Tunaheshimu mambo yaliyotimizwa na sayansi na tunaamini uvumbuzi wa kisayansi uliothibitishwa.

 “Sayansi ni elimu kuhusu vitu vya asili, tabia zake pamoja na ujuzi tunaopata kutokana na vitu hivyo.” (Collins Cobuild Advanced Learner’s English Dictionary) Ingawa Biblia si kitabu cha sayansi, inawatia watu moyo wajifunze kuhusu vitu vya asili vinavyopatikana ulimwenguni na kufaidika kutokana mambo ambayo wachunguzi wamegundua. Fikiria mifano kadhaa:

•   Elimu ya nyota: “Inueni macho yenu juu, mwone. Ni nani ameviumba vitu hivi? Ni Yeye anayelileta jeshi lake kulingana na hesabu, ambaye zote anaziita kwa jina.”​—Isaya 40:26.

•   Elimu ya viumbe: Sulemani “alikuwa akisema kuhusu miti, kuanzia mwerezi ulio katika Lebanoni mpaka mhisopo unaomea juu ya ukuta; na alikuwa akisema kuhusu wanyama na kuhusu viumbe vinavyoruka na kuhusu vitu vyenye kutambaa na kuhusu samaki.”​—1 Wafalme 4:33.

•   Tiba: “Wale walio na afya hawahitaji tabibu, bali wale wanaougua ndio wanaomhitaji.”​—Luka 5:31.

•   Elimu ya hali ya hewa: “Je, umeingia katika maghala ya theluji, au, je, unayaona hata maghala ya mvua ya mawe, . . . ? Iko wapi njia ambayo . . . upepo wa mashariki hutawanyika huku na huku juu ya dunia?”​—Ayubu 38:22-24.

 Machapisho yetu yanawasaidia watu waheshimu sayansi kwa kuchapisha makala kuhusu vitu vya asili na maendeleo ya kisayansi. Wazazi Mashahidi huwatia moyo watoto wao waelimike ili waweze kuelewa vizuri vitu mbalimbali vya asili katika ulimwengu. Baadhi ya Mashahidi wa Yehova wanafanya kazi katika nyanja za kisayansi, kutia ndani biokemia, hisabati, na fizikia.

 Hatuamini kwamba sayansi inaweza kujibu maswali yote ya wanadamu. a Kwa mfano, wataalamu wa jiolojia huchunguza dunia imefanyizwa kwa kutumia nini, na wanabiolojia huchunguza jinsi mwili unavyofanya kazi. Lakini kwa nini dunia inafaa sana kwa ajili ya uhai, na kwa nini sehemu mbalimbali za mwili hufanya kazi kwa upatano sana?

 Tumefikia mkataa kwamba Biblia pekee ndiyo inayoweza kutupatia majibu yenye kuridhisha ya maswali hayo. (Zaburi 139:13-​16; Isaya 45:18) Kwa hiyo, tunaamini kwamba elimu bora inatia ndani kujifunza kutokana na sayansi na Biblia.

 Nyakati nyingine, sayansi inaweza kuonekana kana kwamba inapingana na Biblia. Hata hivyo, maoni hayo yanaweza kutokea kwa sababu ya kutoelewa kile ambacho Biblia inafundisha hasa. Kwa mfano, haifundishi kwamba dunia iliumbwa kwa siku sita zenye urefu wa saa 24.​—Mwanzo 1:1; 2:4.

 Nadharia fulani zinazoonekana kuwa za kisayansi hazina uthibitisho wa kutosha na zinapingwa na wanasayansi wanaoheshimika. Kwa mfano, kwa kuwa ulimwengu halisi unaonyesha kwamba ulitokezwa na mtu mwenye akili, sisi tunakubaliana na maoni ya wanabiolojia, wanakemia, na wataalamu wengine wengi ambao wamefikia mkataa kwamba viumbe havikujitokeza vyenyewe iwe ni kupitia mabadiliko ya ghafla ya chembe za urithi au uteuzi wa asili.