Angela anayeishi nchini Suriname, alitembelea makao ya mayatima karibu na mahali anapoishi. Msimamizi wa makao hayo alikuwa dada asiyetenda, kwa hiyo alimruhusu Angela awahubirie watoto mayatima. Angela alizungumza na watoto 85 na akawaonyesha video zilizo kwenye Tovuti ya jw.org. Kisha akaanza kujifunza na wengi kati ya watoto hao. Mapainia wawili  walijiunga naye, na kila mmoja alifundisha kikundi chake. Dada huyo asiyetenda alisema kwamba aliwafundisha watoto hao nyimbo zilizo katika mojawapo ya vitabu vyetu vya nyimbo na aliwasomea hadithi za Biblia wakati wa usiku. Alisema kwamba alitaka kuhudhuria mikutano, lakini hangewaacha watoto hao 85 peke yao. Hivyo, mipango ilifanywa ili wote wahudhurie mikutano. Kwa kuwa makao hayo yalikuwa karibu, akina ndugu waliwasindikiza watoto hadi kwenye Jumba la Ufalme. Sasa, dada huyo pamoja na watoto wote 85 wanahudhuria mikutano kwa ukawaida.

Nchini Paraguai, Gabriel mwenye umri wa miaka sita alitafakari kuhusu umuhimu wa kuhubiri ujumbe wa Ufalme alipokuwa akirudi nyumbani kutoka kusanyikoni. Kisha Gabriel akakumbuka kwamba anataka kuingia katika Paradiso pamoja na babu yake, mtu aliyempenda sana. Hata hivyo, babu yake hakupendezwa na kweli na alimpinga mke wake na watoto ambao ni Mashahidi.

Alipofika nyumbani baada ya kusanyiko, Gabriel aliwaomba wazazi wake wampigie simu ya video babu yake anayeishi nchini Argentina. Gabriel alimweleza babu yake umuhimu wa kujifunza Biblia na akamuuliza, “Babu, ungependa kujifunza Biblia pamoja nami?” Babu yake alikubali. Gabriel alipendekeza watumie broshua Msikilize Mungu Uishi Milele. Kwa miezi kadhaa iliyofuata, walijifunza broshua hiyo pamoja. Kwa kuwa wote wawili hawawezi kusoma kwa ufasaha,  walifanya mazoezi mapema. Kila mara walipojifunza, Gabriel aliandaa somo mapema na kuvaa shati na tai.

Baadaye, babu na bibi (nyanya) yake waliamua kuwatembelea akina Gabriel kwa majuma kadhaa. Wakiwa huko, babu na bibi yake walihudhuria mikutano pamoja na familia hiyo. Babu ya Gabriel aliporudi Argentina, aliendelea kujifunza Biblia na ndugu nchini humo. Amefanya maendeleo, na sasa ni mhubiri ambaye hajabatizwa. Sasa, babu na bibi ya Gabriel husali pamoja kila siku. Gabriel pia anafanya maendeleo. Yeye pia ni mhubiri ambaye hajabatizwa. Babu yake anataka kubatizwa ili aonyeshe kwamba amejiweka wakfu kwa Yehova.

Nchini Brazili, Jennifer alipokuwa akigawa trakti Je, Kweli Wafu Wataishi Tena? alibisha hodi kwenye nyumba ya mwanamke aliyekuwa akijitayarisha kuhudhuria  mazishi ya rafiki yake. Jennifer akamwambia kwamba alitaka kumpa trakti iliyozungumzia tumaini la ufufuo. Mwanamke huyo alishangazwa na kichwa cha trakti hiyo, hata hivyo akaichukua. Alipoulizwa ikiwa angependa kuchukua trakti zaidi ili apelekee familia iliyofiwa, mwanamke huyo alikubali na akaomba trakti tisa zaidi.

Baadaye, mwanamke huyo alipotembelewa tena na Jennifer, alisema hivi: “Uliponitembelea mara ya kwanza, baadaye nilihisi ni kana kwamba ulitumwa kunitembelea. Mungu alikutuma uniletee faraja niliyohitaji sana.” Alikuwa amegawa trakti zote. Mshiriki wa familia iliyofiwa aliisoma trakti yote kwa sauti alipokuwa akitoa hotuba ya mazishi. Kila mtu alithamini na kumshukuru mwanamke huyo kwa kuwaletea ujumbe huo uliowafariji. Mwanamke huyo alikubali kujifunza Biblia.

Wanabetheli watatu nchini Haiti walikuwa wakisafiri kwa gari maridadi za abiria ziitwazo tap-tap. Katika safari yao ya saa mbili na nusu, waliwahubiria abiria wenzao kuhusu tumaini la Ufalme na kuwaachia magazeti 50 na trakti 30. Mwanabetheli aitwaye Gurvitch, alimsomea abiria mmoja habari fulani kutoka kwenye gazeti la Amkeni! Kijana aitwaye Pépé alikuwa akisikiliza na mara moja akajiunga na mazungumzo hayo. Aliomba kufundishwa Biblia, na jambo la kushangaza ni kwamba aliishi kwenye eneo la kutaniko la akina Gurvitch. Tangu alipohubiriwa mara ya kwanza Januari 2014, Pépé amehudhuria karibu mikutano na makusanyiko yote. Anazungumza na wengine kuhusu mambo mapya anayojifunza, na hivi karibuni anatazamia kuwa mhubiri ambaye hajabatizwa.