José ni ndugu kijana painia anayeishi katika kitongoji kimoja cha jiji la Luanda, Angola. Anafundisha katika shule moja iliyo karibu na Jumba la Ufalme. Kwa sababu ya sifa nzuri za Kikristo na ni mwalimu stadi, wanafunzi wake 86 wanampenda na kumheshimu sana. Mikutano yake ya kutaniko ya katikati ya juma huanza saa 10:00 alasiri, kwa hiyo yeye aliruhusiwa kuondoka  kazini mapema siku hiyo inapofika. Baada ya kazi, yeye huenda moja kwa moja kwenye Jumba la Ufalme.

Baadhi ya wanafunzi hawakujua sababu iliyomfanya José aondoke mapema shuleni. Ili wajue, siku moja wanafunzi wawili walimfuata na wakahudhuria mikutano. Siku nyingine, wanafunzi wengine watatu walihudhuria mikutano José alipokuwa na mgawo katika Mkutano wa Utumishi. Habari hiyo ilienea haraka darasani. Majuma yaliyofuata, idadi ya wanafunzi waliohudhuria mkutano huo iliongezeka kutoka 5 hadi 21. Wahubiri kutanikoni waliwauliza wanafunzi hao ikiwa wangependa kujifunza Biblia, na wengi wao walikubali kujifunza. Wanafunzi hao walipoenda na machapisho shuleni, wanafunzi wengine waliyapenda na hivyo wakaanza kuhudhuria mikutano. Mwishoni mwa mwaka, wanafunzi 54 kati ya wanafunzi wake 86 walikuwa wamehudhuria mikutano. José aliripoti kwamba wanafunzi 23 wanafanya maendeleo mazuri ya kiroho na wanahudhuria mikutano.

Mapainia wa pekee Joseph na Evezi walipowasili katika mgawo wao mpya nchini Nigeria, wahubiri wengi waliovunjika moyo waliwaambia hivi: “Hatuna eneo la kutosha. Eneo lote limehubiriwa tena na tena.” Baada ya mwaka mmoja, Joseph aliiandikia ofisi ya tawi hivi: “Licha ya ubaguzi na kutopendezwa, tunafaulu kuhubiri katika eneo letu kila siku. Tunapoenda kuhubiri, tunabeba kifaa cha kuchezea DVD ili tuwaonyeshe video  watoto, vijana, na watu wazima pia. Matokeo ni kwamba kila mwezi mimi na mke wangu tunajifunza Biblia pamoja na watu 18, na pindi nyingine tunashindwa kuwatembelea wanafunzi wetu wote wa Biblia. Pia, watoto hutuomba tuwaonyeshe ‘Video za Caleb.’”

Mwezi wa Aprili 2014, ofisi ya tawi ya Kongo (Kinshasa) ilipokea barua yenye kusisimua kutoka kwa kikundi  cha wavuvi wanaoishi kwenye Kisiwa cha Ibinja kilichoko Ziwa Kivu. Mara nyingi wavuvi hao husafiri hadi kwenye miji ya karibu kwa ajili ya biashara. Siku moja walikutana na Mashahidi wa Yehova katika jiji la Bukavu. Mashahidi hao waliwahubiria habari njema na kuwapa Biblia na machapisho mengine.

Wavuvi hao walithamini sana yale waliyosoma na wakawaambia wengine kwenye kisiwa hicho mambo waliyokuwa wamejifunza. Kwa kuwa watu wengi walipendezwa, wavuvi hao walimtuma mmoja wao kwenda jijini Bukavu kuwatafuta Mashahidi ili kuwaalika wawatembelee kisiwani Ibinja. Alipowakosa, aliamua kuiandikia hivi ofisi ya tawi: “Tafadhali, waambieni Mashahidi waje kutusaidia ili tuijue Biblia kama wao, na tujifunze jinsi tunavyoweza kupata uzima wa milele. Tutawapa mahali pa kulala. Nitatoa kiwanja changu ili tujenge kanisa. Kupitia vitabu vyenu, tumejifunza Maandiko yanayoonyesha kwamba makasisi na wachungaji wanatufundisha uwongo. Tunaamini tumeipata dini ya kweli. Hapa Ibinja, kuna watu wengi ambao wangependa kujifunza Biblia na kuwa Mashahidi wa Yehova.”

Barua hiyo ilionyesha kwamba kulikuwa watu 40 hivi waliotaka kujifunza Biblia katika kisiwa hicho. Kuna zaidi ya watu 18,000 katika Kisiwa cha Ibinja lakini hakuna Mashahidi. Ofisi ya tawi ilituma haraka mapainia wawili wa pekee waliojua lugha ya wenyeji wa kisiwa hicho.

“Sitawahi kamwe kukosa tena Ukumbusho.” Hivyo ndivyo alivyosema mchungaji wa kanisa mashuhuri la Kiprotestanti nchini Afrika Kusini. Ni nini kilichomchochea mchungaji huyo kuhudhuria Ukumbusho  mwezi wa Aprili, 2014? Alichochewa alipowaona ndugu wawili wa rangi tofauti waliokuwa wakihubiri pamoja walipopiga hodi nyumbani kwake. Inaelekea walijua kwamba mchungaji huyo hangependa kuzungumza nao. Adaine, mmoja kati ya ndugu hao anaeleza kilichotukia: “Jambo la kushangaza, alifungua mlango na kuturuhusu tuingie. Tulizungumza kwa muda mrefu. Alishangaa kuona mzungu akihubiri eneo la jamii ya watu weusi na aliongea naye kwa lugha ya watu weusi. Mchungaji huyo alianza kujifunza Biblia kwa ukawaida.”

Adaine anaendelea kusema hivi: “Mwanamume huyo amekuwa mmishonari na mchungaji kwa miaka zaidi ya 40, lakini alipata majibu yote ya maswali yake akiwa na umri wa miaka 80. Anakipenda kitabu Igeni Imani Yao. Tunapojifunza, yeye hukariri mambo fulani na kuyatumia anapohubiri kanisani. Aliwaonyesha watu wa kanisa lake kitabu Biblia Inafundisha Nini Hasa? Kisha akawaambia hivi: ‘Mashahidi wakija kwenu na kitabu hiki, wakaribisheni na msikilize wanayosema kwa sababu kitabu hiki kimejaa hazina za kiroho.’”

Mchungaji huyo alimwambia Adaine kwamba ameshauriwa vikali na viongozi wa kanisa lake na kwamba ameonywa asiongee kuhusu Mashahidi wa Yehova anapohubiri kanisani. Hakujua la kufanya. Adaine alikumbuka simulizi kuhusu kasisi mmoja nchini Myanmar katika Kitabu cha Mwaka—2013 cha Mashahidi wa Yehova. Adaine alipomsomea simulizi hilo, mchungaji huyo alisema: “Habari hiyo inanihusu mimi! Ninahitaji kufanya uamuzi muhimu sana, na ninapaswa kufanya hivyo haraka.”

 Mchungaji huyo alihudhuria kwa mara ya kwanza Ukumbusho wa Aprili 14, 2014, ndipo aliposema kwamba hatakosa tena kuhudhuria. Ameazimia kuacha kabisa kushirikiana na dini ya uwongo.

Baffour na Aaron ni mapainia wa pekee katika eneo la Bokabo lililoko magharibi mwa nchi ya Ghana, eneo linalokuzwa kakao. Eneo lao ni kubwa, lina nyumba ndogo-ndogo zilizotawanyika, na unaweza tu kupitia vijia vingi vyembamba vya miguu vilivyojipinda-pinda kwenye mashamba ya kakao ili ufike eneo hilo. Usipokuwa makini, unaweza kupotea. Siku moja, badala ya kupitia njia waliyozoea, Baffour na Aaron waliamua kutumia njia nyingine, ambayo iliwapeleka kwenye nyumba ambazo hawakuwahi kuzitembelea. Walimkuta Michael na Patience ambao walipendezwa na ujumbe wao na wakakubali kujifunza Biblia. Baadaye, Michael aliwaambia hivi: “Miaka miwili iliyopita, tuliacha kwenda kanisani kwa sababu tuligundua mambo ambayo hayapatani na mafundisho ya Biblia. Tangu wakati huo, kila jioni, mimi na Patience tumekuwa tukijifunza wenyewe Biblia, tukitafuta majibu ya maswali yetu. Tumekuwa tukisali ili tuijue kweli.” Licha ya kwamba walihitaji kutembea umbali mrefu kupitia mashamba ya kakao, mara moja walianza kuhudhuria mikutano. Wenzi hao wa ndoa walibatizwa mwaka jana na walianza kutumikia wakiwa mapainia wa kawaida. Sasa, wao pia wanatembea kwenye vijia vya mashamba hayo ya kakao wakiwatafuta wengine ambao ‘wamekuwa wakisali ili waijue kweli.’