Video zinazoonyeshwa katika makusanyiko yetu ya eneo, zinagusa mioyo yetu na kuboresha uelewaji wetu wa mafundisho ya Biblia. Kusanyiko la Eneo la 2020 “Shangilieni Sikuzote!” lina video 114, kutia ndani hotuba 43 zilizotolewa na washiriki wa Baraza Linaloongoza na wasaidizi wao. Je, umewahi kujiuliza ni gharama na jitihada gani zimehusika ili kutayarisha video hizo?

 Ndugu na dada zetu 900 hivi, kutoka nchi mbalimbali wametumia wakati na stadi zao kusaidia matayarisho ya programu hii. Kwa ujumla, wametumia saa 100,000 hivi katika kipindi cha miaka miwili kwenye mradi huu. Hilo linatia ndani saa 70,000 zilizotumiwa ili kukamilisha drama ya Biblia ya dakika 76 yenye kichwa Nehemia: “Shangwe ya Yehova Ndiyo Ngome Yenu.”

 Kama unavyoweza kuwazia, gharama nyingi zimehusika ili kuhakikisha kwamba wajitoleaji hao waliojidhabihu wanapata malazi, vifaa bora vya kazi, mashine, na maeneo yanayofaa ya kufanyia kazi ili kukamilisha kazi hiyo.

 Jared Gossman, anayefanya kazi katika Idara ya Huduma za Sauti na Video, anasema hivi: “Halmashauri ya Ufundishaji ya Baraza Linaloongoza inapenda kuhakikisha kwamba tamaduni na maeneo mbalimbali yanaonyeshwa katika video zetu. Kufanya hivyo husaidia kuonyesha kwa usahihi undugu wetu wa ulimwenguni pote. Ili kutimiza lengo hilo, timu 24 katika nchi 11 zilifanya kazi pamoja katika mradi huu. Ili kufanikisha kazi yote hiyo inayofanywa na watu katika sehemu mbalimbali ulimwenguni, pesa, mipango, na uratibu mwingi unahitajika.”,

 Video zetu nyingi zinahitaji vifaa na vikao maalumu. Kwa mfano, vikao vilivyotumika katika video ya Nehemia: “Shangwe ya Yehova Ndiyo Ngome Yenu,” vilitengenezwa katika studio iliyopo katika eneo la Mt. Ebo karibu na Patterson, New York, Marekani. Ili kuhakikisha kwamba michango inatumiwa kama ilivyokusudiwa na wakati uleule kuhakikisha kwamba sinema inatoa habari sahihi za kihistoria, ndugu walitumia vyombo vinavyofaa ili kuonyesha kuta za Yerusalemu la kale. Kila ukuta ulitengenezwa kwa viunzi vya mbao vyenye urefu wa mita sita (futi 20) vilivyofunikwa kwa sponji iliyopakwa rangi ili ifanane na jiwe. “Kuta” hizo za mfano zilihamishwa ili kutumika katika maonyesho tofauti na hivyo kupunguza idadi ya vifaa vilivyohitajika. Hata hivyo, dola 100,000 hivi za Marekani zilihitajika ili kutengeneza vyombo kwa ajili ya drama pekee. a

 Kujua mambo hayo kunaongeza uthamini wetu kuelekea programu ya kusanyiko la eneo la mwaka huu. Tuna hakika kwamba jitihada zote hizo zilizotumika katika kutayarisha programu hii zitamletea Yehova sifa ulimwenguni pote. Asante sana kwa mchango wako wenye ukarimu kuelekea kazi ya ulimwenguni pote kupitia donate.pr418.com na njia nyingine.