

 Jay Swinney wa Idara ya Ununuzi ya Ulimwenguni Pote alisema hivi: “Kwanza, tulihitaji kujua ni nini kinachohitajika. Tulitaka kuwaandalia akina ndugu vyakula na vifaa vya usafi ambavyo walikuwa wamezoea kutumia. Hata hivyo, kujua ni nini kilihitajika ilikuwa hatua ya kwanza tu. Tulihitaji pia kujua jinsi ya kusafirisha bidhaa hizo hadi Ukrainia kwa njia salama na haraka iwezekanavyo ingawa vita vilikuwa vikiendelea.”

 Kufikia Machi 9, 2022, akina ndugu walikuwa wamepata habari kamili kuhusu bidhaa ambazo zinahitajika. Waligawa maboksi ya vyakula kama vile nyama ya kopo, samaki, nafaka, mchele, na maharagwe na pia vifaa vya usafi kama sabuni na karatasi za kutumia chooni. Wakati huo, ilikadiriwa kwamba ikiwa mtu angepewa bidhaa hizo za kutumiwa kwa muda wa majuma manne ingegharimu dola 65 (za Marekani) kwa kila mtu. Halmashauri ya Waratibu iliona kwamba huenda maelfu ya ndugu zetu wangekuwa na uhitaji hivyo iliidhinisha kiasi kikubwa cha pesa kwa ajili ya msaada huo. Hata hivyo, akina ndugu wangesafirishaje msaada huo bila kuhatarisha uhai wao isivyo lazima?

 Machi 13, 2022, akina ndugu wawili kutoka Poland walifanya majaribio ya kusafirisha bidhaa kutoka Poland hadi kwenye ghala lililo karibu na Lviv, nchini Ukrainia. Siku kadhaa kabla ya safari hiyo, wanabetheli nchini Poland na Ukrainia waliwasaidia ndugu hao wawili kujiandaa kwa ajili ya safari yao. Ofisi ya tawi ya Poland ilikamilisha hati za kisheria zilizohitajiwa ili kuvuka mpaka wa Ukrainia kwa kusudi la kupeleka msaada. Pia, walihakikisha kwamba magari ya ndugu hao yalikuwa na alama zinazoonyesha waziwazi kwamba wanapeleka msaada, na walishirikiana na akina ndugu nchini Ukrainia ili kutafuta njia ambayo ingekuwa rahisi zaidi kutumiwa baada ya kuvuka mpaka. Kutokana na matayarisho haya mazuri, na baraka za Yehova, msaada huo ulifika Lviv na kisha Halmashauri za Kutoa Msaada zilipata bidhaa hizo ndani ya muda wa saa 24. Ndugu zetu kutoka Poland walirudi salama.

 Ingawa walifanikiwa katika safari hiyo ya kwanza, akina ndugu walisafirisha tani moja tu ya bidhaa. Wakati huo bado kulikuwa na uhitaji wa tani nyingine 220! Wangewezaje kusafirisha bidhaa nyingi hivyo kwa uharaka?

 Baada ya kusoma ripoti kwenye jw.org kuhusu athari ambazo ndugu zetu wamekabili nchini Ukrainia, watu katika sehemu mbalimbali ulimwenguni walitaka kusaidia. Wengi wanaoishi katika maeneo ya mbali walitoa michango kwa ajili ya kazi ya ulimwenguni pote ya Mashahidi wa Yehova kwa sababu waliamini kwamba michango hiyo ingetumiwa vizuri. Na wengine ambao wanaishi katika nchi zinazopakana na Ukrainia walitumia muda wao, nguvu zao, na mali zao ili kushiriki katika kutoa msaada. Hii ni mifano michache.

 Nchini Poland, wajitoleaji walitayarisha makumi ya maelefu ya vifurushi vyenye vitu muhimu, na watoto walichora kadi. Bartosz Kościelniak, mshiriki wa Idara ya Ununuzi ya Ofisi ya Tawi ya Poland alisema hivi: “Mara nyingi nilisoma andiko la Zaburi 110:3, inayosema: “Watu wako watajitoa kwa hiari,” lakini nimejionea mwenyewe jinsi mamia ya wajitoleaji wanavyojitokeza kwa wakati mwafaka wakiwa tayari kufanya kazi hii. Hili limenithibitishia zaidi ukweli wa maneno hayo.”

 Shahidi mmoja wa Yehova anayemiliki kampuni ya kimataifa ya kusafirisha mizigo, alitoa malori yake na pia akaweka mafuta mwenyewe ili yatumiwe kusafirisha msaada, anasema hivi: “Ninaona hii ni fursa yangu ya kuwaonyesha upendo ndugu zangu na pia Yehova. Nimefurahi sana kupata pendeleo hili.” Inakadiriwa kwamba ndugu na dada walichangia zaidi ya lita 7,700 za mafuta, na wengine walitumia muda wao na nguvu zao ili kusafiri umbali wa kilomita 48,000 ili kupeleka msaada huo!

 Kwa sababu ya utayari wa akina ndugu na dada, kufikia Machi 28, yaani, siku 15 baada ya safari ya kwanza ya majaribio, tani 110 za vyakula, vifaa vya usafi, na dawa zilikuwa zimesafirishwa hadi Ukrainia! Kwa sababu akina ndugu na wauzaji walitoa michango yao kwa ukarimu, kiasi cha pesa kilichokuwa kimeidhinishwa kwa ajili ya msaada huo kilipunguzwa. Kufikia sasa, Mashahidi wa Yehova wamepeleka tani 209 za msaada nchini Ukrainia. Akina ndugu walihisije baada ya kupokea msaada huo?

 Baada ya mizigo kufika Lviv, Halmashauri za Kutoa Msaada zilipeleka vifurushi kwa akina ndugu wenye uhitaji kotekote nchini Ukrainia. Mizigo hiyo ilisafirishwa kwenda majiji tofauti-tofauti, baadhi ya majiji hayo yako umbali wa zaidi ya kilomita 1,300 kutoka Lviv. Ingawa kazi hiyo ilifanywa kwa kufuata utaratibu mzuri, bado ilichukua muda mrefu. a

 Markus Reinhardt, mshiriki wa Halmashauri ya Tawi ya Ukrainia anasema hivi: “Katika vita hivi vinavyoendelea, akina ndugu wengi wamejionea moja kwa moja upendo wa Yehova na manufaa ya kufuata mwongozo wa tengenezo lake—hata kabla ya msiba kutokea. Kwa mfano, kila familia inatiwa moyo kuhifadhi chakula na maji nyumbani mwao wanayoweza kutumia kwa wiki kadhaa. Mzee anayeitwa Anton anayetumikia katika jiji la Kyiv anasema hivi: ‘Tengenezo la Yehova linatutayarisha kwa ajili ya hali ngumu zinazoweza kutokea na tunashukuru kwa hilo. Kuhifadhi chakula na maji na pia kuwa na redio karibu kumeokoa maisha yetu.’ Tunashukuru sana kwamba akina ndugu walitii mwongozo huo kwa sababu ofisi ya tawi ilihitaji muda ili kuandaa msaada huo.”

 Ndugu zetu walihisije walipopokea msaada? Mykola na Zinaida wanaoishi Kharkiv, walisema hivi: “Tumeguswa moyo kwa sababu ya upendo wenu. Asanteni sana kwa kutuletea chakula na dawa. Bila shaka, tumejionea mkono wa Yehova katika jambo hili.” Valentyna ambaye pia anaishi katika eneo hilo, anasema hivi: “Tangu vita vilipoanza kumekuwa na foleni ndefu kwenye maduka. Haikuwa rahisi kupata kile tulichohitaji. Lakini Yehova alijua na aliona tatizo tulilokabili. Ameteua akina ndugu ili kutuletea vitu tulivyohitaji hadi nyumbani katika vifurushi vya msaada! Katika hali ngumu kama hizi, inaweza kuonekana kama hatuna tumaini lolote, mtu anajionea jinsi Yehova na tengenezo lake linavyomtunza kwa njia ya pekee. . . . Inatia moyo sana kuona msaada wa Yehova unavyotufikia kwa wakati tunapouhitaji zaidi.”

 Yevhen, Iryna, na Mykyta waliokimbia kutoka Mariupol wanasema hivi: “Tunashukuru sana kwa jinsi mlivyoitunza familia yetu kwa upendo. Kwa hakika msaada huo ulifika kwa wakati unaofaa. Mwanzoni tulifikiria kwamba kulikuwa tu na bidhaa kwenye vifurushi, lakini tulipovifungua tuliona vifurushi hivyo vilikuwa vimebeba upendo wenu pia!”

 Bila shaka tunaona kwamba Yehona anatumia roho yake kuwapa watu wake mwongozo ili wafaulu kupeleka msaada licha ya “vita na habari za vita.” Michango yenu kwa kazi ya ulimwenguni pote imechangia kwa sehemu kubwa katika jitihada hizi za kutoa msaada. Michango mingi kati ya hiyo ilitolewa kupitia donate.pr418.com. Tunathamini sana kwa ukarimu wenu!

Jitihada za Kutoa Msaada kwa Njia Salama na Haraka Iwezekanavyo

1. Februari 24, 2022: Halmashauri ya Waratibu iliidhinisha fedha ambazo zingetumiwa kuwasaidia ndugu zetu nchini Ukrainia, na hivyo ofisi ya tawi iliweza kuanza kutoa msaada

2. Februari 24–Machi 8, 2022: Ofisi ya tawi ya Ukrainia ilianza kununua bidhaa zilizopatikana nchini na kisha kuzisambaza upesi kupitia Halmashauri za Kutoa Msaada. Ofisi ya tawi pia ilijitayarisha kupokea na kuzisambaza bidhaa kutoka Poland

3. Machi 9, 2022: Halmashauri ya Waratibu iliidhinisha kupelekwa kwa msaada nchini Ukrainia

4. Machi 10–12, 2022: Mipango ilifanywa kwa ajili ya safari ya majaribio ya kupeleka chakula na bidhaa nyingine kutoka Poland hadi Lviv, nchini Ukrainia

5. Machi 13, 2022: Safari ya kwanza ya kupeleka chakula na bidhaa nyingine kutoka Poland hadi Lviv, nchini Ukrainia ilianza

6. Machi 14–16, 2022: Kwenye Jumba la Kusanyiko lililo karibu na Poznan, nchini Poland, wajitoleaji wa Idara ya Usanifu Majengo na Ujenzi walitayarisha vifurushi vya chakula na bidhaa nyingine

7. Machi 17, 2022: Siku nne baada ya kufanya safari yenye mafanikio, akina ndugu walianza kupeleka tani 14 za msaada kwenye mpaka wa Ukrainia

8. Machi 21–27, 2022: Walitumia mbinu hiyohiyo, kutayarisha vifurushi nchini Poland na kisha kuvisafirisha kwenda Ukrainia na kuvisambaza kwenye maeneo yenye uhitaji ndani ya saa 24

9. Machi 28, 2022: Siku 20 baada ya idhini kutolewa, tani 110 za vyakula, vifaa vya usafi, na dawa zilikuwa zimesafirishwa hadi Ukrainia

 Kufikia sasa Mashahidi wa Yehova wamepeleka zaidi ya tani 209 za msaada nchini Ukrainia.