Borbonio Aybar alibatizwa Januari 19, 1955, kazi yetu ilipokuwa imepigwa marufuku. Baada ya kubatizwa aliongoza mafunzo mengi ya Biblia huko Monte Adentro na Santiago. Marufuku ilipoondolewa mwaka wa 1956, baadhi ya wanafunzi wake walibatizwa, kutia ndani mke wake.

Mnamo Julai 1957, maofisa wa serikali walikutana huko Salcedo ili kuwajadili Mashahidi. “Francisco Prats-Ramírez ndiye aliyekuwa msemaji mkuu,” anaeleza Ndugu Aybar. “Prats-Ramírez alisema, ‘Bado muda mfupi tu, wataangamizwa.’” Siku chache baadaye Julai 19, 1957, polisi waliwavamia Mashahidi wa Yehova huko Blanco Arriba, El Jobo, Los Cacaos, na Monte Adentro.

“Nilikuwa miongoni mwa wale waliokamatwa,” anasimulia Ndugu Aybar. “Tulipelekwa kwenye makao makuu ya jeshi huko Salcedo. Baada tu ya kuwasili, kanali aitwaye Saladín alinipiga sana. Alitutisha huku akitutazama kwa hasira. Kisha tukapangwa kwenye mistari miwili, mmoja wa wanaume na mwingine wa wanawake. Askari walianza kuwapiga mateke na kuwatandika wanaume, na kuwachapa wanawake kwa viboko, huku wakisema ‘Mimi ni Mkatoliki na ninaua.’”

Ndugu Aybar alitozwa faini na kufungwa gerezani miezi mitatu. Aliendelea kusema: “Tulipokuwa gerezani, jenerali wa jeshi aitwaye Santos Mélido Marte alitutembelea. Alituambia: ‘Nimeisoma Biblia, na ninajua kwamba Yehova ndiye Mungu. Hamjafanya kosa linalostahili kifungo cha gereza, lakini siwezi kuwasaidia kwa  sababu watu waliofanya mfungwe ni maaskofu Wakatoliki. Wao tu ndio wanaoweza kuwatoa gerezani au jefe (“bosi,” Trujillo).’”

Kati ya watu waliokamatwa ni binti ya Fidelia Jiménez na binti za dada yake, ambao wote alikuwa amewafundisha Biblia. Ingawa mwanzoni Fidelia hakukamatwa, alijipeleka kwa wenye mamlaka ili afungwe gerezani na hivyo kuwatia moyo waliokuwa gerezani. Wakati huo, Ludovino Fernández, kamanda wa jeshi mwenye cheo cha juu aliyechukiwa kwa sababu ya kiburi na ukatili wake, alifanya ziara rasmi gerezani. Aliagiza Fidelia aletwe kisha akamuuliza, “Kwa hiyo, wewe ndiye bosi?”

“Hapana,” Fidelia akajibu. “Ninyi ndio mabosi.”

“Basi, wewe ndiye mchungaji?” akauliza Fernández.

“Hapana, Yesu ndiye mchungaji,” akajibu Fidelia.

“Je, si wewe ndiye uliyefanya watu hawa wote wafungwe?” akauliza Fernández. “Wewe ndiye uliyewafundisha, sivyo?”

“Hapana,” akasema Fidelia. “Biblia ndiyo iliyofanya watu hawa wafungwe. Wanafuata mambo waliyojifunza katika Biblia.”

Wakati huohuo, ndugu wawili waliokuwa wamekamatwa, Pedro Germán na Negro Jiménez, ambaye alikuwa binamu ya Fidelia, wakapita ukumbini. Walikuwa wanatolewa kwenye kifungo cha upweke kwenda kwenye seli za kawaida. Shati la Negro lilikuwa limejaa damu iliyokauka, nalo jicho la Pedro lilikuwa limevimba sana. Alipoona jinsi walivyokuwa wamepigwa kikatili, Fidelia akamuuliza yule kamanda, “Hivi ndivyo mnavyowatendea watu wazuri, wanyoofu, wanaomwogopa  Mungu?” Alipotambua kwamba hangeweza kumtisha Fidelia, Fernández aliagiza kwamba arudishwe seli.

Watumishi waaminifu wa Yehova walihitaji ujasiri ili kukabiliana na upinzani huo mkali, na kwa kweli walionyesha ujasiri! Hata maofisa wa serikali waliona jambo hilo. Kwa mfano, Julai 31, 1957, Luis Arzeno Colón, inspekta wa rais, alimwandikia waziri wa mambo ya serikali akilalamika hivi: “Ingawa sheria iliyopitishwa hivi karibuni na Bunge la Taifa ilipiga marufuku shughuli za kidini za dhehebu la Mashahidi wa Yehova, bado wafuasi wengi wanashikilia msimamo wao.”