Mashahidi wa Yehova wanaendelea na utendaji wa kidini na kutoa misaada katika zaidi ya nchi 200. Lakini ni nchi 35 tu zilizo na uwezo wa kushughulikia kikamili gharama nchini kwao kwa kutegemea michango inayotolewa nchini humo. Gharama hushughulikiwaje katika nchi zilizo na uwezo mdogo wa kifedha?

 Baraza Linaloongoza la Mashahidi wa Yehova huchanganua uhitaji wa kiroho na utendaji wa waamini wenzao duniani pote. Makadirio hufanywa ya jinsi michango hiyo itakavyotumiwa vizuri. Ofisi ya tawi ikipokea michango mingi kuliko inavyohitaji katika eneo lao, ziada hiyo inaweza kutumiwa na nchi zenye uhitaji. Mpango huo unafuata kielelezo kilichowekwa na Wakristo wa karne ya kwanza ambao walisaidiana kujazia upungufu wa wenzao na hivyo ‘kukawa na usawazisho.’ (2 Wakorintho 8:14) Walitumia ziada yao kujazia upungufu wa Wakristo wengine ambao walikuwa na uhitaji.

 Ndugu zetu ambao wamepokea michango ya ziada kutoka ofisi nyingine za tawi wanahisije? Kwa mfano, nchini Tanzania ambako zaidi ya nusu ya watu wanapata mshahara wa chini ya dola mbili kwa siku (angalau Ksh. 215 au Tsh. 4,640), michango kama hiyo ilitumiwa kurekebisha Jumba la Ufalme linalotumiwa na Kutaniko la Mafinga. Kutaniko hilo liliandika hivi: “Toka ukarabati ukamilike kumekuwa na ongezeko la hudhurio la mikutano. Tunashukuru sana akina ndugu kwa tengenezo la Yehova na ukarimu wa michango ya undugu wa ulimwenguni pote. Umefanya sisi pia tufurahie kupata sehemu iliyo bora, nzuri sana ya ibada.”

 Baadhi ya ndugu zetu nchini Sri Lanka wamekabili upungufu wa chakula kwa sababu ya ugonjwa wa virusi vya corona (COVID-19). Miongoni mwao ni Dada Imara Fernando, na mtoto wake, Enosh. Licha ya hilo, walipata msaada waliohitaji kutokana na michango kutoka nchi nyingine. Waliandika hivi katika kadi waliyojitengenezea: “Tunawashukuru akina ndugu waliotuonyesha upendo wakati wa nyakati hizi ngumu. Tunafurahi sana kuwa sehemu ya familia hii, na tunaendelea kusali kwamba Yehova awasaidie ndugu zetu wote katika siku hizi za mwisho.”

 Haidhuru ndugu zetu wanaishi wapi, wanachochewa kushiriki na wengine vitu walivyo navyo. Kwa mfano, Enosh alitengeneza kisanduku kidogo cha michango ili yeye pia aweze kusaidia familia zilizokuwa na uhitaji. Pia, Guadalupe Álvarez anaonyesha ukarimu huohuo. Anaishi katika jimbo la Mexico ambako ni watu wachache tu wanapokea mshahara wa chini zaidi uliowekwa na serikali na wengine hata hawana njia ya kujiruzuku. Hata hivyo, yeye huchangia kwa kadiri anayoweza. Anaandika hivi: “Ninamshukuru Yehova kwa wema wake na upendo wake mshikamanifu. Ninajua kwamba michango yangu itaongezwa kwenye michango ya wengine na itawafaidi ndugu walio na uhitaji.”

 Ofisi za tawi zinazotuma pesa katika maeneo yenye uhitaji hufurahi kufanya hivyo. Anthony Carvalho mshiriki wa Halmashauri ya Ofisi ya Tawi ya Brazili anasema hivi: “Kwa miaka mingi, tulihitaji msaada wa kifedha kutoka nchi nyingine ili kutegemeza kazi nchini kwetu. Kwa sababu ya utegemezo huo, kulikuwa na ongezeko kubwa. Sasa hali yetu ya kiuchumi imebadilika na tuna pendeleo la kusaidia wengine. Ndugu zetu hufikiria jinsi kazi yetu ya kuhubiri inavyoendelea ulimwenguni pote na kuona sehemu wanayotimiza wakiwa wanafunzi wa Yesu wanaojidhabihu.”

 Ni njia gani nzuri zaidi ambayo Mashahidi wa Yehova wanaweza kuwategemeza ndugu na dada zao wenye uhitaji? Si kwa kutuma pesa moja kwa moja kwenye ofisi za tawi za nchi nyingine, bali kwa kutoa michango kwa ajili ya kazi ya ulimwenguni pote. Wanaweza kufanya hivyo kupitia sanduku la michango la kutaniko lililoandikwa “Kazi ya Ulimwenguni Pote” au kupitia donate.pr418.com. Michango yote hiyo inathaminiwa sana.