MAMA alikasirika sana mimi na mke wangu, Tsitso, tulipokuwa Mashahidi wa Yehova. Siku moja, aliwakusanya washiriki wote wa familia, akitarajia kwamba wangenishawishi niache kushirikiana na Mashahidi. Waliniambia nibadili msimamo wangu, la sivyo, ningetengwa na familia.

Niliamua kuhama. Kwa kuwa nilikuwa mfua chuma, nilifikiria kuhamia Kutaisi, jiji la pili kwa ukubwa nchini Georgia, ambako ningeweza kupata kazi kwa urahisi. Pia, nilijua kwamba jiji hilo lilikuwa na uhitaji mkubwa wa wahubiri, hivyo nilitafuta mwongozo wa Yehova.

Siku chache baadaye, nilikutana na mwanafunzi wangu wa Biblia aliyekuwa akiishi kwenye mji mdogo unaoitwa Jvari. Aliposikia kwamba ninataka kuhamia Kutaisi, alinisihi nihamie mji wao. Alisema hivi: “Nina nyumba kubwa. Mimi, mke wangu, na watoto tutaishi kwenye chumba kimoja, kisha wewe na mke wako mwishi kwenye chumba kile kingine.”

 Kwa kuwa nilikuwa nikitafuta mwongozo wa Yehova, nilimwambia kwamba nitakubali kuishi kwao kwa muda ikiwa tu ningepata kazi pamoja na nyumba ya kukodi huko Jvari. Kwa kushangaza, siku hiyohiyo jioni, alirudi akiwa na orodha ya nafasi za kazi.

Siku chache baadaye, tulihamia Jvari. Tangu siku ya kwanza, nilikuwa na kazi yenye mshahara mzuri sana. Mwajiri wangu mpya alinipatia nyumba kubwa iliyomilikiwa na kampuni yake. Muda si muda, niliombwa nisaidie kazi ya kuchapisha machapisho ya Biblia kisiri. Kwa kuwa nyumba yetu ilikuwa kubwa, mimi na mke wangu tulikubali itumiwe kwa kazi hiyo.

Kwa miaka mingi, nyumba yetu ilitumiwa kufanyia Ukumbusho na matukio mengine ya pekee. Watu zaidi ya 500 walibatizwa ndani ya nyumba yetu! Ninafurahi sana kwamba nilitambua mwongozo wa Yehova na kuufuata!