Mashahidi wa Yehova—Ripoti ya Kitabu-Mwaka 1994

KUPATANA na andiko letu la mwaka uliopita, sala yetu ya bidii tukiwa Mashahidi wa Yehova imekuwa: “Unifunze mimi, Ee, Yehova . . . Ungamanisha moyo wangu kuhofu jina lako.” (Zab. 86:11, New World Translation of the Holy Scriptures) Kama mtunga-zaburi Daudi, twataka tufunzwe na Yehova. Na Yehova amejibu sala yetu ya kutaka ufundishaji wa kimungu kwa njia nzuri ajabu kama nini!

Wakati wa mwaka uliopita, kwenye Mafunzo ya Kitabu ya Kutaniko yetu, tulinufaika kutokana na funzo la kina kirefu juu ya yule mtu mkuu zaidi aliyepata kuishi, Mwana mzaliwa-pekee wa Mungu, yule ambaye aonyesha kikamili sifa za Baba yake. (Yn. 8:23; Ebr. 1:3) Kwa msaada wa Mnara wa Mlinzi, tuliimarishwa pia kwa kujifunza juu ya rehema na msamaha wa Yehova, na vichwa kama vile kulinda-salama maisha yetu ya familia, kuwa na maoni yaliyosawazika juu ya elimu ya kilimwengu, kuandaa msaada wenye upendo kwa wagonjwa na wazee-wazee, na kutembea kwa hekima kuhusiana na ulimwengu, pamoja na jinsi ya kusitawisha sifa kama vile ujitiisho wa kimungu, imani, wema-adili, na kujidhibiti. Kwa msaada wa Mkutano wa Utumishi na Shule ya  Huduma ya Kitheokrasi, tulisaidiwa kuwa wenye matokeo zaidi katika huduma yetu na kuonyesha upendezi mkubwa zaidi kwa watu. Hayo yote yamekuwa na manufaa mengi kama nini! Na katika nchi nyingi, mwaka wa utumishi ulitamatishwa kwa kuwa na Mkusanyiko wa Wilaya wa “Ufundishaji wa Kimungu” uliokuwa mzuri ajabu.

Kupokea ufundishaji wa kimungu si kwa kusudi la kuwa na uelewevu wa akilini tu. Ufundishaji huo umekusudiwa kufinyanga utu ulio ndani yetu ili tusiwe na wonyesho wa nje tu wa Ukristo. Katika kujibu sala yetu, Yehova hutusaidia kuungamanisha moyo wetu ili tusiwe wenye moyo nusu-nusu, au baridi-baridi, katika ibada yetu kwa Mungu bali tuwe wenye bidii katika kufanya mapenzi ya kimungu.

Kutoka kotekote ulimwenguni twapokea ripoti zinazotoa ithibati juu ya aina ya bidii itokanayo na moyo huo ulioungamanishwa. Kwa sababu ya baraka ya Yehova juu ya jitihada zetu  zilizounganika, wakati wa mwaka wa utumishi uliopita, kilele cha watu 4,709,889 walijitoa wenyewe katika utumishi wa Yehova, wakishiriki kibinafsi katika kuambia wengine juu ya Ufalme wa Mungu. Katika nchi zinazoongezeka hesabu, kuna wapiga mbiu ya Ufalme zaidi ya 100,000. Hali ni hiyo katika nchi mbili katika Amerika Kaskazini, tatu katika Amerika ya Latini, tano katika Ulaya, moja katika Afrika, na mbili katika Mashariki ya Mbali. Kwa ujumla, Mashahidi wa Yehova wanahubiri katika nchi 231. Kwa kweli sasa wao wana shughuli nyingi katika nchi zaidi ya 70 ambako hakukuwa Mashahidi wowote miaka 40 iliyopita.

Wahubiri hao wa Ufalme walijitoa wenyewe kikweli kila mahali, wakitoa jumla ya muda wa saa 1,057,341,972 katika  huduma ya shambani wakati wa mwaka wa utumishi wa 1993. Hata katika maeneo ambayo yamekumbwa na vita, ndugu zetu wanajitahidi kutanguliza masilahi ya Ufalme. Hivyo kutaniko moja katikati ya Bosnia laripoti wastani wa kila mwezi wa saa 34 kwa kila mhubiri, bila kutia ndani mapainia. Kwa wastani, Mashahidi 623,006 duniani pote walishiriki katika aina fulani ya utumishi wa upainia kila mwezi. Japani iliweza kuripoti kwamba katika Aprili mapainia huko walijumlika kuwa 100,441, au asilimia 56 ya jumla ya wahubiri. Mafunzo ya Biblia nyumbani yaliyoongozwa yaliongezeka kwa 237,460 ulimwenguni pote, kufikia kilele kipya cha 4,515,587. Hudhurio la ukumbusho lilipanda hadi 11,865,765, na inachangamsha moyo kuona kwamba,  hao 296,004 walifanya maendeleo wakati wa mwaka huo kufikia hatua ya kujiweka wakfu na kubatizwa.

Ili kuandaa usimamizi na fasihi zinazohitajiwa kwa kazi hii ya elimu ya tufeni pote, wajitoleaji 13,828 hushughulikia migawo wakiwa washiriki wa familia ya Betheli ulimwenguni pote. Kati yao, 4,922 hutumikia kwenye makao makuu ya ulimwengu, katika Brooklyn, New York, na majengo yaliyo karibu. Wote ni washiriki wa shirika la kidini lililojitoa kipekee kwenye huduma.

Mikusanyiko ya “Ufundishaji wa Kimungu”

Jinsi Mikusanyiko ya Wilaya ya “Ufundishaji wa Kimungu” ilivyothibitika kuwa yenye kuburudisha kiroho na yenye kutumika! Mamia yayo imekwisha kufanywa; mingine bado inaendelea. Kuhusu maagizo yaliyotolewa, mzee mmoja katika Uholanzi alisema hivi: “Sisi husali mara nyingi sana kwa Yehova tupate msaada na mwongozo katika kazi yetu. Mkusanyiko huu umekuwa jibu kwa sala zetu. Ni kana kwamba Yehova alikuwa akisema: ‘Sikilizeni na kutumia mashauri.’”

Kwa sababu ya ukarimu wa watu wa Yehova, wamishonari na watumishi wa kimataifa 1,667 waliweza kuhudhuria mikusanyiko katika nchi ambazo walikuwa wameishi na kutumikia zamani. Nao watoa shukrani za kutoka moyoni kwa wote waliosaidia kufanya jambo hilo liwezekane. Ilichangamsha moyo kwelikweli kuwa pamoja nao na kusikia kutoka kwao kwenye mikusanyiko mbalimbali. Mambo waliyoona yalitufanya tufikirie ile pindi ambapo Paulo na Barnaba waliripoti kwa kutaniko katika Antiokia “mambo yote aliyoyafanya Mungu pamoja nao, na ya kwamba amewafungulia Mataifa mlango wa imani.”—Mdo. 14:27.

Katika Munich, Ujerumani, mkusanyiko mmoja ulitoa programu nzima katika Kikroatia na Kiserbia. Miongoni mwa wale waliokuwapo mlikuwa ndugu kutoka Kroatia, Serbia, Slovenia, Bosnia na Herzegovina, Montenegro, na Makedonia, kutia na wajumbe kutoka Albania, Hangari, Romania, Urusi, na Ukrainia. Idadi kubwa ya Waromani (Wajipsi) walikuwapo. Wote hao walikuwa wamekuja kunufaika kutokana na ufundishaji wa kimungu. Ile amani, upendo, na muungamano miongoni mwa watu wa  Yehova ulipendeza kama nini! Ulitofautiana na mizozo katika maeneo ambayo wengi wa wajumbe hao walikuwa wametoka—baadhi yao wakilazimika kutoroka wakiwa wakimbizi.

Jambo lililopendeza sana Mashahidi wa Yehova kila mahali ni ile mikusanyiko ya kimataifa katika Moscow, Urusi, na katika Kiev, Ukrainia. Ingawa ilibidi kupunguza ukubwa wa mkusanyiko katika Moscow, wajumbe kutoka nchi 30 waliliona kuwa pendeleo la pekee kuwa miongoni mwa wale 23,743 waliokusanyika huko. Kati ya vipindi walitumia fursa kukutana na wale wa vikundi mbalimbali vya lugha. Kwa kufanya hivyo, wao walipata mambo yaliyoonwa yenye kuleta shangwe, kuchangamsha moyo, na kuimarisha imani kama nini! Wakusanyikaji walitumia pia wakati kushiriki katika huduma ya shambani. Baadhi yao waliamka mapema ili kuhubiri; wengine walitoa ushahidi wa vivi-hivi na wakati uleule, wakatazama mandhari za kuvutia. Walivutiwa walipoona Warusi wakikubali kwa hamu trakti katika lugha yao wenyewe na pia mara nyingi wakiacha kufanya yale waliyokuwa wakifanya na kuisoma kuanzia mwanzo hadi mwisho.

Kujapokuwa upinzani fulani, mkusanyiko katika Moscow ulikuwa na mafanikio makubwa. Msemaji wa mwisho kwenye programu alipotoa shukrani kwa Yehova kwa yote aliyokuwa amefanya ili mkusanyiko huo ufaulu, wasikilizaji walisimama na kupiga makofi mazito yenye kuendelea.

Majuma mawili baadaye, mkusanyiko mkubwa zaidi ulifanywa katika Kiev. Kati ya wale 64,714 waliohudhuria kulikuwa na karibu 53,000 waliokuja kutoka Armenia, Georgia, Kazakhstan, Kyrgyzstan, Moldova, na Urusi, pamoja na kutoka Ukrainia.

Ndugu walipokuwa wakijenga vyoo ili vitumiwe kwenye stediamu, baadhi ya wakazi wenyeji waliuliza kama wangeweza kusaidia. Kwa nini? Wao walijibu: “Sisi pia twataka kufanya jambo fulani ili kumtumikia Yehova.” Watu wengi katika Kiev, walipowaona Mashahidi na roho waliyoonyesha, waliwasalimu kwa kuwapungia mkono. Akielekezea stediamu hiyo, ofisa mmoja wa polisi alisema hivi kwa kumaka: “Sijapata kuona jambo kama hili. Ni watu wa ajabu kama nini! Jinsi walivyo na nyuso za kirafiki. Tayari nimo katika ulimwengu mpya. Ni lazima mtu ashangae juu  ya yote haya . . . siwezi kuelewa kwa nini mlinyanyaswa.” Wakati wa mkusanyiko huo, wanaopendezwa zaidi ya 2,000 walitoa majina yao na mahali wanapoishi, wakiomba kwamba Mashahidi wa Yehova wawazuru haraka iwezekanavyo.

Kilele cha mkusanyiko kilifikiwa wakati watu 7,402 walipojitokeza kwa ajili ya ubatizo wa maji katika kufananisha wakfu wao kwa Yehova Mungu. Katika historia ya Kikristo, huo ulikuwa ubatizo mkubwa zaidi, ukipita ule uliokuwa New York katika 1958, ambapo, kukiwa na hudhurio lililo kubwa mara nne, idadi ndogo kidogo walibatizwa. Naam, Yehova ameinua maelfu zaidi wakiwa Mashahidi wake kushiriki katika kazi tukufu ambayo anahakikisha inafanywa katika sehemu hii ya dunia wakati wa siku hizi za mwisho za mfumo huu wa kale!

Maagizo Kwenye Mitaala ya Tawi

Wakati wa mwaka uliopita, jambo lenye kutokeza la programu ya maagizo ya kimungu lilitia ndani mitaala ya juma moja pamoja  na wafanyakazi wa ofisi za tawi. Mitaala minane ilifanywa kuanzia Januari hadi Aprili.

Wawakilishi wa matawi 17 katika Amerika ya Kati na ya Kusini walikusanyika kwenye tawi lililowekwa wakfu hivi karibuni katika Kolombia mnamo Januari. Mnamo Februari, mtaala uliofanywa katika Australia ulitia ndani matawi manane yanayopokea sehemu kubwa ya fasihi zayo kutoka Australia. Huo ulifuatwa na mikutano katika Ufilipino kwa ajili ya matawi 12 katika Asia ya kusini-mashariki na Pasifiki. Wakati wa Machi, matawi 24—kutia na matawi mengi makubwa yenye kuchapa—yaliwakilishwa kwenye mtaala katika United States. Wakati wa Aprili mtaala ulifanywa katika Puerto Riko ili kushughulikia mahitaji ya nchi zilizoko Karibea na zile zilizo karibu na huko. Juma ilo hilo mtaala katika Naijeria ulikuwa ukitoa uangalifu kwa Afrika magharibi na ya kati. Wakati uo huo, mtaala mwingine, katika Austria, ulihudhuriwa na wafanyakazi kutoka matawi 16 katika sehemu hiyo ya ulimwengu, na baadaye mwezi huo, kwenye mkutano katika majengo mapya ya tawi katika Zambia, matawi yaliyobaki ya Afrika yalitolewa uangalifu wa pekee.

Programu hiyo ilitia ndani habari iliyoandaliwa na Halmashauri za Wafanyakazi, Uandikaji, Kufundisha, Utumishi, na Utangazaji za Baraza Linaloongoza. Ilikusudiwa kuzidisha muungamano wa matawi na makutaniko yote yanapojikakamua yenyewe kisulubu ili kutimiza kazi ya kuhubiri habari njema.

Kutoa Misaada—Wonyesho wa Upendo Wetu

Zile dhoruba kali, ukame mbaya, mafuriko, na vita ambavyo vimejaza habari katika miezi ya hivi karibuni vyaathiri sana maisha ya mamilioni ya watu, kutia na Mashahidi wa Yehova. Hatuwezi kuwatakia mema tu ndugu zetu halafu tusishiriki nao mahitaji ya maisha, wala hatutaki kufanya hivyo. Upendo hutusukuma kushiriki nao chochote tulicho nacho. (Yak. 2:15-17; 1 Yoh. 3:17) Kwa kweli Mashahidi wa Yehova hufanya hivyo, na  kwa kadiri wawezavyo, wao hujitahidi kusaidia wengine pia.—Gal. 6:10.

Wakati wa 1991-92, mmojawapo ukame mbaya zaidi unaoweza kukumbukwa na yeyote ulikumba sehemu kubwa za Afrika, kutia na Msumbiji. Watu fulani walipoteza mavuno kwanza kwa ukame, halafu kwa mafuriko na wivi. Ofisi ya tawi katika Maputo ilifanyiza halmashauri za kutoa misaada ili kuratibu shughuli za kuandaa chakula na mavazi yaliyohitajiwa na ndugu na dada wenye uhitaji. Hiyo ilitia ndani kugawanywa kwa tani 25 za unga wa mahindi, tani 6 za maharagwe, tani 2.7 za mchele, lita 1,700 za mafuta ya kupikia, na tani 6.5 za nguo zilizokwisha kutumiwa. Nyakati nyingine, ugavi huo uligawanywa wakati wa makusanyiko, na misaada hiyo ilithaminiwa sana. Lakini wamishonari waliona kwamba, akina ndugu walipopanga kuyahudhuria, uandalizi wa kiroho ndio uliotazamiwa kwa hamu zaidi. Kwa kukosa pesa za kusafiri, kikundi cha ndugu 10 kutoka Ile, kilitembea kilometa 112 kwenda ili wasikose siku yao ya kusanyiko la pekee!

Sehemu kubwa ya Zambia iliathiriwa vivyo hivyo na ukame. Ili kusaidia ndugu ambao hawakunufaika na mpango wa serikali wa kutoa misaada, tawi la Sosaiti lilinunua na kugawanya tani 14 za nafaka mapema mwakani. Ndugu pia walishiriki baina yao vitu walivyokuwa navyo. Malori ya Sosaiti yalipopeleka fasihi, hayo pia yalichukua nafaka na kuipakua katika maeneo yenye uhitaji yalipokuwa njiani. Wakati wa vita vya wenyewe kwa wenyewe katika Rwanda, watu kutoka maeneo yaliyoathiriwa walitorokea kambi za wakimbizi, ambako hali zilikuwa ngumu sana. Hata hivyo, ndugu zetu wakimbizi—wapatao 381—walitunzwa kwa upendo na makutaniko. Wao waligawanywa miongoni mwa makutaniko kadhaa ili kugawanya jukumu la kuwatunza. Sosaiti ilitoa msaada wa fedha zilizohitajiwa, na ndugu wenye sifa za kustahili walifanya ziara za kawaida ili kutoa kitia-moyo cha kiroho. Ingawa wengi wa wahubiri hao waliohamishwa walikuwa wamepoteza karibu kila kitu, wao walitumikia wakiwa mapainia wasaidizi wakati wa miezi hiyo migumu. Wengine walianza utumishi wa painia wa kawaida.

 Karibu ndugu elfu moja katika Zaire waliachwa bila kitu kwa sababu ya vita vya kikabila. Baadhi yao walikuwa wakila mara moja tu kila baada ya siku tatu. Ofisi ya tawi katika Afrika Kusini ilipopokea habari hiyo, mioyo ya ndugu iliwasikitikia wale wa Zaire. Ofisi hiyo iliripoti mara hiyo juu ya hali hiyo kwa Baraza Linaloongoza halafu ikapeleka tani 24 za chakula, sabuni, na ugavi wa kitiba ili kuwakirimu. Vivyo hivyo, wakati kikundi cha watu 70, Mashahidi walio watu wazima na watoto wao kutoka Angola walipolazimika kutoroka hadi Namibia kwa sababu ya vita ya wenyewe kwa wenyewe, ndugu wenyeji waliwatunza bila kukawia. Wakati ndugu wenyeji walipogundua kwamba kambi ambayo Mashahidi wakimbizi walikuwa wamepelekwa haikuwa tayari kuwatunza, ndugu waliandaa mahema, chakula, mavazi, mablanketi, na vifaa vya ujenzi wa Jumba la Ufalme la muda.

Ndugu zetu katika Austria, Ujerumani, Italia, na Uswisi wamekuwa wakarimu sana kutoa mali zao kusaidia Mashahidi katika lile eneo lenye msukosuko wa vita lililoitwa Yugoslavia. Tani 153 za chakula na tani 23 za mavazi, vifaa vya kusafisha, na ugavi wa madawa, kutia na uandalizi wa kiroho, ulipelekwa kwao mwaka uliopita. Ndugu walijitolea kupeleka msaada kwa malori kujapokuwa hatari. Kuhusu safari moja ya kwenda Sarajevo, ndugu mmoja aliripoti kwamba, baada ya utaratibu wa forodha,  njiani bado kulikuwa na vituo vya ukaguzi 15 vya polisi na majeshi. Lakini akina ndugu walikuwa tayari, na kwenye kila kituo waliangushia askari-jeshi magazeti. Barabara zilikuwa zimeharibiwa, theluji yenye kuyeyuka ilikuwa imegeuza barabara isiyo ya lami kuwa yenye matope, na nyakati nyingine milipuko ilikuwa karibu sana hivi kwamba ndugu walifikiri walikuwa wamelipuliwa. Lakini ndugu zetu waliliona kuwa pendeleo kutumikia kwa njia hiyo. Kwa habari ya wale wanaopokea msaada, wao ni wenye shukrani nyingi sana na wahisi kikweli kuwa sehemu ya familia ya kimataifa kuliko wakati mwingine wowote.

Upande ule mwingine wa tufe, Kimbunga Iniki kilipiga Visiwa Hawaii vya kaskazini-magharibi katika Septemba 1992. Kilithibitika kuwa msiba wa asili ulio mbaya zaidi katika historia ya Hawaii. Hata kabla ya kimbunga hicho kupiga kisiwa Kauai, wazee wa kutaniko walikuwa wakipanga kusaidia ndugu zao. Hali ya kiroho ilitangulizwa. Wakati wa majuma yaliyofuata, urekebishaji na ujenzi wa nyumba 400 za akina ndugu ulifanywa. Katika kila pindi, kabla ya kazi kuanza kwenye nyumba hususa, wafanyakazi na familia iliyohusika walizungumzia andiko la siku na kusali pamoja. Kwa kipindi cha miezi sita, wazee wenye ujuzi wakiandamana na wake zao kutoka visiwa vinginevyo walienda pia kwenye eneo la msiba ili kuandaa uchungaji, kuongoza mikutano, kuongoza katika utumishi wa shambani, na kusaidia katika kujaza fomu za serikali na/au fomu za kudai bima zilizo ngumu kujaza.

Je! wajua mahali ambapo kisiwa Niutao kipo? Watu wengi hawajui. Ni watu karibu 800 tu wanaoishi kwenye kisiwa hicho cha matumbawe katika Pasifiki Kusini. Miongoni mwao alikuwamo mhubiri mmoja asiyebatizwa aliyepoteza nyumba yake na mali yake yote kwa sababu ya maji kujaa isivyo kawaida Januari uliopita. Mara tu akina ndugu katika kisiwa kingine kilicho katika visiwa Tuvalu walipojua kwamba kulikuwa na uharibifu, waliandaa chakula na msaada mwingineo. Ilichukua muda mrefu kukusanya vifaa vya ujenzi vilivyohitajiwa na kuvisafirisha kwa  meli hadi Niutao. Halafu wakajenga upya nyumba yake. Upendo huo ulioonyeshwa na Mashahidi umekuwa jambo la kuzungumzwa katika kisiwa hicho.

Baada ya kuona yale ambayo watu wa Yehova walikuwa wakifanya ili kusaidiana katika Liberia yenye msukosuko wa vita, jirani wa mmoja wa dada zetu alisema: “Yehova Mungu wenu kweli awapenda, kuwaandalia ninyi utumishi huo.” Naam, yeye kwa kweli atupenda.

Kujenga Ili Kutosheleza Mahitaji ya Ukuzi wa Haraka

Watu 296,004 wanapobatizwa katika mwaka mmoja na makutaniko mapya 3,512 kufanyizwa katika mwaka mmoja (2,528,524 walibatizwa na makutaniko mapya 26,835 kufanyizwa katika miaka kumi iliyopita), mengi yahitaji kufanywa ili kuwatunza hao wote. Miongoni mwa mambo mengine, hilo latia ndani kazi ya ujenzi. Na mwaka uliopita kulikuwa na kazi nyingi kama nini!

Katika United States, Halmashauri za Ujenzi za Kimkoa 73 zilisaidia katika ujenzi wa Jumba la Ufalme. Wakati wa mwaka wa utumishi wa 1993, kwa ushirikiano wa makumi ya maelfu ya waliotaka kujitolea, walisaidia kujenga Majumba ya Ufalme mapya yapatayo 200 na kurekebisha mengine 200.

Katika Japani, ambako njia za ujenzi wa haraka hutumiwa pia, Majumba ya Ufalme 108 yalikamilishwa, lakini ilibidi yajengwe kwa njia ya kuweza kustahimili matetemeko ya dunia na dhoruba. Nyakati nyingine wale waliojitolea kusaidia katika kazi hiyo hawakuandaa stadi na nishati tu, bali pia nyenzo nyinginezo.

Ndugu katika Arjentina wameufanya uwe mradi wao kuhakikisha kwamba kila moja ya makutaniko 1,500 huko lina mahali pazuri pa kukutania kwa ajili ya ibada. Mwaka jana, majumba  mapya 57 yalikamilishwa. Lakini mengi zaidi yahitajiwa. Huko, mara nyingi Majumba ya Ufalme mapya hujengwa kwa muda wa majuma matatu au manne hivi.

Majumba ya Ufalme mapya zaidi ya 800 yamejengwa katika Ufilipino wakati wa miaka sita iliyopita. Lakini kuna makutaniko 3,332, na mengi yayo bado yana uhitaji wa mahali pazuri zaidi pa kukutania.

Katika Brazili, ambako wakati wa miaka mitano iliyopita kumekuwa na ongezeko la Mashahidi 120,687, imekuwa haiwezekani kutosheleza uhitaji wa Majumba ya Ufalme mapya. Lakini majumba mapya 93 yalikamilishwa mwaka uliopita, na ujenzi ukaanza kwenye majumba 1,383 zaidi.

Majumba ya Ufalme zaidi yahitajiwa pia, ili kushughulikia ukuzi wa haraka katika Kolombia. Ofisi ya tawi inakusudia kusitawisha mpango ambao ungefanya utaratibu wa ujenzi uwe rahisi zaidi na uandae msaada wa wafanyakazi wa pekee wa ujenzi waliozoezwa kwenye tawi.

Katika maeneo ya mashambani nchini Afrika Kusini, makutaniko fulani hutengeneza mawe yao wenyewe ya saruji na, kwa  msaada wa wajitoleaji walioandaliwa kupitia Halmashauri ya Ujenzi ya Kimkoa, waweza kukamilisha jumba zuri lisilo ghali katika miisho-juma mitatu hadi sita. Kazi ya vikundi vya ujenzi vya jamii mbalimbali katika maeneo yenye kujaa matata kama vile Soweto huhitaji tahadhari kubwa, lakini pia yaonyesha kwa njia ya waziwazi upendo na muungamano miongoni mwa watu wa Yehova.

Katika Norwei, kuna Majumba ya Ufalme 21 yaliyo juu ya Kizingo cha Aktiki. Sasa mojawapo hayo liko Hammerfest, jiji la Ulaya la kaskazini zaidi.

Wakionyesha roho ya Isaya 2:3, 4, ndugu katika Hangari walijenga mawili kati ya Majumba ya Ufalme yao mapya katika nyanja ambazo hapo awali zilitumiwa kuwa vituo vikubwa vya kijeshi vya Urusi.

Roho ya kujidhabihu ionyeshwayo na ndugu waliokuwa wamesafiri kutoka ng’ambo ili kusaidia kujenga ofisi ya tawi na Jumba la Kusanyiko katika Visiwa Solomoni iliathiri sana Mashahidi huko. Hiyo ilikuwa wazi wakati serikali ilipotoa shamba zuri katika Munda ambalo ndugu wangeweza kutumia ili kujenga Jumba la Ufalme. Lakini kutaniko lilikuwa dogo. Kwa hiyo ni nani wangefanya kazi hiyo? Ndugu katika Honiara walisema: “Ikiwa ndugu zetu kutoka ng’ambo wangeweza kutumia fedha na wakati wao ili kutusaidia kujenga Jumba la Kusanyiko na ofisi ya tawi, kwa nini tusitumie likizo yetu kwenda Munda kujenga Jumba la Ufalme?” Hivyo ndivyo walivyofanya hasa. Ndugu na dada kutoka visiwa na makabila 13 walihusishwa, na jumba hilo likajengwa kwa siku 10 tu.

Hali ya kujitoa ilionyeshwa na kutaniko katika Slovakia ambako nusu ya wahubiri ni mapainia. Familia zilichuma beri ili kupata fedha kwa ajili ya ujenzi. Ili kupunguza gharama, wao walipata pia mchanga na mawe kutoka chini ya mto mdogo ulio karibu.

Watu sita walio vichwa vya familia katika Korea walichukua mkopo wa benki na kisha kutoa fedha hizo kwa kutaniko lao kwa  ajili ya Jumba la Ufalme lalo jipya. Ukiwa mchango wao kwa mradi huo, ndugu walichukua daraka la kulipa mikopo hiyo wao binafsi.

Katika Naijeria, ndugu wanne kutoka kutaniko dogo walimwendea Onojie, mtawala wa kitamaduni wa sehemu hiyo, ili kuomba wanunue ardhi kwa ajili ya Jumba la Ufalme jipya. Lakini walishindwa kulipa fedha alizodai. Miezi kadhaa baadaye, mmoja wa wazee alimwazima Onojie ile vidio Jehovah’s Witnesses—The Organization Behind the Name. Yeye alivutiwa sana. Baada ya  kuitazama mara tano, aliwapa akina ndugu ardhi waliyohitaji kwa ajili ya Jumba la Ufalme lao jipya.

Katika mahali pengi imethibitika kuwa yafaa kuwa na Majumba ya Kusanyiko yetu wenyewe. Majumba hayo yalijengwa katika Kolombia na katika United States mwaka uliopita. Mengine mawili yaliwekwa wakfu katika Brazili, mawili katika Kosta Rika, na moja katika Jameika. Katika Peru, Jumba la Kusanyiko lenye ukubwa wa kutoshea mikusanyiko ya wilaya ya watu 10,000 liliwekwa wakfu katika Februari 1993. Sehemu za nyuma zilizo wazi, pamoja na sehemu za kando-kando zilizo wazi kwa karibu meta 3 kutoka chini, hufanya kuwe na mzunguko wa hewa safi. Sakafu ya saruji iliyoinuka hatua kwa hatua hufanya iwezekane kwa umati wote kuweza kuona jukwaa waziwazi. Ndugu katika Ufaransa walijenga Jumba la Kusanyiko la tano na lililo kubwa zaidi mwaka huu. Wafanyakazi wengi na familia zao walitumia kwa furaha wakati wao wa likizo kukamilisha mradi huo—katika miezi minne tu! Katika Italia, jumba jipya lilikamilishwa katika mkoa wa Catanzaro, na ndugu katika Uhispania waliweka wakfu Jumba la Kusanyiko lao la nne.

Bila shaka, ukuzi katika idadi za Mashahidi pia hutaka kupanuliwa kwa majengo ya tawi ili kuandaa fasihi na usimamizi unaohitajiwa. Majengo ya tawi mapya makubwa yalikuwa yakijengwa mwaka uliopita katika Polandi, Puerto Riko, na Zambia, pia katika Ekwedori, Jamhuri ya Dominika, Meksiko, Taiwan na Ufaransa. Katika United States, upanuzi mkubwa wa majengo umekuwa ukiendelea katika Brooklyn, na maendeleo mazuri yamefanywa kwenye Kitovu cha Elimu cha Watchtower katika Patterson. Upanuzi mkubwa umekuwa pia ukiendelea katika Uingereza na Kanada, kutia na katika Afrika Kusini, Australia, Brazili, Korea, New Zealand, Uhispania, na Ujerumani. Majengo mapya ya tawi yaliyo madogo kidogo yamekuwa yakijengwa katika Hangari, Jameika, Msumbiji, Paraguai, Samoa Magharibi, Sri Lanka, Suriname, na Tahiti. Maelfu ya ndugu na dada wamejitolea ili kushiriki katika kazi hii. Huu umekuwa mwaka usio na kifani kama nini!

 Kuwekwa Wakfu kwa Matawi

Baada ya kuwekwa wakfu kwa hekalu la Yehova katika Yerusalemu katika siku za Sulemani, watu walirudi nyumbani kwao ‘wakifurahi na kuchangamka moyoni kwa wema wote Yehova aliowafanyia’ watu wake. (1 Fal. 8:66) Vivyo hivyo katika nyakati za kisasa, kuna furaha kuu kuhusiana na kuwekwa wakfu kwa ofisi za tawi za Watch Tower Society, zinazotumiwa pia katika kuendeleza ibada ya kweli. Majengo ya tawi yaliwekwa wakfu wapi wakati wa mwaka wa utumishi uliopita?

Kolombia

Karibu meta 2,700 juu katika Milima ya Andes ya Amerika Kusini, katika Facatativá, Kolombia, La Torre del Vigía (Sosaiti ya Watch Tower) ina ofisi mpya na kiwanda cha kuchapia, kutia na makao ya wajitoleaji. Hayo yaliwekwa wakfu mnamo  Novemba 1, 1992. Mahali yalipo ni penye kupendeza, pakiwa kilometa 42 kaskazini-magharibi mwa Bogotá, kwenye mwisho wa uwanda wa juu ambapo jiji kuu la Kolombia lipo. Hapa, chapa za rangi kamili za Mnara wa Mlinzi na Amkeni! zinachapwa katika Kihispania ili zitumiwe katika Kolombia, Venezuela, Panama, Ekwedori, na Peru.

 Ujenzi wa majengo hayo mapya ya tawi ulipoanza, kulikuwako Mashahidi wa Yehova 34,261 katika Kolombia. Wakati wa kipindi cha miaka mitano ya ujenzi, idadi ya Mashahidi nchini iliongezeka kwa asilimia 63, hadi kuwa 55,693. Mafunzo ya Biblia nyumbani sasa yanaongozwa pamoja na watu mmoja-mmoja na vikundi vya familia 100,927. Katika 1993, kwenye Ukumbusho wa kifo cha Kristo, watu 249,271 walihudhuria. Kwa kweli huu ni wakati wenye shangwe wa uvunaji wa kiroho katika Kolombia.

Mashahidi 400 kutoka Kolombia, pamoja na watumishi 100 wa kimataifa, walifanyiza kikundi cha msingi cha timu hiyo ya ujenzi iliyogeuza ile iliyokuwa mwanzoni shamba la kufugia ndege kuwa kitovu cha elimu ya kitheokrasi. Wajitoleaji wengine 3,000 kutoka makutaniko ya karibu walisaidia siku za sikukuu na miisho-juma, na wengine wapatao 1,500 wakaja kutoka ng’ambo—baadhi yao kwa majuma machache, wengine  kwa miezi kadhaa—kwa gharama yao wenyewe. Wafanya biashara wenyeji hawangeweza kuamini kwamba walijilipia gharama wenyewe, na mmoja wao aliwauliza binafsi Mashahidi Wakolombia na wageni ili kuhakikisha kwamba ilikuwa kweli. Mfanya biashara mwingine, akivutiwa sana na yale aliyoona na kusikia, alikubali funzo la Biblia. Sasa yeye na mke wake ni Mashahidi waliobatizwa.

Kulikuwa na wageni 1,500, kutoka nchi 14, kwa ajili ya programu ya kuwekwa wakfu. Miongoni mwao mlikuwa Milton Henschel na Daniel Sydlik wa Baraza Linaloongoza. Kulikuwa pindi za kuonana tena zenye shangwe kama nini! Na kulikuwa na furaha kama nini kwa sababu ya usitawi wa kiroho ambao Yehova ameletea watumishi wake katika Kolombia!

Polandi

Mwezi uo huo, mnamo Novemba 28, tawi jingine liliwekwa wakfu, hili likiwa katika Nadarzyn, karibu na Warsaw, Polandi. Theodore Jaracz, wa Baraza Linaloongoza, aliyekuwapo kwa ajili ya pindi hiyo alijulisha hivi: “Kuwekwa wakfu huku ni kwa kihistoria kwelikweli. . . . Hili ni tawi jipya la kwanza kujengwa ambalo sasa linawekwa wakfu katika eneo ambalo hapo mwanzoni liliitwa ‘nyuma ya Pazia ya Chuma.’ Lakini hiyo iliyoitwa eti Pazia ya Chuma haingeweza kuzuia tengenezo la Yehova lisisonge mbele! Na uthibitisho wa hilo upo apa hapa!”

Baadhi ya wageni walikuwa wamengojea pindi hiyo binafsi kwa miongo mingi. Miongoni mwao mlikuwa Mashahidi waliokuwa wamemtumikia Yehova kwa uaminifu kwa miaka 45, 50, au zaidi, wajapopata majaribu makali. Idadi fulani yao walikuwa wamefanya kazi ya Betheli kichini-chini kwa miaka zaidi ya 40. Mioyo yao ilisukumwa kwa kina kirefu wakati Zygfryd Adach, mratibu wa Halmashauri ya Tawi, aliposema: “Wapendwa, mlikuwa mkijitahidi sana ili kushiriki katika kazi ya tengenezo la Mungu katika kugawanya chakula cha kiroho katika nyakati ngumu, hata zile ngumu zaidi. Baada ya miaka mingi gerezani, mara nyingi mlijitoa kwa hiari kuendeleza kazi.  Nyakati nyingine mlifungwa mara nne au tano na mara nyingi hata zaidi. Sisi sote twakumbuka wakati huo, kwa hiyo kwa usadikisho kamili twanukuu maneno ya Zaburi 124: ‘Kama si BWANA [“Yehova,” NW] aliyekuwa pamoja nasi, wanadamu walipotushambulia. Papo hapo wangalitumeza hai . . . Na ahimidiwe BWANA [“Yehova,” NW]; asiyetutoa kuwa mawindo kwa meno yao. Nafsi yetu imeokoka kama ndege katika mtego wa wawindaji, mtego umevunjika, nasi tumeokoka.’”—Zab. 124:2-7.

Tangazo lilipotolewa kwamba tawi lilikuwa lijengwe, itikio lilikuwa la hiari. Makutaniko yalileta makaa-mawe na mbao, friji, ugavi wa chakula, na vyombo. Ndugu na dada wenye sifa za kustahili katika ufundi na stadi mbalimbali walitoa utumishi wao kwa hamu. Kulikuwa na wale wenye umri mkubwa zaidi waliokuwa wametumia miaka mingi gerezani. Vijana wengi pia walijitoa wenyewe kwa hiari. Watumishi wa kimataifa walikuja kutoka nchi kumi. Tena na tena, mioyo ya wafanyakazi ilisisimuliwa walipoona uthibitisho wa mwelekezo na baraka za Yehova. Amri ya “kusimamisha kazi” kutoka kwa Baraza la Kijiji ilibatilishwa. Vifaa vilivyoonekana kama haviwezi kupatikana, vilipatikana. Katika miaka miwili na miezi sita tu baada ya kupokea idhini ya kujenga, mahali pa moteli iliyoharibika palibadilishwa kuwa majumba makubwa yenye kuvutia kwa ajili ya tawi la Polandi.

New Zealand

Wakati wa miaka sita tangu tawi jipya katika New Zealand kuwekwa wakfu, idadi ya wapiga mbiu ya Ufalme huko ilikuwa imeongezeka kwa zaidi ya asilimia 30. Ili kutunza mahitaji yao, ilibidi majengo hayo yapanuliwe. Lakini mengi zaidi yalihitajiwa. Kama ilivyoelezwa kwenye programu ya kuwekwa wakfu, zaidi ya nusu ya ofisi mpya zingetumiwa kwa kazi ya tafsiri, kwa sababu fasihi hutafsiriwa hapa katika Kisamoa, Kimaori, Kirarotonga, na Kiniue, ili kunufaisha watu kwenye visiwa mbalimbali vya Pasifiki Kusini. Hivyo, mnamo Februari 27, 1993,  upanuzi wa ofisi na majengo ya huduma mbalimbali, kutia na makao ya ziada, yaliwekwa wakfu.

Aliyekuwapo kwa ajili ya pindi hiyo ni Lloyd Barry, mshiriki wa Baraza Linaloongoza aliyekulia New Zealand na kuanza utumishi wake kwa Yehova huko. Washiriki wote wa familia ya Betheli na ya ujenzi, kutia na waangalizi wasafirio na wake zao, walikuwapo. Kulikuwa pia na wageni kutoka nchi jirani za Pasifiki Kusini. Hata hivyo, walio wengi walikuwa wakazi wa New Zealand waliokuwa wamebatizwa kabla ya 1955. Kama vile mmoja wa wasemaji alivyotaja, ni hao wenye umri mkubwa zaidi waliofanya kazi iliyoweka msingi wa yale yaliyokuwa yakiendelea kwenye programu hiyo ya kuwekwa wakfu. Lakini wao ni wenye shukrani kama nini kwa ule utegemezo bora na kazi ya bidii ya wale walio wapya zaidi ambao wamejiunga nao katika kumsifu Yehova!

Puerto Riko

Kwa muda mrefu majengo ya tawi yaliyojengwa miaka 24 iliyopita katika Puerto Riko yalikuwa yamesongamana sana. Idadi ya wahubiri kwenye kisiwa hicho ilikuwa imepanda kutoka 5,400 katika 1969 hadi kuwa zaidi ya 25,000 kufikia wakati tawi hilo jipya lilipowekwa wakfu mnamo Aprili 17, 1993. Miaka minne ya kazi ngumu ya maelfu ya ndugu na dada ilitokeza majengo makubwa mazuri katika mazingira ya kiparadiso.

Wale waliokuwapo kwa ajili ya programu hiyo waliliona kuwa pendeleo la pekee kuwa pamoja na Karl Klein na Albert Schroeder wa Baraza Linaloongoza, kutia na wawakilishi wengine kutoka Brooklyn kuwa wasemaji kwenye pindi hiyo. Wakati wa juma ambalo lingeishilia kwenye kuwekwa wakfu, majengo hayo mapya yalikuwa tayari yametumiwa kwa ajili ya mkutano uliohudhuriwa na wawakilishi wa matawi 14. Halafu, baada ya kuwekwa wakfu huko, Idara ya Tafsiri ya Uhispania, pamoja na wafanyakazi wayo wa kimataifa, ilihamishwa kutoka Brooklyn hadi kwenye majengo hayo mapya.

 Zambia

Juma moja baada ya kuwekwa wakfu katika Puerto Riko, tawi kubwa jipya la majengo 13 liliwekwa wakfu kwenye viunga vya Lusaka, Zambia. Kwa nini huko?

Mbegu za kweli ya Biblia zilikuwa zimepandwa katika nchi hii mapema kama 1911. Kufikia 1924, vikundi vidogo vya funzo vilikuwa vimefanyizwa. Sasa kuna wahubiri 80,488 wanaoshirikiana na makutaniko 1,993 katika Zambia, na hudhurio la Ukumbusho katika 1993 lilikuwa 362,204. Hili ni shamba lenye matunda mengi yaletayo upanuzi wa Ufalme.

Kujengwa kwa tawi jipya la Zambia kuliwezekana kwa sababu ya ushirikiano wa kimataifa ambao ni wa kawaida katika tengenezo la Yehova. Utayarishaji wa plani na uhandisi ulifanywa na ofisi za Sosaiti katika United States, Ulaya, na Japani. Kreni zilitolewa na ndugu katika Amerika. Vifaa vya redio vilivyowezesha kuwe na mfumo wa simu vilipelekwa huko vikiwa zawadi kutoka New Zealand. Vifaa pekee vya ujenzi vilivyopatikana kwa urahisi mahali hapo ni mchanga, simiti, mawe, na mbao. Lakini, kwa wastani, malori mawili makubwa yaliyojaa vifaa vile vinginevyo vilikuja kila juma kutoka Afrika Kusini—safari ya kwenda na kurudi ya kilometa 3,500. Nao Mashahidi Wazambia walijitolea wenyewe na nyenzo zao kwa moyo wote ili kukamilisha kazi. Wakati wa programu ya kuwekwa wakfu, Milton Henschel na pia Theodore Jaracz, wa Baraza Linaloongoza, walikuwapo ili kushiriki na ndugu Wazambia katika tukio hilo lenye kufurahisha.

Hangari

Ilikuwa siku yenye furaha hasa kwa ndugu zetu katika Hangari mnamo Julai 31 wakati Lyman Swingle, wa Baraza Linaloongoza, alipoweka wakfu jengo lao lililotoka tu kujengwa la makao ya ziada na ofisi ya tafsiri. Hayo yalikuwa yamejengwa kwa miezi mitano tu, kwa msaada wa makutaniko ya mahali hapo na pia Mashahidi kutoka nchi nyingine nane, na kukamilika kwayo kulikuwa kumetangazwa na Shirika la Habari la Hangari.

 Baada ya miongo ya mnyanyaso mkali, Mashahidi wa Yehova katika Hangari walitambulishwa kisheria katika 1989. Mwaka huo, kilele cha wahubiri 9,990 waliripoti kuwa walishiriki katika huduma ya shambani. Tangu wakati huo, Mashahidi wa Yehova wametoa muda wa saa 8,300,000 katika huduma ya shambani katika Hangari, na idadi ya wapiga mbiu ya Ufalme imepanda hadi 14,347.

Uingereza

Ofisi ya tawi ya kwanza ya Watch Tower Society ilianzishwa jijini London katika 1900. Imebidi majengo yayo yapanuliwe mara nyingi. Mnamo Agosti 7, 1993, majengo ya kiwanda na ya usimamizi, yakiwa nyongeza ya karibuni zaidi ya eneo la mraba la meta 18,600, yaliwekwa wakfu.

Majengo ya kiwanda yaliyo nyuma ya mahali hapo yalijengwa katika miezi 17 tu, kwa kutumia njia ya kuinua mabamba ya kuta za seruji. Wajitoleaji wapatao 5,000 walishiriki katika kazi. Jengo la usimamizi ni la matofali. Matofali yapatayo 133,000 yalitumiwa. Ni waashi wangapi waliohitajiwa kufanya kazi hiyo? Dada saba tu, wakiwa na ndugu wawili wa kusimamia. Mwanakandarasi mmoja aliyezuru mahali hapo alitikisa kichwa chake kwa mshangao alipoambiwa ni nani aliyefanya kazi hiyo.

Albert Schroeder, wa Baraza Linaloongoza, alikuwapo kushiriki katika programu ya kuweka wakfu. Alifurahisha wasikilizaji kwa kusimulia mambo madogo-madogo ya ukuzi wa kazi ya Ufalme katika Uingereza tangu 1937, alipotumwa kwenye Visiwa vya Uingereza ili kusimamia kazi na kutia moyo angalau watu 1,000 wajiandikishe kuwa mapainia. Ni furaha kama nini kuona kwamba sasa kuna wapiga mbiu ya Ufalme 127,395 katika Uingereza na kwamba, kwa wastani, 12,803 kati yao wamo katika utumishi wa painia kila mwezi.

Huduma za Tafsiri

Baraza Linaloongoza lapendezwa sana kufanya lolote linalohitajiwa ili umati mkubwa uweze kutolewa kikweli kutoka “kila  taifa, na kabila, na jamaa, na lugha,” kama vile Biblia isemavyo. (Ufu. 7:9) Kutimizwa kwa hayo kumekuwa jambo la sala kwenye makao makuu ya ulimwengu na miongoni mwa watumishi wa Yehova ulimwenguni pote. Kufikia watu wa vikundi hivyo vyote ni kazi kubwa, inayoweza kutimizwa tu kwa roho ya Yehova.

Kutafsiriwa kwa Biblia na fasihi ya Biblia huwa na sehemu ya maana. Je! watu waweza kufikiwa bila fasihi katika lugha yao wenyewe? Ndiyo; lakini matokeo bora ya kazi ya kuhubiri na kufanya wanafunzi huongezwa zaidi wakati fasihi inapopatikana katika lugha ya wenyeji.

Kwa wakati huu tuna angalau vichapo fulani katika lugha 236. Mnara wa Mlinzi huchapwa kwa kawaida katika lugha 116. Wakati wa mwaka uliopita, timu nyingi za kutafsiri katika lugha ambazo magazeti huchapwa ziliimarishwa zaidi, na timu ambazo zinatafsiri katika lugha nyinginezo 70 zilikuwa zikizoezwa. Zinazotiwa ndani ya hizi ni lugha zitumiwazo katika Ulaya ya Mashariki, kusini mwa Asia, na Afrika, kutia na miongoni mwa makabila ya Wahindi katika Amerika Kusini, na watu katika visiwa vya Pasifiki. Kusitawisha timu hizo hutia ndani kuwatafuta, kuwazoeza, na kuwapa vifaa watafsiri, wachunguza-nakala, na wasahihishaji. Ni lazima wote hao wawe Wakristo waliojiweka wakfu, wajitoleaji ambao pia wako tayari kutumiwa kufanya kazi hiyo.

Bila shaka, kuna lugha zaidi zinazohitaji uangalifu, nyingi zazo zikitumiwa na watu zaidi ya milioni moja. Ndugu wenye kuchukua madaraka wanafanya kazi daima ili kuwatafuta na kuwazoeza watafsiri na kuandaa vifaa vinavyohitajiwa—ikihitajiwa, kubuni maumbo mapya ya herufi na vifaa vya kuendesha kompyuta ili kushughulikia lugha za ziada. Tujikumbushapo yale ambayo Yehova amefanya tayari, tuna uhakika kwamba yeye ataandaa chochote kinachohitajiwa ili kukamilisha kazi hiyo katika wakati unaobaki. Ni pendeleo kuwa wafanyakazi wenzi pamoja naye.—1 Kor. 3:29.

 Shule ya Mazoezi ya Kihuduma Yafanywa Katika Kontinenti Sita

Shule ya Gileadi imekuwa sasa ikitenda kwa miaka 50, na wahitimu wayo wameshiriki katika kuendeleza mbele masilahi ya Ufalme katika nchi zaidi ya 200. Ni ‘rundo la ushahidi’ lenye utukufu kama nini ambalo limetokana na kazi ya watumishi hao wa Yehova wenye kujidhabihu!

Msaada zaidi wa kutoshelezea uhitaji wa haraka umeandaliwa kama tokeo la Shule ya Mazoezi ya Kihuduma, inayotoa mazoezi ya kipekee katika mtaala wa miezi miwili wenye kutia ndani mambo mengi. Wakati wa mwaka wa utumishi uliopita, madarasa 29 ya shule hii yametoa mazoezi yenye thamani kwa wazee na watumishi wa huduma zaidi ya 684. Madarasa yalifanywa katika Japani, Naijeria, United States, na katika maeneo ya matawi ya Amerika ya Latini ambako wanafunzi wenye kusema Kihispania kutoka nchi 16 mbalimbali waliandikishwa. Shule katika Australia ilinufaisha ndugu waliokuja kutoka Fiji, Papua New Guinea, New Zealand, Visiwa Solomoni, na Samoa Magharibi. Ndugu kutoka nchi 12 mbalimbali walizoezwa katika mahali patano katika Ulaya.

Makutaniko mengi hayana ndugu wa kuongoza. Hiyo ni kweli hasa katika Amerika ya Latini, ambako, katika kutaniko kubwa, kwaweza kuwa na mzee mmoja tu au wawili na karibu idadi iyo hiyo ya watumishi wa huduma. Mahali ambapo wahitimu wa Shule ya Mazoezi ya Kihuduma wamegawiwa kutumikia katika maeneo kama hayo ya uhitaji wa pekee katika nchi yao ya uzaliwa, utendaji wa shambani umeongezeka, utumishi wa painia umetiwa moyo kwa matokeo, hasa miongoni mwa vijana, na uangalifu zaidi wa binafsi umetolewa kwa wengi walio wapya ambao sasa wanashirikiana nasi.

Idadi kubwa ya wale wanaohudhuria shule hiyo waweza  kusema lugha nyinginezo. Kwa hiyo, hasa katika Ulaya na United States, ndugu hao wametumwa katika vikundi vya lugha na makutaniko ya Kiarabu, Kichina, Kifaransa, Kihispania, Kiitalia, Kijapani, Kikorea, Kikroatia, Kirusi, Kituruki, na Kivietnamu. Huo umekuwa msaada mkubwa.

Idadi fulani ya wahitimu ambao hali yao iliwaruhusu wakubali migawo ya kigeni wametumwa Ulaya ya Mashariki, sehemu fulani za Afrika, na Mashariki ya Mbali ili kutumikia katika matawi na kama wamishonari, mapainia wa pekee na waangalizi wasafirio. Kwa njia hiyo pia, shule hiyo imechangia kusogezwa mbele kwa kazi ya Ufalme.

Juu ya wazee na watumishi wa huduma hao waseja waliojitolea wenyewe kwa hiari, inaweza kusemwa kikweli kwamba jitihada zao zinazaa matunda. Wao wako miongoni mwa ‘ushirika wa vijana kama tu umande’ wanaosimuliwa kwenye Zaburi 110:3.

Kufikia Watu wa Mataifa Yote

Katika nchi fulani, kuna maeneo makubwa ambako mahubiri ya kawaida hayafanywi. Sehemu fulani ya maeneo hayo imo katika nchi zisizokubali wamishonari. Lakini, katika miaka ya hivi karibuni, mamilioni ya watu kutoka nchi hizo wamehamia kwenye nchi ambako kazi kubwa ya kuhubiri inafanywa kwa kawaida na Mashahidi wa Yehova. Wahubiri wamepata kwamba mashamba ya kigeni ya wamishonari yanawajia wao. Na watu wanapokuwa mbali na misongo mikubwa ya jumuiya ya nchi ya uzaliwa wao, baadhi yao hupendezwa kujifunza Biblia. Katika mahali kadhaa, shamba la wahamiaji limekuwa lenye matokeo zaidi.

Hivyo tawi la Saiprasi laripoti: ‘Eneo jipya linapatikana hapa katika Saiprasi. Tunakutana na watu wenye kupendezwa wanaotoka Lebanoni, Siria, Uajemi (Iran), Bulgaria, Romania, Urusi,  ile iliyokuwa Yugoslavia, Ufilipino, na kwingineko. Watu hao ambao wamekuja kufanya kazi na kuanza maisha mapya huwa mara nyingi wanaelekea kusikiliza kuliko wale wengine.’

Alipokuwa akienda chuo kikuu katika mashariki mwa Ujerumani, msichana mmoja kutoka Mongolia alikutana na kuoana na kijana kutoka Guyana. Baadaye, katika Guyana, walianza kusoma baadhi ya vichapo vya Watch Tower, wakaomba funzo la Biblia nyumbani, na kubatizwa katika 1993. Watoto wao pia ni wahubiri wa habari njema. Kwa habari ya mama yake, yeye ana hamu ya kushiriki ujumbe wa Ufalme na familia yake na wengine katika Mongolia.

Katika Uingereza, akina ndugu wanajifunza kupanua utendaji wao ili kusaidia kutosheleza uhitaji wa kiroho wa watu kutoka nchi nyingine. Mikutano sasa hufanywa kwa kawaida jijini London katika lugha 8. Katika Kanada, kuna makutaniko yanayotosheleza uhitaji wa vikundi 11 vya lugha, na mikutano fulani inafanywa katika lugha nyingine 4. Kuna shamba lenye matokeo miongoni mwa wahamiaji wenye kusema Kirusi kutia na maelfu ya watu wa Mashariki ambao wameanza kuishi Kanada katika miaka ya karibuni.

Watu wengi wanaotafuta usalama mbali na hali mbaya katika nchi yao ya uzaliwa wamesafiri hadi Norwei, kutia na mabara mengineyo. Akina ndugu katika Norwei sasa wameanza kufanya ziara za pekee kwenye sehemu zote ambako wakimbizi hao wanaishi.

Katika Israel, pia, uhamiaji umeanzisha shamba jipya la kuweza kutolewa ushahidi. Idadi kubwa za watu wamekuja kutoka ile iliyokuwa Muungano wa Sovieti, na idadi kubwa wanaonyesha upendezi katika kweli.

Je! kuna watu katika eneo lako ambao hawasemi lugha ya wenyeji? Unafanya nini ili kushiriki ujumbe wa Ufalme pamoja nao? Mapenzi ya Yehova ni kwamba “watu wote waokolewe, na kupata kujua yaliyo kweli.”—1 Tim. 2:3, 4.

[Picha katika ukurasa wa 4]

Stediamu ya Lokomotivu katika Moscow, ambako watu 23,743 walihudhuria mkusanyiko wa kimataifa wa Mashahidi wa Yehova

[Picha katika ukurasa wa 5]

Umma ulikubali kwa hamu trakti za Biblia, na watu wengi waliacha walichokuwa wakifanya bila kukawia na kuzisoma

[Picha katika ukurasa wa 6]

Akiwa mwanamke mchanga alijifunza kweli kutoka kwa Mashahidi Wajerumani katika 1944 katika kambi ya mateso ya wanawake katika Ravensbrück

Alijifunza kweli kwa mara ya kwanza mnamo 1942 katika Bessarabia (sasa Moldova); alifungwa mara kwa mara kwa sababu ya imani yake; sasa ni mwangalizi wa mzunguko

Stediamu katika Kiev ambako watu 64,714 walihudhuria na 7,402 wakabatizwa

[Picha katika ukurasa wa 9]

Washiriki wa Baraza Linaloongoza pamoja na wafanyakazi wa tawi kwenye mtaala uliofanywa katika Wallkill, katika United States

[Picha katika ukurasa wa 12]

Lori la kupeleka misaada la Watch Tower, Monrovia, Liberia

[Picha katika ukurasa wa 15]

Jumba la Ufalme lililojengwa hivi karibuni katika Igieduma, Naijeria

[Picha katika ukurasa wa 17]

Jumba la Kusanyiko la Mashahidi wa Yehova lililo jipya katika Rio de Janeiro, Brazil.

[Picha katika ukurasa wa 19]

Ofisi mpya na kiwanda cha kuchapia katika Facatativá, Kolombia

[Picha katika ukurasa wa 20]

Majengo ya tawi yaliyopanuliwa katika New Zealand

 [Picha katika ukurasa wa 21]

Juu, Zambia; katikati juu, Puerto Riko; kulia, Hangari

[Picha katika ukurasa wa 22]

Tawi la Polandi katika Nadarzyn, karibu na Warsaw

 [Picha katika ukurasa wa 27]

Majengo ya tawi yaliyoongezwa jijini London, Uingereza