SWALI LA 5

Je, Ni Jambo la Akili Kuiamini Biblia?

CHEZA

Je, umewahi kuambiwa uwongo kuhusu mtu fulani? Huenda uliwasikia watu wengine wakisema mambo fulani kumhusu au wakimnukuu. Ulifikiri kwamba hutampenda—lakini baada ya kumfahamu vizuri, ukagundua kwamba ulikuwa umepotoshwa. Wengi wamekuwa na maoni kama hayo kuielekea Biblia.

Wasomi wengi hawaiheshimu Biblia. Unafikiri ni kwa nini? Mara nyingi kitabu hicho husemwa au kunukuliwa kwa njia inayoonyesha kwamba hakipatani na akili, si cha kisayansi, au si sahihi. Je, inawezekana kwamba Biblia imepotoshwa?

Ulipokuwa ukisoma broshua hii, je, ulishangaa kujua kwamba kile ambacho Biblia inasema ni sahihi kisayansi? Watu wengi hushangaa. Pia wao hushangaa kujua kwamba Biblia haisemi baadhi ya mambo ambayo dini nyingi hudai kwamba inasema. Kwa mfano, wengine husema kwamba Biblia inafundisha kuwa Mungu aliumba ulimwengu na uhai wote uliomo kwa siku sita zenye saa 24. Kwa kweli, Biblia haipingi makadirio mbalimbali yanayotolewa na wanasayansi kuhusu muda ambao ulimwengu na dunia vimekuwapo. *

Zaidi ya hayo, maelezo mafupi ya Biblia kuhusu jinsi Mungu alivyoanzisha uhai hapa duniani huwapa wanasayansi nafasi ya kutosha kufanya uchunguzi na kutunga nadharia za kisayansi. Biblia husema kwamba Mungu aliumba uhai wote na kwamba vitu vilivyo hai vimeumbwa “kulingana na aina zake.” (Mwanzo 1:11, 21, 24) Huenda taarifa hizo zikapingana na nadharia fulani za kisayansi, lakini hazipingani na mambo ya hakika yaliyothibitishwa kisayansi. Sayansi imethibitisha kwamba nadharia huja na kwenda; ukweli unabaki.

Hata hivyo, kuna watu wengi wanaosita kuichunguza Biblia kwa sababu dini imewavunja moyo. Wanapochunguza dini mashuhuri, wanaona watu wenye unafiki, ufisadi, na wanaopenda vita. Hata hivyo, je, ni sawa kuishutumu Biblia kwa sababu ya matendo ya watu wanaodai kuiwakilisha? Wanasayansi wengi wanyoofu wameshangazwa na jinsi watu fulani wakatili wanavyotumia nadharia ya mageuzi ili kuunga mkono ubaguzi wa rangi. Je, itakuwa sawa kuishutumu nadharia ya mageuzi kwa msingi huo? Ni afadhali kuchunguza madai ya nadharia hiyo na kuyalinganisha na uthibitisho uliopo.

Tunakusihi ufanye hivyo kuhusu Biblia. Huenda ukashangazwa kujua jinsi mafundisho yake yanavyotofautiana sana na mafundisho ya dini nyingi mashuhuri. Badala ya kuchochea vita na chuki ya kikabila, Biblia hufundisha kwamba lazima watumishi wa Mungu wakatae kabisa vita na chuki ambazo husababisha jeuri. (Isaya 2:2-4; Mathayo 5:43, 44; 26:52) Badala ya kuchochea uhafidhina na imani isiyo na uthibitisho, Biblia hufundisha kwamba uthibitisho unahitajika ili kuwa na imani ya kweli. Pia inafundisha kwamba ili tumtumikie Mungu, tunahitaji nguvu zetu za kufikiri. (Waroma 12:1; Waebrania 11:1) Badala ya kuzuia watu wasifanye utafiti, Biblia inatutia moyo tuchunguze baadhi ya maswali magumu na yenye kutatanisha ambayo watu wamewahi kuuliza.

Kwa mfano, umewahi kujiuliza: ‘Ikiwa kuna Mungu, kwa nini ameruhusu uovu?’ Biblia inajibu swali hilo na maswali mengine pia kwa njia yenye kuridhisha. * Tunakusihi uendelee kuitafuta kweli. Unaweza kupata majibu yenye kuridhisha, yenye kuchangamsha, yanayopatana na akili—na yanayotegemea uthibitisho wenye kusadikisha. Na hilo halijitokezi tu.

^ fu. 5 Kwa habari zaidi, ona broshua Uhai—Ulitokana na Muumba? iliyochapishwa na Mashahidi wa Yehova.

^ fu. 9 Ona sura ya 11 ya kitabu Biblia Inafundisha Nini Hasa? kilichochapishwa na Mashahidi wa Yehova.