Vijana, wanaume kwa wanawake, katika ofisi ya tawi ya Mashahidi wa Yehova huko Marekani hutumia wakati na nguvu zao kufua tani 1,800 za nguo kila mwaka katika majengo matatu yaliyounganishwa huko Brooklyn, Patterson, na Wallkill, New York. Nguo hizo ni nyingi sana. Kinachofanya kazi hiyo iwe ngumu sana, ni aina mbalimbali ya nguo ambazo wafanyakazi hao hushughulikia.

Kila siku ya kazi, wale wanaoishi katika majengo hayo huko Marekani hupeleka zaidi ya nguo 11,000 mahali pa kufulia nguo huko Betheli ambazo ni mashati 2,300 na suruali 650, kutia ndani soksi, nguo za ndani, na T-shati. Pia, wanapeleka nguo 900 za ziada ili zifuliwe kwa kutumia kemikali.

Kwa kuongezea, wanapeleka marundo ya mashuka, taulo, na mablanketi, na vilevile nguo zinazovaliwa na wale wanaohudumu mezani na jikoni na vitambaa vya kufutia. Nguo hizo zote zinahitaji kufuliwa, kukaushwa, na kuwarudishia wenyewe. Nguo kama vile vitambaa vya kufutia hufuliwa pamoja, ilhali nguo ambazo hazifuliwi kwa maji kama vile tai na blauzi hufuliwa mojamoja kwa uangalifu sana.

Wanaofanya kazi ya kufua huchunguza kila nguo ili kuona ikiwa imeraruka au vifungo vimetoka. Ikiwa nguo imetoka kifungo, kuna mashine inayoshona kifungo hicho, au kinashonwa kwa mkono. Ikiwa nguo inahitaji kurekebishwa, kuna mtu anayefanya marekebisho hayo.

Kuna mashine inayoweka alama ndogo katika kila nguo ili kuhakikisha kwamba nguo hizo nyingi zinashughulikiwa kwa njia inayofaa. Alama hiyo inarahisisha kazi ya kutenganisha nguo, ili nguo zilizofuliwa na kupigwa pasi zirudishwe kwa wale wanaoishi katika majengo hayo.

Wafanyakazi wapya huzoezwa kufua nguo na wafanyakazi wenzao wenye uzoefu. Yule anayezoezwa hujifunza kazi 20 hivi tofauti tofauti. Mojawapo ya kazi ngumu ni kuondoa madoa kwenye nguo. Mfanyakazi mpya anapaswa kujua vizuri aina ya nguo na jinsi zinavyofuliwa.

Tajh, ambaye amefanya kazi ya kufua nguo kwa mwaka mmoja na nusu, anasema hivi kuhusu wale anaofanya kazi nao, “Ni marafiki wazuri sana! Inafurahisha sana kufanya kazi pamoja na watu wa malezi tofauti tofauti.” Mfanyakazi mwingine anayeitwa Shelly anasema hivi: “Ni pendeleo kutunza wale wanaoishi Betheli.”