1, 2. Watu wengi wanajiuliza swali gani?

KIJIJI kinakumbwa na kimbunga. Mhalifu anafyatua risasi kanisani, anajeruhi na kuua watu wengi sana. Mama anakufa kwa kansa na kuwaacha watoto watano wakiwa mayatima.

² Majanga kama hayo yanapotokea, watu wengi hujiuliza, “Kwa nini?” Watu wengi wanajiuliza kwa nini ulimwengu umejaa chuki na mateso. Je, umewahi kujiuliza hivyo?

3, 4. (a) Habakuki aliuliza maswali gani? b) Yehova alimjibuje?

³ Katika Biblia, tunajifunza kuhusu wanaume waaminifu ambao walimwuliza Mungu maswali kama hayo. Kwa mfano, nabii Habakuki alimwuliza Yehova hivi: “Kwa nini unanifanya nione mambo mabaya? Na kwa nini unavumilia ukandamizaji? Kwa nini uharibifu na ukatili uko mbele yangu? Na kwa nini ugomvi na mizozo inaongezeka?”—Habakuki 1:3.

⁴ Katika andiko la Habakuki 2:2, 3, tunasoma jinsi Mungu alivyomjibu Habakuki na jinsi alivyoahidi kurekebisha hali. Yehova anawapenda sana watu. Biblia inasema hivi: “Anawajali ninyi.” (1 Petro 5:7) Kwa kweli, Mungu anachukia kuona watu wakiteseka. (Isaya 55:8, 9) Hivyo basi, acheni tuzungumzie swali hili: Kwa nini ulimwengu umejaa mateso?

5. Walimu wengi wa dini wanafundisha nini kuhusu mateso? Biblia inafundisha nini?

⁵ Mara nyingi viongozi na walimu wa dini hufundisha  kwamba watu wanapoteseka ni mapenzi ya Mungu. Wengine wanasema kwamba mambo yote mabaya yanayowapata watu yamepangwa na Mungu na hatuwezi kuelewa sababu. Wengine wanasema kwamba watu, hata watoto wadogo wanakufa ili wakaishi na Mungu mbinguni. Hata hivyo, mafundisho hayo si ya kweli. Yehova hasababishi mambo mabaya. Biblia inasema: “Mungu wa kweli hawezi kamwe kuwazia kutenda uovu, na Mweza-Yote hawezi kamwe kutenda kosa!”—Ayubu 34:10.

6. Kwa nini watu wengi wanamlaumu Mungu kwa mateso yaliyo ulimwenguni?

⁶ Watu wengi wanamlaumu Mungu kwa sababu ya mateso yaliyojaa ulimwenguni. Wanafikiri kwamba Mungu ndiye anayetawala ulimwengu huu. Lakini kama tulivyojifunza katika Sura ya  3, kwa kweli mtawala wa ulimwengu huu ni Shetani Ibilisi.

7, 8. Kwa nini ulimwengu umejaa mateso?

⁷ Biblia inasema kwamba “ulimwengu mzima unakaa katika nguvu za yule mwovu.” (1 Yohana 5: 19) Mtawala wa ulimwengu huu, Shetani, ni mkatili. ‘Anaipotosha dunia nzima inayokaliwa.’ (Ufunuo 12:9) Watu wengi wanamwiga. Hiyo ni sababu moja inayofanya ulimwengu ujae uwongo, chuki, na ukatili.

⁸ Kuna sababu nyingine zinazofanya ulimwengu ujae mateso. Baada ya Adamu na Hawa kuasi, wazao wao walirithi dhambi hiyo. Hivyo, kwa sababu ya dhambi, wanadamu wanawaumiza wanadamu wenzao. Wanafikiria faida zao wenyewe tu. Wanapigana, wanaenda vitani, na kuwanyanyasa wengine. (Mhubiri 4:1; 8:9) Nyakati nyingine watu wanateseka  kwa sababu ya “wakati na matukio yasiyotarajiwa.” (Mhubiri 9:11) Wanapokuwa mahali pasipofaa, wakati usiofaa, aksidenti na mambo mengine mabaya yanaweza kutukia.

9. Kwa nini tuna uhakika kwamba Yehova ana sababu nzuri ya kuacha mateso?

⁹ Kamwe Yehova hasababishi mateso. Hatupaswi kumlaumu kwa sababu ya vita, uhalifu na ukandamizaji. Mungu hasababishi majanga kama vile matetemeko, vimbunga, na mafuriko. Lakini huenda ukajiuliza, ‘Ikiwa Yehova ndiye mwenye nguvu zaidi katika ulimwengu wote mzima, kwa nini hazuii mambo mabaya yasitukie?’ Tunajua kwamba Mungu anatujali sana, kwa hiyo lazima awe na sababu nzuri ya kuacha mateso yaendelee.—1 Yohana 4:8.

10. Shetani alimpingaje Yehova?

¹⁰ Katika bustani ya Edeni, Ibilisi aliwadanganya Adamu na Hawa. Shetani alidai kwamba Mungu ni mtawala mbaya. Alidai kwamba Mungu alikuwa anawanyima Adamu na Hawa mambo mazuri. Alitaka waamini kwamba yeye [Shetani] angekuwa mtawala mzuri kuliko Yehova na kwamba hawakuhitaji utawala wa Mungu.—Mwanzo 3:2-5; soma Maelezo ya Ziada 27.

11. Tunahitaji kupata jibu la swali gani?

¹¹ Adamu na Hawa walikataa kumtii Yehova na wakamwasi. Walifikiri walikuwa na haki ya kujiamulia mema na mabaya. Yehova angethibitishaje kwamba waasi hao wamekosea na kwamba yeye ndiye anayejua mambo yanayotufaa?

12, 13. (a) Kwa nini Yehova hakuwaharibu waasi hao mara tu baada ya kuasi? (b) Kwa nini Yehova ameruhusu Shetani atawale ulimwengu huu na wanadamu wajitawale?

 ¹² Yehova hakuwaharibu Adamu na Hawa mara moja. Badala yake, aliwaruhusu wazae watoto. Kisha, Yehova akafanya iwezekane kwa watoto wa Adamu na Hawa kuchagua yule atakayekuwa mtawala wao. Kusudi la Yehova lilikuwa kuijaza dunia watu wakamilifu, na hilo lingetimia licha ya upinzani wa Shetani.—Mwanzo 1:28; Isaya 55:10, 11.

¹³ Shetani alimpinga Yehova mbele ya mamilioni ya malaika. (Ayubu 38:7; Danieli 7:10) Hivyo, Yehova alimpa Shetani muda ili kuthibitisha mashtaka yake. Pia, aliwapa wanadamu wakati wa kuanzisha serikali zao chini ya utawala wa Shetani na kuona kama zingeweza kufanikiwa bila msaada wa Mungu.

14. Utawala wa wanadamu umethibitisha nini?

¹⁴ Kwa miaka mingi, wanadamu wamejaribu kujitawala lakini wameshindwa. Shetani amethibitika kuwa mwongo. Wanadamu wanahitaji msaada wa Mungu. Nabii Yeremia alisema kweli alipoandika hivi: “Ninajua vema, Ee Yehova, kwamba njia ya mtu wa udongo haimo katika uwezo wake. Mwanadamu anayetembea hana uwezo wa kuongoza hatua yake.”—Yeremia 10:23.

15, 16. (a) Kwa nini Yehova ameruhusu mateso yaendelee kwa muda mrefu? (b) Kwa nini hajazuia matatizo yanayosababishwa na Shetani?

¹⁵ Kwa nini Yehova ameruhusu mateso yaendelee kwa muda mrefu? Kwa nini hazuii mambo mabaya yasitokee? Muda mrefu ulihitajika ili kuthibitisha  kwamba utawala wa Shetani umeshindwa. Wanadamu wamejaribu mifumo mbalimbali ya serikali bila mafanikio. Hata ingawa wamefanya maendeleo katika sayansi na teknolojia, kuna ukosefu wa haki, umaskini, uhalifu, na vita kuliko wakati mwingine wowote. Wanadamu hawawezi kujiongoza kwa mafanikio bila Mungu.

¹⁶ Hata hivyo, Yehova hajaondoa matatizo yaliyosababishwa na Shetani. Ikiwa angefanya hivyo angekuwa anaunga mkono utawala wa Shetani, na hawezi kamwe kufanya hivyo. Pia, wanadamu wangeamini kwamba wanaweza kujitawala wenyewe kwa mafanikio, jambo ambalo si kweli na Yehova hawezi kuunga mkono jambo hilo. Yeye hasemi uwongo.—Waebrania 6:18.

17, 18. Yehova atafanya nini kuhusu madhara yote ambayo yamesababishwa na Shetani?

¹⁷ Je, Yehova anaweza kuondoa madhara yote ambayo yamesababishwa na uasi wa Shetani na wanadamu? Ndiyo. Kwa Mungu mambo yote yanawezekana. Yehova anajua wakati ambao atajibu mashtaka yote ya Shetani. Kisha, ataifanya dunia kuwa paradiso, kama alivyokusudia. Wote walio katika “makaburi ya ukumbusho” watafufuliwa. (Yohana 5:28, 29) Watu hawataugua wala kufa tena. Yesu ataondoa madhara yote yaliyosababishwa na Shetani. Yehova atamtumia Yesu ‘kuvunja kazi za Ibilisi.’ (1 Yohana 3:8) Tunashukuru sana kwamba Yehova amekuwa na subira hivi kwamba tumepata fursa ya kumjua na tunaweza kuamua awe Mtawala wetu. (Soma 2 Petro 3:9, 10.) Hata tunapoteseka, anatusaidia  tuendelee kuvumilia.—Yohana 4:23; soma 1 Wakorintho 10:13.

¹⁸ Yehova hatulazimishi tumchague awe Mtawala wetu. Ametupatia uhuru wa kuchagua. Acheni tuchunguze jinsi tunavyoweza kutumia uhuru huo.

19. Yehova ametupatia nini? Kwa nini tunapaswa kumshukuru?

¹⁹ Uhuru wa kuchagua ambao tumepewa na Yehova unatufanya tuwe tofauti na wanyama. Wanyama wanaongozwa na silika, lakini sisi tunaweza kuamua jinsi tutakavyoishi na ikiwa tutamtumikia Yehova. (Methali 30:24) Sisi si kama mashine ambazo zinaongozwa na mtu mwingine. Tuna uhuru wa kuchagua marafiki, jinsi tutakavyoishi, na mambo tutakayofanya maishani. Yehova angependa tufurahie maisha.

20, 21. Unaweza kufanya uamuzi gani sasa?

²⁰ Yehova anataka tumpende. (Mathayo 22:37, 38) Yeye ni kama baba anayefurahia kusikia mtoto wake akimwambia “Nakupenda” kutoka moyoni bila kulazimishwa. Yehova ametupatia uhuru wa kuchagua kumtumikia au kutomtumikia. Shetani, Adamu, na Hawa walichagua kutomtumikia Yehova. Wewe utatumiaje uhuru wa kuchagua?

²¹ Chagua kumtumikia Yehova. Kuna mamilioni ya watu ambao wameamua kumpendeza Mungu na kumkataa Shetani. (Methali 27:11) Unaweza kufanya nini sasa ili ustahili kuingia katika ulimwengu mpya ambao hautakuwa na mateso? Sura inayofuata itajibu swali hilo.